Hechos 8 - Bible in Tzotzil de Chenalhó with Deuterocanon

Lic yuts'inta yajtacbolaltac Jesús li Sauloe

¹ Li Sauloe toj lec laj yil c'alal icham li Estebane. Jech te no'ox ta sc'ac'alil ilic tsots uts'intael ta stojol li jch'unolajeletic te tsobolic ta Jerusalene. Jech la spuc sbaic batel ta Judea banamil xchi'uc ta Samaria banamil. Ja' xa no'ox te icomic ta Jerusalén li yajtacbolaltac Jesuse.

² Li boch'otic lec yich'ojic ta muc' Diose, bat smuquic li Estebane. Ep laj yoc'taic.

³ Yan li Sauloe tsc'an chules o li jch'unolajeletique. I'ochan ta naetic; la stsacan loq'uel viniquetic xchi'uc antsetic; la stic'an ta chuquel.

Laj yich' cholel sc'oplal Jesús ta Samaria

⁴ Li boch'otic la spuc sbaic batele te la xcholic batel Lequil A'yej ti buyuc no'ox ibatique.

⁵ Li Felipee te ic'ot ta jun lum ta Samaria banamil; te la xcholbe ya'yic cristianoetic sc'oplal li Cristoe.

⁶ Li cristianoetic te ta lume la stsob sbaic; la sts'e'chiquintaic lec c'usi laj yal li Felipee. Laj ya'yic, laj yilic li sq'uelubiltac stsatsal Dios la spase.

⁷ Yu'un ep li boch'otic ochem pucuj ta yo'ntonique, pero iloc' li pucujetique. C'alal iloc' li pucujetique, tsots i'avanic. Xchi'uc ep noxtoc boch'otic aluben yacanic xchi'uc coxoetic icolic.

⁸ Jech la sta ep xcuxetel yo'ntonic li cristianoetic te ta lume.

⁹ Te oy jun vinic, Simón sbi. Ep c'usi xu' yu'un tspas te ta lum, yu'un xchanoj mágia. Lec la xch'aybe yo'nton cristianoetic te ta Samaria banamil ta sventa li c'usi tspase. Laj yal ti ja' ech'em smuc'ule.

¹⁰ Scotol cristianoetic c'alal ta biq'uit ta muc' la sts'e'chiquintaic lec li c'usi laj yale. Jech laj yalic: “Le'e, ja' svu'el stsatsal li Dios ti ‘toj ech'em smuc'ul’, xi sbie”, xiic.

¹¹ Ja' xa te yac'oj o yo'ntonic ta ya'yel c'usi ta xal li vinique, yu'un vo'one xa ilo'laatic yu'un li c'usi xu' yu'un tspasilane.

¹² Pero c'alal icholbatic yu'un Felipe li Lequil A'yej ta sventa c'u x'elan chventainvan stuc li Diose xchi'uc sc'oplal li Jesucristoe, la xch'unic, laj yich'ic vo' li viniquetic xchi'uc antsetique.

¹³ Li Simone la xch'un ec. Te laj yich' vo', jech la snaban sba o ta stojol li Felipee. C'alal laj yil ti ep sq'uelubil stsatsal Dios la spas li Felipee, toj labal sba laj yil.

¹⁴ C'alal laj ya'yic yajtacbolaltac Jesús te ta Jerusalén ti laj xa xch'unic sc'op Dios li samariaetique, la staquic batel ta Samaria li Pedro xchi'uc Juane.

¹⁵ C'alal ic'otique, la sc'opanbeic Dios ta stojol li jch'unolajeletique, yu'un ac'o yich'ic ec li Ch'ul Espiritue.

¹⁶ Yu'un me junuc mu'yuc boch'o yich'oj Ch'ul Espíritu yu'unic; ja' no'ox laj yich'ic vo' ta sbi li Cajvaltic Jesuse.

¹⁷ Ja' yu'un li Pedro xchi'uc Juane lic yac' sc'obic ta sba li jch'unolajeletique, jech laj yich'ic li Ch'ul Espiritue.

¹⁸ C'alal laj yil Simón ti laj yich'ic Ch'ul Espíritu jch'unolajeletic c'alal laj yac' sc'obic li yajtacbolaltac Jesuse, te xa tsc'an chac'be taq'uin li yajtacbolaltac Jesuse.

¹⁹ Jech laj yal: —Ac'bicun jech jvu'el ec, yu'un jech xu' ta xich'ic Ch'ul Espíritu cu'un li boch'otic ta xcac' jc'ob ta sjolique —xi.

²⁰ Li Pedroe jech laj yalbe: —Batan ta ch'ayel achi'uc ataq'uin, yu'un chanop ti manbil ta taq'uin li matanal chac' Diose.

²¹ Li vo'ote mu'yuc ta aventa, mu xu' chc'ot ta atojol li abtel li'i, yu'un muc tuc'uc avo'nton ta stojol Dios.

²² Suteso avo'nton ta sventa li c'usi chopol oy ta avo'ntone. C'anbo vocol li Diose; oy yic'al ta to spasbot perdón ta sventa li c'usi chopol laj anope.

²³ Yu'un ta xquil ti u'ninbilot yu'un c'usi tsc'an avo'ntone, xchi'uc ti chucbilot to yu'un li c'usi chopole —xut.

²⁴ Itac'ov li Simone: —C'opanbicun Dios ta jtojol ec li vo'oxuque, yu'un jech mu me xc'ot ta pasel ta jtojol jech chac c'u cha'al laj avalbune —xi.

²⁵ C'alal laj yalic ta jamal li sc'op Diose, li Pedro xchi'uc Juane isutic batel ta Jerusalén. Te i'ech' xcholic Lequil A'yej ta epal bic'tal lumetic ta yosilal samariaetic.

Felipe xchi'uc etiopía vinic

²⁶ Te ital c'opanatuc yu'un jun yaj'almantal Dios li Felipee, jech i'albat: “Lican, batan ta stuq'uil sur te ta sbelal lum Gaza ti xlic tal ta Jerusalene”, x'utat. Li sbelal Gazae te x'ech' ta xocol banamil.

²⁷ Jech ilic li Felipee, ibat. C'alal ixanov batele, te la sta ta be jun eunuco vinic liquem tal ta Etiopía banamil, yu'un i'ay yich' ta muc' Dios ta Jerusalén. Li vinique yich'oj yabtel yu'un ajvalil ants te ta Etiopía banamil. Ja' yabtel ta xchabibe sc'ulejal li ajvalil antse. Candáce sbi li antse.

²⁸ Sutel xa batel ta yosilal, te chotol batel ta scareta nitbil ta ca'. Te chapta batel c'usi ts'ibabil yu'un j'alc'op Isaías.

²⁹ Li Felipee jech i'albat yu'un li Ch'ul Espiritue: “Noch'ajan batel, bat chi'ino li vinic le' tiq'uil ta scaretae”, x'utat.

³⁰ Li Felipee la snuts batel ta anil li vinique. Laj ya'ay ti te chapta li sc'op Dios ts'ibabil yu'un j'alc'op Isaiase. Li Felipee jech la sjac'be li vinique: —¿Me chava'ibe smelol li c'usi chaq'uele? —xut.

³¹ Itac'ov li vinique: —¿C'uxi xu' chca'ibe smelol, yu'un mu'yuc boch'o chiyalbun ca'ay? —xi. Jech te la sc'anbe vocol Felipe ti ac'o muy chi'inatuc ta chotleje.

³² Li sc'op Dios ta sq'uele jech chal: “Ta x'ic'at batel yu'un chbat yich' milel jech chac c'u cha'al jcot ch'ium chij. Ja' jech chc'ot jech chac c'u cha'al ch'ium chij ti ch'anxi c'alal ch'ich' loc'bel stsotsile. Ja' jech mu'yuc c'usi ta xal jbeluc.

³³ C'alal ja'o uts'il ilbaj chilique, mu'yuc tuc' laj yich' chapanel. ¿Boch'o xu' chatbe c'u yepal xnich'nab xchi'uc smomnich'nab? Yu'un laj yich' tuch'bel o yorail li' ta banamil”, xi li sc'op Dios bu ta xapta li vinique.

³⁴ Li vinique jech la sjac'be li Felipee: —Albun ca'ay boch'o sc'oplal laj yal li j'alc'ope. ¿Me ja' sc'oplal stuc laj yal, o me yan boch'o sc'oplal laj yalbe? —xut.

³⁵ Ja' yu'un li Felipee lic yalbe lec ya'ay smelol. Te la sliques ti bu sbats'il sq'uelele, xquechet laj yalbe batel bu ts'ibabil li Lequil A'yej ta sventa li Jesuse.

³⁶ Ixanovic batel ta be, te la staic vo'. Jech laj yal li vinique: —Q'uelavil, oy vo' li'i. ¿Me oy c'usi tspas ti c'alal chavac'bun quich' vo'e? —xut.

³⁸ Li vinique la spas mantal ti ac'o cotiuc li scaretae. Jech iyalic, ibatic ta vo' xchibalic. Jech li Felipee laj yac'be yich' vo' li vinique.

³⁹ C'alal imuyic tal ta vo'e, li Felipee icuchat batel yu'un Ch'ul Espíritu yu'un Cajvaltic. Li vinique muc xa xil o li Felipee, pero xcuxet no'ox yo'nton la stam batel sbe yan velta.

⁴⁰ Li Felipee te to ic'ot vinajuc ta lum Azoto. Te lic xanovuc batel, la xchol batel Lequil A'yej ta scotol lumetic c'alal to ic'ot ta lum Cesarea.