Hechos 9 - Bible in Tzotzil de Chenalhó with Deuterocanon

La sutes yo'nton li Sauloe

¹ Li Sauloe solel oy ta yo'nton tscontrain, tsibtas, xchi'uc ta smil li boch'otic xch'unojic Cajvaltique. Ja' yu'un bat sc'opan li mero banquilal pale te ta Jerusalene.

² La sc'anbe svunal ta sventa ti oy lec stsatsal c'alal chc'ot ta nail tsobobbailetic yu'un israeletic ta lum Damascoe. Me oy la sta li boch'otic stamojic Tuq'uil Be yu'un Cajvaltique, me viniquetic, me antsetic, ta xchucan tal, ta xic' tal ta Jerusalén.

³ C'alal jutuc xa'ox sc'an xc'ot ta Damascoe, ta ora oy c'usi xleblej tal ta vinajel, joyibtabil ic'ot li Sauloe.

⁴ Iyal ta lum. Te laj ya'ay ic'opanat: “Saulo, Saulo, ¿c'u yu'un chavuts'intaun?”, x'utat.

⁵ Itac'ov li Sauloe: “¿Boch'oot Cajval?”, xi. “Vu'un Jesusun. Vu'un ti chavuts'intaune”, x'utat.

⁶ Jech i'albat yu'un li Cajvaltique: “Lican, ochan batel ta Damasco. Te cha'albat c'usi chapas”, x'utat.

⁷ Li xchi'iltac ta xanubale iva'iic; solel ich'ay yo'ntonic. Laj ya'yic ti oy boch'o ic'opoje, pero mu'yuc boch'o laj yilic.

⁸ Ilic li Sauloe. C'alal la svic' sate, mu xa xil osil. Jech nitbil xa batel yu'un xchi'iltac i'och ta Damasco.

⁹ Oxib c'ac'al mu xil osil. Mu'yuc c'usi la sve'; mu'yuc c'usi laj yuch'.

¹⁰ Te nacal ta Damasco jun jch'unolajel, Ananías sbi. Li Cajvaltique laj yac' sba ta ilel ta stojol li Ananiase. Jech laj yalbe: “Ananías”, xut. “Li' oyune, Cajval. ¿C'usi chaval?”, xi.

¹¹ Jech i'albat yu'un li Cajvaltique: “Lican, batan ti bu Tuq'uil Xoral sbie. Te xc'ot ajac' ta sna Judas li Saulo liquem tal ta lum Tarsoe. Yu'un li stuque te xa ta sc'opan Dios.

¹² Laj xa cac'be yil ta xch'ulel ti te chac'ote, ti chc'ot avac' ac'ob ta sjol sventa ta xjam sate”, x'utat.

¹³ C'alal laj ya'ay li Ananiase, jech laj yal: “Cajval, ep boch'o yalojbicun c'u x'elan stalel li vinic le'e. Ca'yoj ti ep ta xuts'inta li boch'otic voc'bilic te ta Jerusalene.

¹⁴ Li' ta orae yich'oj tal stsatsal ta stojol banquilal paleetic ti ta xchucan batel scotol li boch'otic xch'unojicote”, xi li Ananiase.

¹⁵ Pero jech i'albat yu'un li Cajvaltique: “Batan me. Yu'un li vinic le'e jt'ujoj sventa chtun cu'un. Ja' chispucbun batel jc'oplal ta stojol yanlum cristianoetic, xchi'uc ta stojol muc'tic ajvaliletic, xchi'uc ta atojolic ec, vo'oxuc li israeloxuque.

¹⁶ Vu'un ta xcac'be yil ti ep to ta xich' vocol ta jventae”, x'utat.

¹⁷ Jech ibat li Ananiase, te i'och ta sna li Judase; c'ot yac' sc'ob ta sjol li Sauloe, jech laj yalbe: —Quermano Saulo, li Cajvaltic Jesús ti laj yac' sba ta ilel ta atojol ta be c'alal ja'o chaxanov tale, la stacun tal ta sventa yu'un ac'o jamuc asat, xchi'uc ac'o nojuc ta avo'nton li Ch'ul Espiritue —xut.

¹⁸ Ta ora no'ox ibajan yalel li c'usi macbil o sat ti xco'laj xchi'uc smerioal choy yilele, jech lic yil osil. Ilic, i'ac'bat yich' vo'.

¹⁹ C'alal ive'e, lic ayinuc lec stsatsal yan velta. Jech te to icom xchi'in jayibuc c'ac'al li jch'unolajeletic ta Damascoe.

Lic xchol sc'op Dios ta lum Damasco li Sauloe

²⁰ Li Sauloe ta ora no'ox lic xcholbe sc'oplal Cristo te ta nail tsobobbailetic yu'un israeletic. Laj yal ti ja' Xnich'on Dios li Jesuse.

²¹ Scotol li boch'otic laj ya'yique, toj labal laj ya'yic, jech laj yalic: —Li vinic li'i ¿me mu ja'uc ti tsc'an chules li boch'otic xch'unojbeic sc'op Jesús te ta Jerusalene, xchi'uc ti li' talem sventa chchucan batel chc'ot yac'an ta stojol li banquilal paleetique? —xiic.

²² Pero li Sauloe yo'to itsatsub lec yo'nton ta xcholel. Lic yac'be lec sna'ic ti ja' Cristo li Jesuse. Jech muc xa sna' c'uxi tstaq'uic li judioetique.

Icol loq'uel ta sc'ob israeletic li Sauloe

²³ C'alal i'ech' ep c'ac'ale, li judioetique lic xchapanic ti tsmilic li Sauloe.

²⁴ Pero li c'usi la xchapanique laj ya'ay li Sauloe. Ta c'ac'al, ta ac'ubal te la smalaic ta ti'coralton yu'un li lume.

²⁵ Ja' yu'un li jch'unolajeletique ta ac'ubaltic la stiq'uic ta yut moch li Sauloe; la xchechic yalel ta pat coralton.

Isut batel ta Jerusalén li Sauloe

²⁶ C'alal ic'ot ta Jerusalén li Sauloe, chac bat xchi'in ya'ay li jch'unolajeletique. Pero li jch'unolajeletique scotolic xi'emic yu'un, yu'un mu xch'unic me ja' xa jch'unolajel.

²⁷ Pero li Bernabee laj yic' batel ta stojol yajtacbolaltac Jesús li Sauloe. Laj yalbe ya'yic ti laj yil ta be li Cajvaltique, ti ic'opanate, xchi'uc ti lec tsots yo'nton jamal la xcholbe sc'oplal Jesús te ta Damascoe.

²⁸ Ja' yu'un li Sauloe te lic xchi'in li jch'unolajeletic ta Jerusalene; co'ol xa yalel muyelic ta xanubal xchi'uquic. Tsots yo'nton jamal laj yalbe sc'oplal li Cajvaltique.

²⁹ Te la stsaquilan sbaic ta lo'il xchi'uc li israeletic ti xchanojic griego c'ope. Jech te tsc'an smilic li Sauloe.

³⁰ C'alal laj ya'yic li jch'unolajeletique, laj yiq'uic batel ta lum Cesarea li Sauloe; la staquic batel ta slumal, ja' li Tarsoe.

³¹ Jech ipaj svocolic li jujutsob jch'unolajeletic ta scotol Judea banamil, ta Galilea banamil, xchi'uc ta Samaria banamile. Jun xa yo'ntonic laj yich'ic ta muc' li Cajvaltique. I'ac'bat stsatsal yo'ntonic yu'un li Ch'ul Espiritue, jech i'epajic o.

Icol jun vinic, Eneas sbi

³² Ja'o yorail ibat svu'lan scotol jch'unolajeletic li Pedroe, ibat sq'uel noxtoc li boch'otic voc'bilic yu'un Dios te ta lum Lidae.

³³ Te la sta jun vinic, Eneas sbi. Vaxquib xa jabil te mochol ta svayab yu'un aluben yacan.

³⁴ Li Pedroe jech laj yalbe: —Eneas, li Jesucristoe chascoltaot. Lican, meltsano comel avayab —xut. Ta ora ilic li Enease.

³⁵ Laj yilic scotol li boch'otic nacajtic ta Lida xchi'uc ta lum Sarone, jech lic xch'unic Cajvaltic.

Icha'cuxi Dorcas

³⁶ Ta yorail le'e oy jun jch'unolajel ants ta lum Jope, Tabita sbi. Dorcas sbi chc'ot ta griego c'op. Li ants le'e lec c'usitic la spas xchi'uc ep icoltavan.

³⁷ Ja'o yorail itsacat ta chamel li Dorcase, icham. C'alal la spocbeic sbec'tale, bat stelanic ta jun cuarto ta xcha'cojal jolna.

³⁸ Li Jopee noch' no'ox xil sbaic xchi'uc li lum Lidae. Li jch'unolajeletic te ta Jopee laj ya'yic ti te oy ta Lida li Pedroe, jech la staquic batel chib viniquetic yu'un bat svocoltaic tal. “Avocoluc, batic la ta ora te ta Jope”, xutic c'otel.

³⁹ Ta ora la xch'un li Pedroe, co'ol la xchi'inic tal. C'alal ic'ote, laj yiq'uic muyel yo' bu telel li Dorcase. Te la set sbaic scotol li me'on antsetique; x'oc'oletic laj yac'beic yil Pedro li sc'u' stsequic ipasbatic yu'un Dorcas c'alal cuxul to'oxe.

⁴⁰ Li Pedroe la stacan loq'uel scotolic, jech lic squejan sba; la sc'opan Dios. C'alal laj yo'nton ta sc'opanel Diose, la sq'uel li animae, jech laj yalbe: —Tabita, lican —xut. Jech lic svic' sat li Dorcase. C'alal laj yil li Pedroe, lic chotluc.

⁴¹ Li Pedroe la stsacbe sc'ob; la snit liquel. Laj yic'an ochel li jch'unolajeletique xchi'uc li me'on antsetique. Cuxul xa laj yac'be yilic.

⁴² Ipuc ta sjunul lum Jope li c'usi ic'ot ta pasele. Jech ep boch'otic la xch'unic Cajvaltic.

⁴³ Li Pedroe ep c'ac'al te icom ta lum Jope te ta sna jun vinic Simón, jc'a'esejnucul.