Hageo 1 - Bible in Tzotzil de Chenalhó with Deuterocanon

Mantal sventa chich' cha'pasel xch'ulna Dios

¹ Ta sba c'ac'al yochel svaquibal u ta xchibal jabil yochel ta ajvalilal li Darioe, ja'o ic'opanat yu'un Muc'ul Dios li j'alc'op Hageoe, yu'un ac'o bat sc'opan li ajvalil Zorobabel ta Judá, xnich'on Salatiele, xchi'uc li banquilal pale Josué, xnich'on Josadaque, jech laj yalbe:

² Jech chal li Muc'ul Dios ti tspas ta mantal scotol te ta vinajele: “Li jteclum li'i jech chalic: ‘Mu to tsta yorail xu' chich' cha'pasel li ch'ulna yu'un Muc'ul Diose’, xiic”.

³ Ja' yu'un li Muc'ul Diose jech chc'opoj ta jventa vu'un li j'alc'op Hageoune:

⁴ “¿Me ja' no'ox vo'oxuc yorail xu' chanaqui ta anaic ti toj c'upilic sba pasbil ti c'alal ja' yoquel jinem o li jch'ulnae?

⁵ Vu'un li Muc'ul Diosun ti ta jpas ta mantal scotol te ta vinajele, jech chcal: Nopic me lec li c'usitic chapasique.

⁶ Ep chats'unubajic, pero mu'yuc ep c'usi chloc' avu'unic. Ac'o me ep chave'ic, pero mu xnoj ach'utic. Ac'o me chavuch'ic ep vo', pero mu xpaj taqui-o'nal chava'yic. Ac'o me lec alapoj ac'u'ic, pero mu'yuc q'uixin chava'yic. Li boch'o ta xchabutaje ta c'a'nuti' ta stic' li xchabutale.

⁷ Vu'un li Muc'ul Diosun ti ta jpas ta mantal scotol te ta vinajele, jech chcal noxtoc: Nopic lec li c'usi chapasique.

⁸ Batanic ta vitsetic, bat ich'ic tal te'etic; cha'va'anic li ch'ulna cu'une. Jech xcuxet no'ox co'nton ta jnain, jech te chi'ich'at ta muc'.

⁹ Ep c'usi chasa'ic, pero jutuc chataic. Li c'usitic chatsob ta anaique, vu'un ta xcac' cuchatuc batel ta ic'. ¿C'u yu'un ti ja' no'ox batem avo'ntonic spasel li ana atuquic, ti ja' te aq'uelojic vuq'uem o li jch'ulnae?, xichi vu'un li Muc'ul Diosun ti ta jpas ta mantal scotol te ta vinajele.

¹⁰ Ja' yu'un, mu'yuc ta xcac' tal vo' ta atojolic, xchi'uc mu'yuc chac' sat li c'usi chats'unic ta banamile.

¹¹ Vu'un laj cac' taluc li q'uepelaltic li' ta banamil, ta vitsetic, ta trigoaltic, ta ts'usubaltic, ta olivatic, xchi'uc ta scotol li c'usitic chch'i ta banamile, xchi'uc ta stojol cristianoetic, ta stojol chonbolometic, xchi'uc ta scotol li yabtel avoc ac'obique”, xi li Diose.

¹² Li Zorobabele, li banquilal pale Josuee, xchi'uc li scomelal israeletique ixi'ic ti c'alal laj ya'yic c'usi laj yal Muc'ul Dios ta sventa li j'alc'op Hageoe.

¹³ Ja' yu'un, li j'alc'op Hageo ti tacbil yu'un Muc'ul Diose ta smantal Dios jech laj yalbe li israeletique: “Jech chal li Muc'ul Diose: ‘Vu'un li' chajchi'inoxuc’, xi li Diose”, xut.

¹⁴ Li Muc'ul Diose lic stsatsubtasbe yo'nton li Zorobabel ajvalil ta Judae, xchi'uc li banquilal pale Josuee, xchi'uc scotol li israeletique. Jech bat xcha'va'anbeic li xch'ulna Muc'ul Dios yu'unique, ja' li Muc'ul Dios ti tspas ta mantal scotol te ta vinajele.

¹⁵ Ja' ta chanib xcha'vinic (24) c'ac'al yochel svaquibal u ta xchibal jabil yochel ta ajvalilal li Darioe.