Hageo 2 - Bible in Tzotzil de Chenalhó with Deuterocanon

Toj jun yutsil la spasic li ach' ch'ulnae

¹ Ta jun xcha'vinic c'ac'al (21) yochel svucubal u, ital c'opanatuc yan velta yu'un Muc'ul Dios li j'alc'op Hageoe. Jech i'albat:

² Bat c'opano li ajvalil Zorobabele, xchi'uc li banquilal pale Josuee, xchi'uc li scomelal jteclume, jech xavalbe:

³ “Li boch'o yiloj avu'unic laj yich' pasel li ch'ulna to'oxe, bats'i toj c'upil sba. ¿C'u x'elan chavilic li' ta orae? ¿Me mu solel mu'yucuc xa stu chavilic?

⁴ Ajvalil Zorobabel, tsotsan me. Banquilal pale Josué, oyuc lec stsatsal avo'nton. Jteclum, aq'uic me persa. Abtejanic, vu'un li' chajchi'inoxuc”, xi li Muc'ul Dios ti tspas ta mantal scotol te ta vinajele.

⁵ “Jech chac c'u cha'al laj ono'ox calboxuc c'alal laloq'uic tal ta Egiptoe, ja' jech li' oy o ta atojolic li jtsatsale; mu me xaxi'ic.

⁶ Yu'un jutuc xa sc'an ta jniques li vinajel banamile, xchi'uc li nabetique.

⁷ Xchi'uc ta jniques ta scotol li jujun banamile, jech ta xlic yich'bicun tal sc'ulejalic, jech ta sta ep slequilal yutsilal li jch'ulnae”, xi. Jech chal noxtoc li Muc'ul Dios ti tspas ta mantal scotol te ta vinajele:

⁸ “Ja' cu'un li c'anal taq'uin xchi'uc li saquil taq'uine.

⁹ Li ch'ulna chich' pasel xchibal veltae ja' xjelov to yutsil jech chac c'u cha'al li ch'ulna ta ba'yuque. Jech jun avo'ntonic o li' ta banamil”, xi li Muc'ul Dios ti tspas ta mantal scotol te ta vinajele.

Laj yich'ic utel ta scoj ti mu junuc yo'ntonic li israeletique

¹⁰ Ta chanib xcha'vinic c'ac'al (24) yochel sbalunebal u ta xchibal jabil yochel ta ajvalilal li Darioe, ital c'opanatuc yan velta yu'un Muc'ul Dios li j'alc'op Hageoe, jech i'albat:

¹¹ “Vu'un li Muc'ul Diosune jech chacalbot: Bat jac'bo paleetic c'usi chal li mantaletic cu'une”, x'utat.

¹² Jech bat sjac'be: —Me oy boch'o ta xchup batel ta yoc sc'u' ts'u'iltasbil ti'bole, me ch-ech' t'ixuc sc'u' ta pan, ta chenec', ta ya'lel ts'usub, ta aceite, o ta c'usiuc no'ox ve'lilale, ¿me ts'u'iltasbil chcom o li ve'liletic le'e? —xut. —Mo'oj —xiic li paleetique.

¹³ Jech la sjac' noxtoc li Hageoe: —Me oy jun boch'o soquem ta scoj ti la spic jun animae, me chbat spic li ve'liletic le'e, ¿me soquem chcom o li ve'liletique? —xut. —Soquem chcom o —xiic li paleetique.

¹⁴ Itac'ov li Hageoe: “Jech chal li Muc'ul Diose: ‘Ja' jechic ta jtojol li jun lum cristianoetic li'i. Jech noxtoc li c'usitic tspasic xchi'uc li c'usitic chaq'uique, mu'yuc lec chquil o.

¹⁵ Ja' yu'un li vo'oxuque nopic me lec c'u x'elan avo'ntonic li' ta orae xchi'uc le' to batele, yu'un yo'to muc chaliquesic spasel li ch'ulna cu'un, vu'un li Muc'ul Diosune.

¹⁶ ¿C'u x'elan ic'ot avo'nton ava'yic ti c'alal jech ic'ot ta pasele?: Li boch'o bat sq'uel strigo ti snopoj chloc' jtob (20) anmul yu'une ja' to laj yil ti lajuneb (10) no'ox anmul la stae. Li boch'o ibat ta spits'ubil ya'lel sts'usub ti snopoj chloc' lajuneb yoxvinic (50) q'uib yu'une ja' to laj yil ti jtob (20) q'uib no'ox iloc' yu'une.

¹⁷ Le'e, vu'un laj cac'be tal xchamel; vu'un laj cac' lajuc ta bot li avocol alubelique, pero muc ono'ox xasutic o tal ta jtojol’, xi li Muc'ul Diose.

¹⁸ ‘Li' ta orae nopo lec ava'yic c'u x'elan li avo'ntonique. Li c'ac'al li'i ja' chanib xcha'vinic c'ac'al (24) yochel li sbalunebal ue, laj xa aliquesic yac'bel snacleb li ch'ulna cu'une.

¹⁹ Q'uelo me lec avilic, li' tana xchi'uc le' to batele mu'yuc chavilic chc'ot ta pasel ti jeche' pojol li snail atrigoique. Ac'o me mu'yuc to chac' sat li ts'usubtic, li higotic, li caranatoetic avu'unique, xchi'uc ac'o me mu'yuc to chnichin li olivatique, pero ta xlic xa cac'boxuc bendición’, xi li Diose”, xi li Hageoe.

Li Muc'ul Diose oy c'usi laj yal ta jamal ta stojol Zorobabel

²⁰ Te no'ox ta sc'ac'alil laj yich' c'opanel yan velta yu'un Muc'ul Dios li j'alc'op Hageoe, jech i'albat:

²¹ “Bat c'opano li Zorobabel ajvalil ta Judae, jech xavalbe: ‘Ta jniques li vinajel xchi'uc banamile.

²² Ta jlajesbe stsatsal li ajvaliletic ta banamile; ta jbutq'uinbe li xchotlebique. Ta jlilinbe li scaretaique xchi'uc li boch'otic te chcajiique. Ta xchamic scotol li ca'etic yu'unique xchi'uc li yajsoldadoic cajajtic ta ca' chanovique. Ta yespada xa no'ox xchi'ilic ta smil sbaic.

²³ Ta sc'ac'alil le'e ta xquic'ot, ja' jech chacom jech chac c'u cha'al yixtolal jc'ob sventa sello, yu'un vo'ot cajtunelot, vu'un la jt'ujot, xi li Muc'ul Dios ti tspas ta mantal scotol te ta vinajele’, uto li Zorobabele”, x'utat li Hageoe.