Habacuc 2 - Bible in Tzotzil de Chenalhó with Deuterocanon

Li Muc'ul Diose la stac'be sc'op li Habacuque

¹ Li' oyun o ta cavil, va'alun o ta jluchleb ta toyol, ta jmala o c'usi chiyalbun li Diose; ta jmala me chistac'bun li ca'yeje.

² Li Muc'ul Diose la stac'bun, jech laj yalbun: “Ts'ibao lec ta pech'pech' ton li c'usi ta xcac'bot avile, yu'un jech xu' tsq'uel ta anil li boch'o chile.

³ Ac'o me chjalij to li c'usi laj cac'bot avile, pero ta ono'ox xc'ot ta pasel, mu xa xjalij. Muc epalc'opuc. Ac'o me jal ta malael, malo me; yu'un mu alticuc no'ox, ta xc'ot ono'ox ta pasel.

⁴ A'yo ava'ay, li boch'o chopol yo'nton ta jtojole ja' no'ox ta stoy sba; yan li boch'o tuc' yo'nton chquile ja' chcuxi, yu'un jun yo'nton xch'unoj”, xi.

⁵ Li c'ulejalile chlo'lavan ta mucul; mu xpaj yo'ntonic o ta sa'el, mu'yuc spajeb ta c'upinel. Solel xjach'oj ye ya'yel jech chac c'u cha'al muquinaltic; mu xnoj o xch'ut jech chac c'u cha'al chamel lajel. Jech sujoj sba o ta spojel yantic banamil; yochel yu'uninel ep lumetic.

⁶ Scotol li jpojbanamiletique ta xlic lo'il ta sventaic, ta xlic labanaticuc, jech ta x'albatic: “Ay, toj abul sba li boch'o laj yepajes c'usitic oy yu'un, ti mu ja'uc yu'un stuque. ¿Baq'uin to chlaj yo'nton ta stsobel sc'ulejal ti mu ja'uc yu'une?”, xiic.

⁷ Ta anil no'ox xu' ta xliquic tal li boch'otic oy avil yu'une; ta xvic' tal satic, ta xtal yaq'uic avocol, jech cha'och o ta sc'obic.

⁸ Ta sventa ti laj apoj epal banamiletique jech ta xtal yan lum, chtal spojbot c'usitic oy avu'un ec. Ja' ta scoj ti laj amalbe xch'ich'al ep cristianoetique, ti laj avac' ep uts'intael ta banamil, ta lumetic, xchi'uc li boch'otic te nacajtique.

⁹ Toj abul sba li boch'o tsnojes sna ta yeleq'ue, ti chac' stas ta toyol ya'yel sventa tspoj sba o ta svocole.

¹⁰ Ta sventa ti jech la spase, laj yac' ta q'uexlal o li snae; la sa' slajel xchamel stuc ta sventa ti la spoj ep lumetique.

¹¹ C'alal ta stanaltac snacleb na ch-avanic sventa chich' contrainel, c'alal ta ste'eltac ta xc'opoj ta scontra.

¹² Toj abul sba li boch'o tsva'an jun lum ta sventa la smal ch'ich'e, ti tsliques jun lum ta sventa yeleq'ue.

¹³ Li Muc'ul Dios ti tspas ta mantal scotol te ta vinajele xu' chac' ti ja' no'ox sventa c'oc' chc'ot li yabtel jun lume, xchi'uc ti mu'yuc stu chc'ot li yabtel jujun banamile.

¹⁴ Ta xnoj ta scotol banamil li boch'o chotquinbeic slequilal yutsilal Muc'ul Diose jech chac c'u cha'al vo' ti smacoj scotol li banamil ta nabe.

¹⁵ Toj abul sba li boch'o chac'be pox yuch' xchi'ile. Toj abul sba li boch'o tsyacubtas xchi'il, ti chch'aybe yo'nton ta sventa tsc'an tsq'uel ti jeche' t'anale.

¹⁶ Ta xyal ta q'uexlal, ja' xq'uexol chc'ot ti ich'bil to'ox ta muq'ue; chlic ac'batuc yuch' ec, chlic q'uelatuc ec ti jeche' t'anale. Ja' stojol chc'ot ti chuch'be sbel li vaso te stsacoj ta sc'ob Muc'ul Diose; solel chc'ataj o ta c'a'ep li yich'el ta muq'ue.

¹⁷ Li uts'intael laj avac' te ta Libanoe chjoybij ta avac'ol atuc. Ta sventa ti laj amil chonbolometique, jech chlic sibtasicot. Ja' jech ta xc'ot ta pasel ta atojol ta sventa ti ep lamilvane, ti ep la'elc'aj te ta banamil xchi'uc ta lumetique, xchi'uc ti ep laj avuts'inta li jnaclumetic yu'une.

¹⁸ ¿C'usi stu li loc'om ti lec xa meltsajem yu'un li boch'o tspase? ¿C'usi stu li c'usi loc'tabil ta unijesbil taq'uin ti ja' no'ox chlo'lavane? Li sloc'obal diosetic ti mu xc'opojique ¿c'u yu'un ti ja' xa spatoj yo'ntonic yu'un li boch'otic tspasique?

¹⁹ Toj abul sba li boch'o jech chalbe li c'usi pasbil ta te'e, “Julovan”, ti xute, xchi'uc li boch'o jech chalbe jbej tone, “Lican”, ti xute. ¿Me xu' yu'un chchanubtasvan? Ac'o me lec xa pixbil ta c'anal taq'uin, ta saquil taq'uin, pero mu'yuc cuxul, mu'yuc xch'ulel.

²⁰ Yan li Muc'ul Diose te oy ta xch'ulna; ch'anxi lamal ta stojol sbejel li banamile.