Hechos 26 - Bible in Tzotzil de Chenalhó with Deuterocanon

Ic'opoj ta stojol Agripa li Pabloe

¹ Li Agripae jech laj yalbe li Pabloe: —Cholo ca'tic lec smelol ec li ava'yeje —xut. Li Pabloe la spas sc'ob ta stojol li ajvalil Agripae, jech lic lo'ilajuc:

² “Ajvalil Agripa, xcuxet no'ox co'nton ti vo'ot xu' ta xcalbot ava'ay c'u yepal jeche' sa'ojbicun jmul li jchi'iltactic ta judioale.

³ Li vo'ote, ajvalil, xana' lec scotol c'u x'elan jtaleltic, vu'utic li judioutique, xchi'uc li c'usitic jch'unojtique. Ja' yu'un avocoluc a'ibun ta slequil avo'nton li c'usi ta xcalbote.

Laj yal Pablo ti ja' to'ox xch'unoj fariseoe

⁴ “Scotol li jchi'iltactique sna'ojic c'u x'elan lich'i tal ta jlumal xchi'uc te ta Jerusalén.

⁵ Lec xotquinicun c'u xi'elan; xu' ta xalic li c'usi jch'unoj tal ta vo'onee. Sna'ojic ti biq'uitun lic jch'un fariseoe, ja' ti toj tsots sc'oplal cu'untic li mantaletic jch'unojtique.

⁶ Pero li' ta orae, ta sventa la jch'un ti ic'ot xa ta pasel li c'usi laj ono'ox yal Dios ta stojol li jmoltot jyame'tic ta vo'onee, ja' yu'un ti li' oyun ta chapanele.

⁷ Vu'utic li lajcha'chop judioutique scotol jchi'iltactic yoquel tsmalaic chc'ot ta pasel li c'usi yaloj Diose, ja' yu'un ta c'ac'al ta ac'ubal scotol yo'nton ta xch'unbeic smantal li Diose. Ajvalil Agripa, ta sventa ti jch'unoj ti ic'ot xa ta pasele, ja' jmul yu'unic o.

⁸ Li vo'oxuque ¿c'u yu'un vocol chach'unic ti xu' yu'un ta xcha'cuxes animaetic li Diose?

Laj yal Pablo ti laj yuts'inta to'ox jch'unolajeletique

⁹ “Li vu'une laj to'ox jnop ti ep c'usi xu' cu'un ta jpas sventa ta jcontrain li Jesús liquem tal ta Nazarete.

¹⁰ Jech la jpas te ta Jerusalén. Ep la jtic'an ta chuquel li boch'otic tuc' yo'ntonique. Quich'oj batel lec jtsatsal ta stojol li banquilal paleetique. C'alal chapanbil xa ta xmilatique, toj lec laj ca'ay ec.

¹¹ Ep ta velta laj cuts'intaan ta nail tsobobbailetic. La jsujic ti ac'o chopolc'opojicuc ta sventa li Jesuse. Bats'i simaronun la jpas jba ta stojolic. Ay cuts'intaan c'alal ta yantic lumetic.

Laj yal Pablo c'u x'elan la sutes yo'nton

¹² “C'alal ja'o jech co'ntone, ja'o libat ta Damasco. Tacbilun batel, xchi'uc quich'oj batel lec jtsatsal ta stojol li banquilal paleetique.

¹³ Ajvalil Agripa, ta o'lol c'ac'al c'alal oyun batel ta bee, laj quil jun tsatsal luz ta vinajel. Bats'i tsots xojobal ivul ta jtojol; ja' jutuc xojobal icom li c'ac'ale. Joyibtabilun lic'otcutic jchi'uc li jchi'iltac ta xanubale.

¹⁴ Liyalcutic ta lum jcotolcutic. Laj ca'ay oy boch'o chisc'opanun ta hebreo c'op, jech laj yalbun: ‘Saulo, Saulo ¿c'u yu'un chavuts'intaun? Ja' no'ox chasa' avocol atuc jech chac c'u cha'al vacax c'alal ta slic ta teq'uel li stijubil ti lec ts'ubts'ub sni'e’, xiyutun.

¹⁵ Jech la jtac'be: ‘¿Boch'oot? Cajval’, xcut. Jech laj yalbun: ‘Vu'un Jesusun, vu'un ti chavuts'intaune.

¹⁶ Lican me, va'ano aba. Ti jech laj cac' jba ta ilel ta atojole, yu'un ta jtic'ot ta cabtel, vo'ot testigo chacom ta sventa li c'usi laj avil li'i xchi'uc li c'usi ta to xacac'bot avil batele.

¹⁷ Vu'un ta jcoltaot loq'uel ta sc'obic li achi'iltac ta israelale xchi'uc li yanlum cristianoetique, yu'un vu'un te ta jtacot batel ta stojolic.

¹⁸ Vo'ot chc'ot avic'be satic, yu'un jech xu' chtalic ta sac osil, jech xu' tscomtsanic li ic' osile. Jech xu' ta xloq'uic ta sc'ob li Banquilal Pucuje; ja' chlic ochicuc ta sc'ob li Diose. Jech xu' ta xlic xch'unicun, jech ta spasbatic perdón yu'un smulic. Jech xu' chich'ic ec li c'usi sc'oplal chich'ic li boch'otic voc'bilic xa cu'une’, xiyutun li Cajvaltique.

Laj yal Pablo ti mu'yuc la sbaj c'usi i'albat yu'un li Cajvaltique

¹⁹ “Ja' yu'un, Ajvalil Agripa, mu'yuc la jbaj li c'usi li'albat tal ta vinajele.

²⁰ Ba'yuc laj calbe ya'yic li boch'otic te nacajtic ta Damascoe. Ts'acal bat calbe ya'yic li boch'otic te nacajtic ta Jerusalén xchi'uc ta scotol Judea banamile. Ts'acal bat calbe ya'yic li yanlum cristianoetic ti mu xotquinic Diose, yu'un jech ac'o sutes yo'ntonic, ac'o suticuc tal ta stojol li Diose, jech xu' chlic spasic c'usi lec ta sventa ti sutem xa yo'ntonique.

²¹ Ta sventa ti jech ta jpase, ja' yu'un la stsaquicun ta ch'ulna li jchi'iltactic ta judioale. Tsc'an ox ta smilicun o.

²² Pero la scoltaun li Diose, jech li' to staoj yav jun co'nton chcalbe ya'yic sc'oplal scotol li cristianoetique, c'alal ta muc', ta biq'uit. Muc yanuc c'usi ta jchol; ja' ta jchol li c'usitic laj yalic yaj'alc'optac Dios ta vo'onee xchi'uc c'usi laj yal li Moisese, ja' ti laj yalic oy c'usi ta xc'ot ta pasele.

²³ Ja' laj yalic ti ta persa ta xich' vocol li Cristoe, xchi'uc ti ja' ba'yuc ta xcha'cuxi yu'un scotol li boch'otic chamenique, yu'un jech xu' chalbe jun ta lum israel xchi'uc yanlumetic ti oy sac osil ta sventae”, xi li Pabloe.

Oy ta yo'nton Pablo ac'o xch'un Cajvaltic li ajvalil Agripae

²⁴ C'alal laj yal jech li Pabloe, tsots i'avan li Festoe: —Liquem achuvaj, Pablo, ta scoj ti toj ep laj achan vune jech lapas o ta chuvaj —xi.

²⁵ Li Pabloe jech laj yal: —Mu'yuc liquem jchuvaj, Ajvalil Festo. Ja' ta xcal li c'usi melele xchi'uc li c'usi oy lec stue.

²⁶ Li ajvalil Agripae sna'oj lec scotol li c'usi laj cale, jech tsots co'nton jamal laj calbe scotol. Jch'unoj ti sna'oj leque, yu'un muc ta muculuc ic'ot ta pasel —xi li Pabloe.

²⁷ Li Pabloe jech laj yalbe li Agripae: —Ajvalil Agripa, ¿me chach'un c'usi yaloj li yaj'alc'optac Diose? Jna'oj ti chach'une —xut.

²⁸ Li Agripae jech laj yalbe li Pabloe: —Jutuc xa me mu ta jch'un Cristo avu'un ya'yel —xi.

²⁹ Li Pabloe jech laj yal: —Lec me chach'un ta orae; lec noxtoc me ja' to c'usi orae. Ja' no'ox ti sc'anuc Dios muc vo'ocot no'ox atuc ac'o ach'un jech chac c'u cha'alune, ti oyuc c'uxi jech xch'unic ec ti jayib li' laj ya'yic c'usi laj cale. Ja' no'ox ti mu me xachucatic ta cadena jech chac c'u cha'al chuculune —xi li Pabloe.

³⁰ Jech lic sva'an sba li Festoe xchi'uc li Agripae xchi'uc li Berenicee xchi'uc scotol li boch'otic te xchi'inojic ta chotleje.

³¹ La svoc' sba stuquic li ajvaliletique, jech laj yalbe sbaic: —Li vinic li'i mu'yuc smul; mu'yuc c'usi chopol spasoj ti xu' ta xcham oe, ti xu' ta xich' chuquele —xut sbaic.

³² Li Agripae jech laj yalbe li Festoe: —Ti manchuc yaloj tsc'an chbat yich' chapanel ta stojol Cesare, xu' li' no'ox ta jcoltatic ti jechuque —xi.