Hechos 14 - Bible in Tzotzil de Chenalhó with Deuterocanon

Ic'otic ta Iconio li Pablo xchi'uc Bernabee

¹ C'alal te oyic ta Iconio li Pablo xchi'uc Bernabee, te i'ochic ta nail tsobobbail yu'un li judioetique. Oy lec stsatsal li sc'opique, jech bats'i ep judioetic xchi'uc yanlumetic la xch'unic.

² Li yantic judioetic ti mu xch'unic Cajvaltique, la socbeic sjol li yanlumetic ti mu xotquinic Diose, yu'un ac'o scontrainic li Pablo xchi'uc Bernabee.

³ Li Pablo xchi'uc Bernabee ep c'ac'al te ijoc'tsajic. Tsots yo'ntonic jamal laj xcholbeic sc'op li Cajvaltique. I'ac'bat spasic sq'uelubiltac stsatsal li Cajvaltique, jech ivinaj ti ja' melel c'usi laj yalique, ja' ti ep slequil yo'nton Dios ta jtojoltique.

⁴ Li cristianoetic te ta lume cha'voc' ic'otic. Jvoc' ibatic ta stojol li judioetic ti mu xch'unique; jvoc' ibatic ta stojol li yajtacbolaltac Jesuse.

⁵ Pero li judioetic ti mu xch'unique, xchi'uc li yanlum cristianoetic ti mu xotquinic Diose, xchi'uc li banquilaletic yu'un judioetique, jmoj la snopic ti chbat yuts'intaic, ti chbat yac'beic ton li Pablo xchi'uc Bernabee.

⁶ C'alal laj ya'yic li Pablo xchi'uc Bernabee, ta ora ijatovic batel ta lum Listra, ta lum Derbe te ta Licaonia banamil, xchi'uc ta yantic lumetic ti te no'ox nopolique.

⁷ Te la xcholic batel li Lequil A'yeje.

I'ac'bat ton ta Listra li Pabloe

⁸ Te nacal ta lum Listra jun vinic, mu'yuc lec yacan, coxo ono'ox c'alal ivoc'. Mu xu' chanov o.

⁹ Te ta xa'ay c'usi ta xal li Pabloe. Li Pabloe la sq'uelbe lec sat. Laj yil ti oy xch'unojel yo'nton sventa chcole.

¹⁰ Tsots ic'opoj li Pabloe, jech laj yalbe li vinique: —Va'lan, tuc' xatec'an li avacane —xut. Ibituj li vinique, lic xanovuc.

¹¹ C'alal laj yilic c'usi la spas Pablo li epal cristianoetic te oyique, tsots i'avanic. Jech laj yalic ta licaonia c'op: —Yalem tal diosetic ta jtojoltic, xco'laj xchi'uc cristianoetic yilel —xiic.

¹² Li Bernabee Júpiter laj yac'beic sbi. Yan li Pabloe Mercurio laj yac'beic sbi, yu'un ja' ilo'ilaj.

¹³ Li pale te ta sna sdiosic Júpiter ta yeloval lume laj yic' loq'uel tot vacaxetic ta ti'coralton yu'un li lume. Yac'ojbe tal lec xnichimal snuc' li vacaxetique. Li pale xchi'uc li epal cristianoetique tsc'an tsmilbeic ox smotonin li Pablo xchi'uc Bernabee.

¹⁴ C'alal laj ya'yic li Pablo xchi'uc Bernabee, la sjat sc'u'ic. Ta anil bat stic' sbaic ta stojol li epal cristianoetique, tsots i'avanic:

¹⁵ —Viniquetic, ¿c'u yu'un jech chapasic? yu'un co'ol cristianoutic. Ti litalcutic li'i, ja' tal calcutic ava'yic ti tsc'an chacomtsanic yich'el ta muc' li c'usi mu'yuc stue. Tsc'an ja' chatalic ta stojol li cuxul Dios ti la spas vinajel banamile, xchi'uc li nabe, xchi'uc scotol li c'usitic oye.

¹⁶ Li cristianoetic ta vo'onee i'ac'bat spasic yu'un Dios li c'usi tsc'an yo'nton stuquic jujunique.

¹⁷ Pero mu yu'unuc muc xac' sba ta ilel ti ta melel oy li Diose, yu'un oy c'usi lec tspas. Ja' ta xac' tal vo'. Ta xac' satinuc li c'usitic chich' ts'unele, yu'un jech ta jta jve'eltic, jech xcuxet no'ox co'ntontic —xutic li cristianoetique.

¹⁸ Ac'o me jech i'albatic, pero vocol ipaj yu'unic, yu'un persa tsc'an tsmilbeic li smotone.

¹⁹ Te italic jayibuc judioetic liquemic tal ta lum Antioquía xchi'uc ta lum Iconio, ja' la socbeic sjol li epal cristianoetique, jech lic yac'beic ton li Pabloe. La xjochic loq'uel ta ti'lum, yu'un chamen xa laj yilic.

²⁰ Pero c'alal c'ot sjoyibtaic li jch'unolajeletique, ilic li Pabloe; i'och batel yan velta ta lum. Ta yoc'omal iloq'uic batel xchi'uc Bernabé, ibatic ta Derbe.

²¹ C'alal la xcholbeic Lequil A'yej li cristianoetic te ta lume, ep boch'otic la xch'unic. Ts'acal ijelovic batel yan velta ta Listra, ta Iconio, xchi'uc ta Antioquía ta Pisidia banamil.

²² Ech' stsatsubtasbeic yo'nton li jch'unolajeletique. Laj yalbeic ti j'ech'eluc ac'o xch'unic oe. Xchi'uc laj yalbeic ti tsc'an ta jts'ictic vocol ti jech xu' chij'och yo' bu chventainvan li Diose.

²³ La st'ujic jcholc'opetic yu'unic ta jujun nail tsobobbail. Laj yictaic ixim; la sc'opanic Dios. Li boch'o la st'ujique laj yaq'uic ta sc'ob li Cajvaltic ti yich'ojic ta muq'ue.

Isutic ta Antioquía te ta Siria banamil li Pablo xchi'uc Bernabee

²⁴ Ixanovic ta scotol Pisidia banamil; ts'acal te ivulic ta Panfilia banamil.

²⁵ Te la xcholic sc'op Dios ta lum Perge; ts'acal to ibatic ta lum Atalía.

²⁶ Te i'ochic ta barco; isutic batel ta Antioquía yo' bu ic'opanbatic Dios ta stojolic, xchi'uc ti i'ac'atic ta sc'ob Dios c'alal lic stsaquic li abtel ti laj xa spasique.

²⁷ C'alal ic'otic ta Antioquiae, la stsobic scotol li jch'unolajeletique. Laj yalbe ya'yic scotol li c'usitic tsotsic i'ac'bat spasic yu'un Diose, xchi'uc ti c'u x'elan ijambat yo'ntonic ta xch'unel Cajvaltic li yanlumetic ti mu xotquinic Diose.

²⁸ Ep c'ac'al te icomic; te la xchi'inic li jch'unolajeletique.