Hebreos 2 - Bible in Tzotzil de Chenalhó with Deuterocanon

Toj muc' li coltael la jtatique

¹ Ja' yu'un tsots sc'oplal tsc'an ta jnaban jbatic o ta stojol li c'usi ca'yojtic xae, yu'un jech mu xijch'ay comel ta be.

² Yu'un li c'usi laj yalic j'almantaletic ta vo'onee, tsots sc'oplal, mu stac' paych'unel. Li boch'otic la sbajique ti muc xich'ic ta muq'ue, ja' jech i'ac'bat stojic ti c'u x'elan tsc'ane.

³ ¿Me vu'utic xa chijcol ec me mu xquich'tic ta muc' li muc'ta coltael jtaojtique? Yu'un li coltaele ja' laj yal stuc ba'yuc li Cajvaltique, jech la xcholbutic lec ca'itic ec li boch'otic laj ya'yique.

⁴ Li Diose laj yac' lec ta ilel ti ja' melel li c'usi la xcholique, jech la yac'be spasic ep ta jchop sq'uelubiltac stsatsal. Xchi'uc laj yac'be sbijil jujunic ta sventa Ch'ul Espíritu jech chac c'u cha'al la sc'an stuque.

Ja' yajval coltael stuc li Jesuse

⁵ Li Diose mu ja'uc j'almantaletic chac'be sventain li banamil ta to xtale, ti li' chcalbetic sc'oplale.

⁶ Oy boch'o jech laj yal: “¿C'usi stu li cristianoetic ti tsta ta na'ele? ¿C'usi xu' yu'un li cristiano ti tsots sc'oplal cha'ye?

⁷ Yu'un jutuc xa no'ox biq'uit laj acomtsan jech chac c'u cha'al li j'almantaletique. Laj avac'be yabtel, laj avac' ti ich'bilic ta muq'ue. Laj avac'be sventain scotol li c'usitic apasoje.

⁸ Laj avac'be spas ta mantal scotol”, xi ts'ibabil. Chal ti laj yac'be sventain scotole, jech mu'yuc c'usi ti mu'yuc xac'be sventaine. Pero li' ta orae mu xquiltic ti ac'bil sventain scotol li c'usitic oye.

⁹ Pero chquiltic xa ti oy yabtel, ti ich'bil ta muc' li Jesús ti ja' biq'uit icom jayibuc c'ac'al jech chac c'u cha'al li j'almantaletique. Ti jech i'ich'at ta muq'ue, ja' ta sventa ti laj yich' vocol c'alal ichame. Ta sventa ti laj ya'ay c'u x'elan milele, ja' sventa slequilal scotol, yu'un toj ep slequil yo'nton li Diose.

¹⁰ Li Dios ti ja' la spas, xchi'uc ti ja' ta sventa i'ayin scotol li c'usitic oye, oy ta yo'nton chic' batel ta slequilal ep xnich'nab. Ja' yu'un jech la sc'an ti ac'o yich' vocol li Xnich'one, yu'un jech ic'ot ta pasel ti ja' yajval scoltaelic ic'ote.

¹¹ Li boch'o tslecubtasvan batele xchi'uc li boch'otic chich'ic lecubtasele, xchi'il sbaic ta voq'uel chc'otic o scotolic. Jech mu xq'uexov ti chal: “Ja' jchi'iltac ta voq'uel”, xie.

¹² Yu'un jech ts'ibabil: “Ta to xcalbe ya'yic ac'oplal li jchi'iltac ta voq'uele; ta to jq'uejinta alequilal ti bu tstsob sbaique”, xi.

¹³ Jech laj yal noxtoc: “Li vu'une ja' jpatoj o co'nton ta stojol li Diose”, xi. Jech laj yal noxtoc: “Li' oyun xchi'uc li jchi'iltac yac'ojbun jventain Diose”, xi.

¹⁴ Jech chac c'u cha'al oy xch'ich'al, oy sbec'tal li xnich'nabtaque, ja' no'ox jech ic'ot ec li stuque. Ja' yu'un c'alal ichame, la slajesbe o stsatsal li boch'o sventainoj lajele, ja' li pucuje.

¹⁵ Jech la scolta li boch'otic puru xi'el cha'yic o ta sventa li lajele.

¹⁶ Muc ja'uc la scolta li j'almantaletique. Ja' la scoltabe li smomnich'nab Abrahame.

¹⁷ Ja' yu'un persa la sco'lajes sba jech chac c'u cha'al li xchi'iltac ta voq'uele, yu'un jech ja' jc'uxubinvanej, ja' tuq'uil Banquilal Pale ic'ot yu'unic ta stojol Dios, jech xu' tstaic perdón yu'un smulic li steclumale.

¹⁸ Ta sventa ti laj ya'ay lec ta sbec'tal stuc li prevae, jech xu' yu'un tscolta ta sventa svu'el li boch'otic jech chtal preva ta stojolic eq'ue.