Hebreos 6 - Bible in Tzotzil de Chenalhó with Deuterocanon

¹ Jech tsc'an ti mu ja'uc no'ox chcalilanbe jbatic ti c'u x'elan lij'albat sc'op Cristo ta sliquebe. Cac'tic persa ti ac'o ch'icutic lec batele. Mu me ja'uc no'ox xcalilanbe jbatic ti ac'o jsutes co'ntontic ta sventa li c'usi ch-ac'van ta ch'ayele, xchi'uc ti ac'o jch'untic Diose,

² xchi'uc li chanubtasel ta sventa ich' vo'e, ta sventa laj yac'butic sc'obic ta joltique, ta sventa cha'cuxesele, xchi'uc li chapanel sventa sbatel osile.

³ Me jech tsc'an Diose, ja' xa chacalboxuc batel li c'usi sventa chach'iic oe.

⁴ Yu'un li boch'otic i'ochic xa ta sac osile, ti laj xa yilic ti toj lec li matanal liquem tal ta vinajele, xchi'uc ti laj xa yich'ic li Ch'ul Espiritue,

⁵ ti laj xa ya'ibeic c'u x'elan smuil li sc'op Diose, xchi'uc ti laj xa yilbeic stsatsal svu'el li ventainel yu'un Dios ta to xtale,

⁶ me chlic yalicuc ta lume, mu xa xu' tsutic tal ta stojol Dios yan velta. Yu'un xco'laj xchi'uc chaq'uic ta joc'anel ta cruz yan velta li Xnich'on Diose, xchi'uc chaq'uic ta labanel noxtoc.

⁷ Nopo ava'yic c'u x'elan li banamile. Ti c'alal chaq'uilan vo'e, chuch'ilan. Jech lec chch'i li c'usitic chtun cu'untique, yu'un chich' li bendición chac' Diose.

⁸ Yan me ja' no'ox chch'i puru chopol ts'i'laletic xchi'uc puru ch'ixetique, mu'yuc stu li banamile, chopol ch-ilat o, jech tsta yorail ta xchic'at ta c'oc'.

Jbel sc'oplal chquich'tic li c'usi jmalaojtique

⁹ Ac'o me jech chacalboxuc quermanotac, vo'oxuc ti lec jc'anojoxuque, ta jch'un ti ta ono'ox xataic li c'usitic leque ti ja' sventa chacolic sbatel osile.

¹⁰ Yu'un li Diose tuc' c'usi tspas. Mu xch'ay ta yo'nton ti lec avabtelique, ti chac'uxubinvanique, yu'un laj xa acoltaic li boch'otic voc'bilic yu'une, xchi'uc ti jech avo'nton chapasic o batele.

¹¹ Ta jc'ancutic jech ac'o avaq'uic o ta ilel c'alal to ta slajeb ti tsots sc'oplal ta avo'ntonique, yu'un jech chc'ot ta pasel chataic li c'usi amalaojique.

¹² Ja' mu jc'ancutic ti chach'ajubic ta spasel li c'usitic leque. Ja' tsc'an chachanbeic yo'nton li boch'otic ta sventa xch'unojel yo'ntonic, ta sventa smuc'ul yo'ntonic chich'ic li c'usi sc'oplal ono'ox ch-ac'batique.

¹³ Yu'un c'alal laj yal Dios ti oy c'usi chac'be li Abrahame, mu'yuc boch'o yan la st'abbe sbi, yu'un mu'yuc boch'o yan ech'em smuc'ul; stuc la sva'an sba ta testigo.

¹⁴ Jech laj yalbe: “Ta melel ta xcac'bot ep bendición, xchi'uc ta jboles ep amomnich'nab”, xut.

¹⁵ Jech jun yo'nton la smala li c'usi i'albate, jech laj ono'ox sta li c'usi sc'oplal chich'e.

¹⁶ Yu'un c'alal oy c'usi chalic ta jamal li cristianoetic li' ta banamile, ja' tst'abbeic sbi li boch'o oy svu'ele, yu'un jech chvinaj ti ja' melel c'usi chalique, jech chich'ic ch'unbel o.

¹⁷ Ja' no'ox jech ec li Diose solel laj yac' lec ta ilel ti jbel sc'oplal chac' li c'usi yaloj ono'ox chac'be li boch'otic sc'oplal chac'bee. Jech lic yal ta jamal ta sventa sbi stuc noxtoc, yu'un jech chvinaj ti mu xlaj sc'oplal oe.

¹⁸ Jech oy chib c'usi mu xlaj sc'oplal laj yal li Diose, ja' svinajeb ti persa chc'ot ta pasel, ti mu ja'uc no'ox ch-epalc'opoje. Jech chpat lec co'ntontic, tstsatsub lec co'ntontic yu'un, vu'utic ti jch'unojtic, ti jpatoj xa co'ntontic ta jtatic li c'usi ta jmalatique.

¹⁹ Jech jun no'ox co'ntontic, lec nacal co'ntontic jech chac c'u cha'al anclataq'uin ti lec pajal yalel ta chac nab c'u cha'al mu xnic ta ic' li barcoe. Li xch'unojel co'ntontic sventa c'usi ta jmalatique c'otem c'alal to ta bats'i lequil ch'ul cuarto ta spat li velo

²⁰ yo' bu i'och batel ta c'opojel cu'untic li Jesuse, yu'un ba'yuc ijelov batel cu'untic. Ja' banquilal pale ic'ot cu'untic ta stojol Dios; ja' jech yabtel laj yich' jech chac c'u cha'al yabtel li Melquisedeque.