Isaías 12 - Bible in Tzotzil de Chenalhó with Deuterocanon

Q'ueoj sventa stojbel ta vocol Dios

¹ C'alal me la sta sc'ac'alile, jech chavalic: “Muc'ul Dios, ta jtojbot ta vocol; ac'o me la'ilin to'ox ta jtojol, pero li sc'ac'al avo'ntone ijelov xa batel; laj xa avac'bun smuc'ul co'nton.

² Li Diose ja' jcoltavanej cu'un; jun no'ox co'nton o, mu'yuc c'usi ta jxi'be; ja' stsatsal co'nton, ja' sq'uejimol co'nton li Muc'ul Diose, yu'un ja' la scoltaun”, xachiic.

³ Xu' chaloq'ues avuch'ic ta xcuxetel avo'ntonic ec li vo' te ta nio' yo' bu chlic tal coltaele.

⁴ Xu' jech chlic avalic ta q'ueoj ec: “Tojbeic ta vocol li Muc'ul Diose, c'anbeic vocol ta stojol; puquic batel ta lumetic li c'usi muc'tic spasoje; ac'beic sna' scotol cristianoetic ti ja' no'ox stuc muc' ta scotol banamile.

⁵ Q'uejintaic li Muc'ul Diose, yu'un toj muc'tic li c'usitic spasoje; ac'o sna'ic scotol cristianoetic ta sbejel banamil.

⁶ Jnaclumetic ta Sión, cuxetuc avo'ntonic; q'uejinanic yu'un li Ch'ul Dios yu'un Israele, yu'un te oy ta atojolic xchi'uc li smuc'ule”, xachiic.