Hechos 19 - Bible in Tzotzil de Chenalhó with Deuterocanon

Ibat ta Éfeso li Pabloe

¹ C'alal te oy ta lum Corinto li Apolose, li Pabloe ijelov batel ta vitsetic, jech iyal batel ta lum Éfeso; te c'ot sta jayibuc jch'unolajeletic.

² Jech la sjac'be: —¿Me laj avich'ic Ch'ul Espíritu ti c'alal laj ach'unic Cajvaltique? —xut. Itac'ovic: —Mu'yuc ca'yojcutic me oy Ch'ul Espíritu —xiic.

³ —¿Boch'o ta sventa laj avich'ic vo' cha'e? —xut. Itac'ovic: —Ja' laj quich'cutic vo' ta sventa li Juane —xiic.

⁴ Li Pabloe jech laj yalbe: —Li Juane laj yac' ich' vo' ta sventa ti sutem xa yo'ntonique. Laj yalbe ti ac'o xch'unic li boch'o ts'acal chtale, ja' li Jesuse —xi li Pabloe.

⁵ C'alal laj ya'yic jeche, laj yich'ic vo' ta sventa li Cajvaltic Jesuse.

⁶ C'alal laj yac' sc'ob li Pabloe, ivul ta stojolic li Ch'ul Espiritue, jech ic'opojic ta yan c'opetic; laj yalic c'usi i'ac'bat sna'ic yu'un Dios.

⁷ Ti c'u yepal te oyique oy van lajchabuc viniquetic.

⁸ Li Pabloe oxib u te i'ochilan ta nail tsobobbail. Tsots yo'nton jamal laj yal, laj yac'be lec yilic ti ta xa xventainvan li Diose.

⁹ Oy jayibuc tsots yo'ntonic, jech muc xch'unic. Ta stojol scotol cristianoetic lic xchopolc'optaic li Lequil Bee. Jech iloc' batel li Pabloe. Laj yic' batel li jch'unolajeletique; te bat stsob sbaic ta jun chanuvuntic yu'un jun vinic, Tirano sbi. Jujun c'ac'al te ichanubtasvan li Pabloe.

¹⁰ Chib jabil jech la spas, jech ep cristianoetic te ta Asia banamil laj ya'ibeic sc'op li Cajvaltique. Te oy li judioetique xchi'uc li greciaetique.

¹¹ Li Diose la spas tsotsic sq'uelubil stsatsal ta sventa li Pabloe.

¹² Jech oy ep boch'otic ja' no'ox laj yich'beic batel spanyo, o me sc'u' li Pabloe, c'ot yac'beic ta sbec'tal li jchameletique jech icolic o, xchi'uc iloc' o li pucujetic ti ochem ta yo'nton cristianoetique.

¹³ Oy judioetic te ic'otic; ja' yabtel ta xanovic ta jujun lum yu'un ta xchanic sloq'uesel pucuj ta yo'nton cristianoetic. C'alal tstaquic loq'uel li pucuje, ta st'abbeic sbi Cajvaltic Jesús ec. Jech chalic: “Ta jtacot loq'uel ta sbi Jesús, ja' li boch'o ta xcholbe sc'op li Pabloe”, xiic.

¹⁴ Vucubic ti jech la spasique. Ja' xnich'nab jun judío vinic, Esceva sbi. Ja' banquilal yu'un paleetic.

¹⁵ Pero itac'batic yu'un li pucuje, jech laj yal: “Xcotquin li Jesuse. Jna'oj boch'o noxtoc li Pablo chavalique. Pero li vo'oxuque, ¿boch'ooxuc?”, x'utatic.

¹⁶ Li vinic ti ochem pucuj ta yo'ntone la sjip sba batel ta sba yac'olic, tsalbil ic'otic, yu'un ja' ech'em tsots xu' yu'un. Jech t'anajtic xa ijatovic loq'uel ta sna li vinique; ep ituch'ic batel.

¹⁷ C'alal jech ic'ot ta pasele, laj ya'yic scotol li boch'otic te nacajtic ta Efesoe. Laj ya'yic c'alal ta judioetic xchi'uc c'alal ta greciaetic, jech ixi'ic scotolic. Ich'bil ta muc' ic'ot sbi li Cajvaltic Jesuse.

¹⁸ Li boch'otic xch'unojique ep lic yalic ta jamal li c'usi nopen xa'yic spasele.

¹⁹ Jech noxtoc ep boch'otic xchanojic mágia laj yich'beic batel li svunal yu'unique; te la xchiq'uic ta stojol scotol cristianoetic. Lic yich'ic ta venta c'u yepal lajem staq'uinic ta sventa li vune. Ja' iloc' ech'em ta lajuneb yoxvinic ta mil (50,000) ta sep saquil taq'uin.

²⁰ Jech i'epaj, ibol batel li sc'op Cajvaltique, yu'un toj ech'em stsatsal.

²¹ C'alal jech ic'ot ta pasele, ja'o la snop Pablo ti chbat ta Jerusalén c'alal me la xan scotol li Macedonia banamil xchi'uc Acaya banamile. Jech la snop: “Me lic'ot ta Jerusalene, tsc'an chibat ta Roma noxtoc”, xi.

²² Jech la stac jelovel ta Macedonia chib yajcoltaubbail, ja' li Timoteo xchi'uc Erastoe. Yan li stuque te to icom jayibuc c'ac'al ta Asia banamil.

Ilic ep c'op ta Éfeso

²³ C'alal te oy ta Éfeso li Pabloe, bats'i tsots iliquic ta vochlajetel cristianoetic ta scoj li Lequil Be laj yich' cholele.

²⁴ Li boch'o la sliques c'ope ja' jun vinic, Demetrio sbi. Ja' yabtel ta smeltsan ta saquil taq'uin sloc'obal li sna me'dios Dianae. Bats'i ep la spasic canal xchi'uc li xchi'iltac ta abtele.

²⁵ Li Demetrioe la stsob li boch'otic co'ol yabtelic xchi'uque, jech laj yalbe: “Jchi'iltac, xana'ic ti ep ta jpastic canal ta sventa li cabteltique.

²⁶ Pero avilojic, ava'yojic c'usi ta xalilan li vinic ti Pablo sbie. Mu ja'uc no'ox jech chalilan li' ta Éfeso; jutuc xa mu scotoluc Asia banamil ya'yoj yu'un. Jech ep xa cristianoetic la svoc' sbaic ta sventa li c'usi chalilane. Yu'un chalilanbe cristianoetic ti mu ja'uc Dios li c'usitic pasbil ta c'abale.

²⁷ Ta sventa le'e mu ja'uc no'ox xu' mu'yuc stu chc'ot li cabteltique. Xu' mu'yuc xa stu chc'ot noxtoc li xch'ulna jme'diostic Dianae. Jech noxtoc xu' mu xa x'ich'at o ta muc' li jme'diostic Diana ti lec ich'bil ta muc' yu'un scotol cristianoetic li' ta Asia banamil xchi'uc ta sbejel banamile”, xi li Demetrioe.

²⁸ C'alal laj ya'yic jeche, isoc sjolic. Tsots i'avanic: “Ja' ac'o ich'atuc ta muc' li jmuc'ta me' diostic Diana, vu'utic li efesoutique”, xiic.

²⁹ Jech ivovij sjol scotol li cristianoetic te ta lume. La snet' sbaic ochel ta jun muc'ta na ta stsobobbail epal cristianoetic. Te la xjochic ochel chib macedonia viniquetic; ja' Gayo xchi'uc Aristarco, ja' xchi'iltac ta xanubal li Pabloe.

³⁰ Li Pabloe tsc'an ox chbat sc'opan li cristianoetique, pero muc x'ac'at batel yu'un li jch'unolajeletique.

³¹ Te oy jayibuc j'abteletic liquemic ta Asia banamil. Ja' lec sc'opan sbaic xchi'uc li Pabloe. La stacbeic batel mantal Pablo ti mu me xbat yo' bu tsobol li cristianoetique.

³² Li cristianoetique x'avlajetic no'ox liquel; yantic o c'usitic chalic, yu'un icapij xa sjolic, xchi'uc ep mu sna'ic c'u yu'un ti te tsobolique.

³³ Li judioetique la sujic batel jun xchi'ilic, Alejandro sbi. Yu'un ja' ac'o c'opojuc ta stojol li cristianoetique. Jech lic spas sc'ob li Alejandroe yu'un ac'o ch'aniicuc scotolic.

³⁴ C'alal laj yilic ti ja' judío vinic li Alejandroe, muc xaq'uic c'opojuc. Tsots lic avanuc scotolic: “Ja' ac'o ich'atuc ta muc' jme'diostic Diana, vu'utic li efesoutique”, xiic. Oy van chibuc ora jech i'avanic.

³⁵ Ja' yu'un li jts'ibajom te ta lume la spajes li cristianoetique. Jech laj yalbe: “Jchi'iltac, vu'utic li efesoutique, scotol cristianoetic sna'ojic ti vu'utic jchabiojtic li xch'ulna jme'diostic Dianae xchi'uc li sloc'obal ti ibaj yalel tal ta vinajele.

³⁶ Mu'yuc boch'o xu' ta xal ti mu jechuque. Ja' lec ch'anchanic. Mu me ta aniluc xanopic li c'usi chac'an chapasique.

³⁷ Li chib viniquetic avic'ojic tal li'i mu'yuc soquesojic li xch'ulna jme'diostique; mu'yuc bu yan xich' xalic ta stojol li jme'diostique.

³⁸ Li Demetrio xchi'uc li boch'otic co'ol yabtelic xchi'uque, me ta xalic ti oy boch'o oy smule, ac'o yalic. Oy j'abteletic, oy ajvaliletic ac'o bat yalbeic li ya'yejique.

³⁹ Me oy to c'usi yan chac'an chachapanique, ja' to ta jchapantic ti bu ora sc'ac'alil muc'ta tsobajel jech chac c'u cha'al chal li mantale.

⁴⁰ Yu'un xi'bal sba jta o jmultic ta liquesejc'op avu'unic ti ep xavochlajetic li'i. Mu'yuc c'uxi xu' ta jpoj jbatic o c'u yu'un ti li' la jtsob jbatique”, xi.

⁴¹ C'alal laj yal jeche, la stacan sutel scotol li cristianoetic te tsobolique.