Isaías 10 - Bible in Tzotzil de Chenalhó with Deuterocanon

¹ Toj abul abaic, vo'oxuc ti chavalic mantal ac'o oyuc uts'intaele, ti chapuquic batel li c'usi chapal avu'unic ti mu xa boch'o sts'ic yu'une.

² Mu'yuc xa tuc' chachapanic li boch'o mu xu' tspoj sbaique; mu'yuc xa ta avo'ntonic li boch'otic abul sbaic te ta stojol jteclumale. Chapojbeic c'usitic oy yu'un li me'on antsetique; chavelc'anbeic c'usitic oy yu'unic li me'on ololetique.

³ ¿C'usi chapasic ti c'alal tsta yorail chapanele? ¿Boch'o chaviq'uic yu'un ac'o scoltaoxuc c'alal chavilic chlic tal ta nom li boch'otic chtal yulesoxuque? ¿Bu chavaq'uic comel li ac'ulejalique?

⁴ Mu'yuc xa c'usi xu' avu'unic; ja' no'ox te xamutste-mutsteic xchi'uc li yan jchuqueletique. Te chachi'inic ta lajel li boch'otic chamenic xae. Pero mu ono'ox xlaj o sc'ac'al yo'nton li Diose; te staoj yav sye'oj o sc'ob.

Li Asiriae ja' yabtejeb Dios chc'ot

⁵ “Li Asiriae ja' cabtejeb chc'ot sventa ta jloq'ues sc'ac'al co'nton; cac'ojbe xa ta sc'obic li nucul chcac' c'alal ilinemune.

⁶ Ja' te ta jtac batel ta jun banamil ti bu mu xiyich'icun ta muq'ue; ta jtac batel ta jun lum ti liquem sc'ac'al co'nton yu'une, yu'un ac'o bat spojbe c'usitic oy yu'unic; ac'o bat stsaquic, ac'o bat xmich'ic. Laj xa caq'uic sventa ac'o yich'ic pech'ilanel ta teq'uel ta xoraltic jech chac c'u cha'al ach'el.

⁷ Li ajvalil ta Asiriae mu'yuc bu jech snopoj; mu'yuc bu vulem ta sjol me oy jech ta spas. Li c'usitic oy ta yo'ntone, ja' no'ox ti tsc'an tslajes ep ta sep banamiletique.

⁸ Jech yaloj: ‘Li banquilaletic ta jujun banamile, ja' banquilal caj'abteltac chc'ot scotol.

⁹ Li vu'une co'ol no'ox sba chca'ay scotol lumetic jech chac c'u cha'al li lum Calno xchi'uc Carquemise. Li Hamate co'ol sba chca'ay xchi'uc li Arfade; li Samariae co'ol sba chca'ay jech chac c'u cha'al li Damascoe.

¹⁰ Oy bu jtaoj ep banamiletic ti oy ep sloc'obal diosetic yu'une; xjelov to yepal sloc'obal sdiosic jech chac c'u cha'al li Jerusalén xchi'uc Samariae.

¹¹ Jech chac c'u cha'al la jpasbe xchi'uc diosetic yu'un li Samariae, ja' no'ox jech ta jpasbe xchi'uc diosetic yu'un ec li Jerusalene’, xi”, xi li Diose.

¹² Pero ta ts'acal c'alal me laj xa spas scotol Muc'ul Dios li c'usi snopoj tspas te ta vits Sión xchi'uc ta Jerusalene, chlic yac'be stoj smul ec li ajvalil ta Asiriae; ja' stojol chc'ot ti stoyoj sbae, ti toj muc' la spas sbae.

¹³ Yu'un jech laj yal: “Vu'un la jpas ta jtsatsal jtuc; toj lec bijun, toj lec ibat snopel cu'un. Ivu' cu'un la jelbe sts'aquiltac li jujun banamile; laj quich'be scotol li sc'ulejalique; toj lec tsots vinicun, la jtsal scotol li ajvaliletique.

¹⁴ Vu'un laj cu'ninbe scotol sc'ulejal li lumetique. Ja' no'ox jech laj ca'ay jech chac c'u cha'al tas mut ti ictabil xa comele; c'alal laj cu'nin scotol li banamile, ja' no'ox jech laj ca'ay jech chac c'u cha'al ta jtamtic ton mut ta stas ti c'alal ictabil xa comele. Me junuc mu'yuc boch'o ivu' yu'un la sbaq'ues xic'; mu'yuc boch'o la xjach' ye sventa ch-avan”, xi.

¹⁵ Li eq'uele ¿me xu' muc' tspas sba ta stojol li boch'o chpicunuque? Li sierrae ¿me xu' tstoy sba ta stojol li boch'o chbaq'uesunuque? Li namte'ale tojol te' no'ox; mu ja'uc chic' batel li boch'o chnamte'inat yu'une.

¹⁶ Ja' yu'un li Muc'ul Dios ti ech'em svu'ele ta slajesbe yip li boch'o toj tsotse, ta xalubtasbe o sbec'tal ta chamel; ta xac' ti ac'o c'ac'uc sbec'tal ta tsots c'ac'ubele.

¹⁷ Li Luz yu'un Israele chc'ataj ta c'oc'; li Ch'ul Dios yu'un Israele tspas ta yat c'oc'. Ja' chchic' loq'uel ta jun no'ox c'ac'al li boch'o ja' jechic jech chac c'u cha'al ch'ixetic, ti ja' jechic jech chac c'u cha'al yantic ch'ixetique.

¹⁸ Li lequil a'malal te'tic xchi'uc ts'unubaltic yu'unique j'ech'el chlaj o scotol; ja' jech chcomic jech chac c'u cha'al boch'o tsacbil ta yavinic chamel ti mu'yuc stsatsale.

¹⁹ Jbejcantic xa no'ox muc'tic te' chcom te ta toyolaltic yu'unic; jun biq'uit olol xa no'ox xu' yu'un chat jaybej.

²⁰ C'alal yorail jech chc'ot ta pasele, li boch'otic chcomic to te ta Israele, li smomnich'nab Jacob ti cuxul to chcomique, mu xa ja'uc tspat yo'ntonic ta stojol li boch'otic i'ac'bunuc svocolique; ta sjunul yo'ntonic ja' xa tsc'anic coltael yu'un li Muc'ul Diose, ja' li Ch'ul Dios yu'un Israele.

²¹ Li scomelal smomnich'nab Jacobe, chlic suticuc tal ta stojol li Dios ti mu stac' tsalele.

²² Israel, ac'o me bats'i epoxuc, ac'o me ja' jechoxuc jech chac c'u cha'al yi' ta ti'nab, pero scomelal xa no'ox ta sut tal avu'unic, yu'un li lajesel-chamesel ti chapanbil xa chavich'ique lec tuc', lec ts'acal ta xich' pasel.

²³ Yu'un li Cajvaltic, ja' li Muc'ul Dios ti ech'em svu'ele, ta ono'ox xac' li lajel chamel ti chapal xa yu'une; ta xac' c'otuc ta pasel ta scotol li avosilalique.

²⁴ Ja' yu'un li Cajvaltic, ja' li Muc'ul Dios ti ech'em svu'ele, jech chal: “Jteclumal, jnaclumetic ta Sión, mu xaxi'ic yu'un li Asiria ti chasmajoxuc ta ste'ic, ti tstoy snamte'ic ta atojolic, jech chac c'u cha'al la spasboxuc li egiptoetique.

²⁵ Mu xa epuc c'ac'al sc'an xlaj li sc'ac'al co'ntone; ja' xa chjoybij batel ta stojol li asiriaetique, ja' ta xlic culesic.

²⁶ Vu'un ta xcac'be stojic jech chac c'u cha'al la jpasbe li madianetic te ta vits Orebe. Ja' jech ta jtoy jte' ta stojolic jech chac c'u cha'al la jpas ta Nab c'alal iloq'uic tal ta Egipto li israeletique.

²⁷ Ja' yorail ta jloq'uesboxuc li avicats ac'bil acuch ta apatique; ta jc'as loq'uel ta sventa boch'o t'ujbil cu'un li yabtejeb vacax chucbiloxuc ta anuq'uic ya'yele”, xi li Muc'ul Diose.

Itsalvan li asiriaetique

²⁸ Li jtsalvanejetique ic'otic c'alal ta Ajat, ijelovic tal ta Migrón; te la sq'uej lec comel yicatsic ta Micmas.

²⁹ Te ijelovic tal ta xtuch'ubil uc'um; te la spas scarpanaic ta Geba. Iniquic ta xi'el li Ramae; li Gabaa yu'un Saule ijatovic batel ta anil.

³⁰ Yajvaltac Galim, avananic. A'yo ava'yic, lum Laisa. Tac'ovan, lum Anatot.

³¹ Li Madmenae chjatov batel; li jnaclumetic ta Gebine tsnac' sbaic ta anil.

³² Tana no'ox te ta xpajic ta Nob li jcontrainvanejetique; senyail xa no'ox tspas ta sc'obic ti ac'o bat yac'beic li vits Sione, ja' li svitsal Jerusalene.

³³ A'yo ava'yic, li Muc'ul Dios ti ech'em svu'ele, ta slilin ta xi'elal stsatsal svu'el li c'obc'ob te'etique; ta slomesan scotol li muc'tic te'etique; lamal ta banamil tscomtsan li te'etic ti toj natique.

³⁴ Ta eq'uel ta slilin li pimil toyolal te'tique; li muc'tic te' ta Libanoe ta slomesan yalel scotol.