Isaías 13 - Bible in Tzotzil de Chenalhó with Deuterocanon

I'albat sc'oplal c'u x'elan chbat li Babiloniae

¹ Li Isaías xnich'on Amoze laj yalbe sc'oplal c'usi chc'ot ta pasel ta stojol li Babiloniae, yu'un jech i'ac'bat sna' yu'un li Diose. Jech laj yal:

² “Toybeic senyail ta jol vits ti ac'o xa oyuc c'ope; aptaic, ac'o xa sliquesic li c'ope. Toyo ac'obic yu'un ac'o yilic, ac'o xa ochicuc batel ta sti' scoraltonal snaic li banquilaletique.

³ Laj xa quic'an tal li jvinictac ti lec tsots yo'ntonique; laj xa calbe mantal li jpasc'opetic ti voc'bilic cu'une, ti xcuxet no'ox yo'ntonic c'alal chitsalvane, yu'un ac'o spasic li c'usi jnopoj ta jpas ta sc'ac'al co'ntone”, xi li Muc'ul Diose.

⁴ Chvinaj tsots vochlajetel ta vitsetic; xco'laj xchi'uc ep cristiano te oyic. Chvinaj x'avlajetic li cristianoetic ta jujun banamile; ja' li epal lum te stsoboj sbaique. Li Muc'ul Dios ti ech'em svu'ele ch-ech' sq'uel me lec chapal li yajsoldadotac sventa pleitoe.

⁵ Scotolic liquemic tal ta namal banamil; liquemic tal c'alal to ta yibel vinajel. Ja' li Muc'ul Dios xchi'uc scotol li yajtuneltac sventa tslajes scotol li banamil ta sc'ac'al yo'ntone.

⁶ Me'on-oc'anic, yu'un nopol xa chc'ot sc'ac'alil yu'un li Muc'ul Diose; xco'laj xchi'uc jmoj ta majel chvul li Boch'o ech'em svu'ele.

⁷ Ja' yu'un scotol li cristianoetique toj alubel chc'ot sc'ob scotolic, mu'yuc stsatsal yo'nton chcomic o.

⁸ Chnoj ta xi'el li yo'ntonique; puru vocol, puru at-o'nton chajvalinic o; cha'ibeic lec xc'uxul vocol jech chac c'u cha'al jun ants c'alal yorail xa chcuxe. Chch'ay yo'ntonic ta jujuntal ti c'alal chil sbaique; li sat yelovique xjumlajet ta c'oc' cha'yic.

⁹ A'yo ava'yic, ta xa sta yorail sc'ac'alil li Muc'ul Diose; toj xi'bal sba, yu'un tstsan, chtil li sc'ac'al yo'ntone, chcom ta xocol banamil li yosilalique; ta xules scotol li jpasmuliletic te nacajtique.

¹⁰ Li c'analetic ta vinajel xchi'uc li jujutsob c'analetique mu xa xac' xojobalic. Li c'ac'al c'alal ja' to no'ox chloc' tale, ta ora ch-ic'ub; li ue mu xa xac' xojobal noxtoc.

¹¹ Jech chal noxtoc li muc'ul Diose: “Ta xcac'be stoj smul sbejel banamil ta scoj xchopolil xchi'uc ta scoj sbolil li chopol cristianoetique. Ta jlajesbe sc'oplal stoyobbailic li jtoybaetique; ta jbic'tajesic o li boch'otic muc' yac'oj sbaique.

¹² Ta xcules ep viniquetic, jech mu xa xvinaj ep viniquetic jech chac c'u cha'al vocol ta tael lequil c'anal taq'uin ta Ofir.

¹³ Yu'un ta jniques li vinajele; ta jniques banamil ta scoj li sc'ac'al co'nton c'alal me la sta sc'ac'alil chlic ilincune.

¹⁴ “Li cristianoetique ja' jech chc'otic jech chac c'u cha'al te'tical chij ti nutsbil ta anile, jech chac c'u cha'al chij ti spucoj sbaic batel c'alal mu'yuc xchabiele. Ta jujuntal ta sutic batel ta slumalic; ta jujuntal chjatovic batel ta anil ta yosilalic.

¹⁵ Ti bu chtaatic ta bee, te chich'ic pajbel lanza; ti bu chich'ic tsaquele, ta xich'ic milel.

¹⁶ Ta satic ta xich'ic jisubel ta lum li yol xnich'onique; ta xich'ic pojbel scotol li c'usitic oy yu'un ta snaique; ta xich'ic uts'intabel noxtoc li yajnilique.

¹⁷ Vu'un ta jtijbe tal yo'nton li medoetique yu'un ac'o tal scontrainic. Muc ja'uc chbat yo'ntonic yu'un li saquil taq'uine; muc ja'uc chpich'aj yo'ntonic yu'un li c'anal taq'uine.

¹⁸ Ta st'ilesubil sflechaic no'ox ta sjipic ta lum li ch'ium queremetique; mu'yuc bu abul sba chilic li jvoq'uel ololetique; mu'yuc bu c'ux ta yo'ntonic o li ololetique.

¹⁹ Li Babilonia ti toj c'upil sba ta scotol yantic banamile, ti xco'laj xchi'uc snats'ic, xchi'uc ti ja' stoyobbailic c'otem li caldeaetique, ja' jech chcomic jech chac c'u cha'al Sodoma xchi'uc Gomorra ti c'alal laj culese.

²⁰ Mu'yuc xa boch'o te chnaqui o; mu'yuc xa chnaquiic te li jayc'ol cristianoetic chjelovique; mu'yuc bu tsva'an scarpanaic te li arabetique; mu'yuc boch'o chbat xchabi xchijic te.

²¹ Ja' xa yavil jti'val chonbolometic ta xocol banamil chc'ot; li snaique ja' xa sna xcujetic chc'ot. Ja' xa te chtal naquiicuc li avestruz mutetique; ja' xa te chtal bitubajicuc li te'tical tentsunetique.

²² Puru oq'uiletic xa te chme'on oq'uic ta muc'tic naetic yu'unic; puru coyoteetic xa te ch-ochic ti bu c'upilic sba naetic yu'unique. Nopol xa sc'an xc'ot ta pasel; mu xa epuc c'ac'al sc'an”, xi li Muc'ul Diose.