Isaías 11 - Bible in Tzotzil de Chenalhó with Deuterocanon

Tuc' tspas mantal li Mesiase

¹ Li jbej chumante' ja' li Isaie, ta xloc' jun sq'uelum; ta xlic loc'uc tal jbej sq'uelum ta mero yibel.

² Te ta xcom o ta stojol li Espíritu yu'un Muc'ul Diose, ja' ta x'ac'bat lec sbijil, ta xjambat lec sat; ta x'ac'bat lec sna' c'u x'elan chtojobtasvan; ta x'ac'bat lec stsatsal; ta x'ac'bat lec yotquin c'usi tsc'an tspas, xchi'uc c'u x'elan lec chich' ta muc' li Muc'ul Diose.

³ Ch-ac'bat lec sna' ta yo'nton ti ja' no'ox ac'o yich' ta muc' li Muc'ul Diose. Mu ja'uc no'ox jech ta xchapan ti c'u x'elan ta xil ta sate; mu ja'uc no'ox jech ta spas ti c'u x'elan cha'ay ta xchiquine.

⁴ Tuc' ta xchapan li boch'otic mu sna' spoj sbaique; ja' chal c'u x'elan lec chcom li boch'otic abul sbaique. Ta stsatsal sc'op no'ox chac'be stoj smul li cristianoetic ta banamile; ta yic'al ye no'ox tsmil li boch'o chopolique.

⁵ Puru tuc' c'usi oy ta yo'nton, puru melel scotol c'usi chal.

⁶ Li oq'uile tspas ta co'ol yo'ntonic xchi'uc li chije; co'ol chcux yo'ntonic xchi'uc unin tentsun li jti'val bolome; li bic'tal vacax xchi'uc leone jmoj chchi'in sbaic ta xanubal. Jun no'ox unin biq'uit querem ta xchabi batel.

⁷ Li me' vacax xchi'uc me' osoe co'ol tsa' sve'elic; li yolique jmoj chvayic; li leone jobel tslo' jech chac c'u cha'al vacax.

⁸ Li biq'uit olole chlic tajinuc yo' bu oy xch'en li jti'val chone; xu' tstic' ochel sc'ob yo' bu oy ston li orachone.

⁹ Ta scotol li ch'ul vits cu'une mu'yuc c'usi chopol ta jtatic te, yu'un chnoj ta yotquinel Muc'ul Dios sbejel li banamile, jech chac c'u cha'al nojem ta vo' li nabe.

¹⁰ C'alal tsta sc'ac'alil chloc' li sq'uelum Isaie, ja' jech chc'ot ta stojol jujun lum jech chac c'u cha'al bandera ti toyol muyesbile. Sa'bil yu'un scotol li cristianoetique; ti bu chnaquie, toj jun no'ox yutsil.

¹¹ C'alal me la sta sc'ac'alile, li Muc'ul Diose chlic stsob tal yan velta li steclumal ti c'u to yepal te comenic ta Asiria, ta Egipto, ta Patros, ta Etiopía, ta Elam, ta Sinar, ta Hamat, xchi'uc ta lumetic ta ti'ti' nabe.

¹² Ta stoy muyel senyail ta stojol li jujun banamile, jech chac c'u cha'al c'alal chich' muyesel banderae; ta xlic stsob tal scotol li Israel ti chucbilic batel ta yan banamile; ta stsob tal scotol li Judá ti buyuc no'ox spucoj sbaic batel ta xchanjotal sti' banamile.

¹³ Ta xlaj sc'oplal yit'ixal yo'nton li Efraine; tsalbil chc'ot yajcontratac li Judae. Li Efraine mu'yuc xa it'ix yo'nton ta stojol li Judae; jech ec li Judae mu'yuc xa bu stsoq'uet yo'nton ta stojol li Efraine.

¹⁴ Xcha'chopalic co'ol chvilic batel ta sva'lupat li filistaetic te ta smaleb c'ac'ale, yu'un chbat scontrainic, li jaychop te oyic ta sloq'ueb c'ac'ale chbat spojbeic c'usitic oy yu'unic. Chlic smozoinic c'alal ta Edom, xchi'uc c'alal ta Moab; chlic ch'unbatuc smantalic yu'un li amonetique.

¹⁵ Li Muc'ul Diose ta staquijes o li nab ta nopol Egiptoe; ta stoy sc'ob ta sba li muc'ta uc'um Eufratese; ta sliques jun muc'ta ic' ti toj xi'bal sbae; ta spas ta vucxol yu'un li uc'ume; ja' te chac' jelovicuc batel xchi'uc xonobic li steclumale.

¹⁶ C'alal ta xloq'uic tal ta Asiria ti c'u to yepal te cuxulic li steclumal Muc'ul Diose, lec jamal, lec muc' sbe tstaic jech chac c'u cha'al la staic c'alal iloq'uic tal ta Egipto ta vo'onee.