Habacuc 1 - Bible in Tzotzil de Chenalhó with Deuterocanon

Ep ic'opoj ta stojol Dios Habacuc ta sventa ti mu'yuc lec c'usi chc'ot ta pasele

¹ Li j'alc'op Habacuque i'ac'bat yil yu'un Dios c'usitic chc'ot ta pasel.

² Muc'ul Dios ¿Baq'uin to chava'ibun jc'op ti li' xi'avet o ta atojol, ti yoquel mu xatac'bun oe? ¿Baq'uin to chacoltavan ti li' chic'opoj ta scoj ti oy ep uts'intaele?

³ ¿C'u yu'un ti chavac'bun quil puru vocole? ¿C'u yu'un ti lec no'ox chavil li puru uts'intaele? Yu'un li' xa setel ta jtojol li ilbajinele xchi'uc li lajel chamesele; ja' no'ox yochel ta epajel puru c'op xchi'uc pleito.

⁴ Mu'yuc xa ta ch'unel li mantaletique; mu xa ja'uc chich' pasel li c'usi tuc' ti sc'oplal chich' pasele. Li boch'o chopole ja' tscontrain li boch'o tuc' yo'ntone, ja' chich' soquesel o li c'usi tuq'ue.

Stac'ubil sc'op Habacuc, xchi'uc laj yich' albel ti chtal vocole

⁵ “Q'uelo lec avilic li yantic banamile, tuc'ulano lec avilic; xi'anic me, ch'ayel c'otuc avo'ntonic. Yu'un vu'un ta jpas jchop o abtel ta avorailic ti mu stac' ch'unel chava'yic c'alal me oy boch'o chayalboxuque.

⁶ A'yo ava'yic, yu'un ta xcac' liquicuc tal li caldeaetique, ja' li jun banamil ti bats'i ven simaronique, ti toj lec xu' yu'unic anile, ti mu vocoluc cha'yic chbatic ta scotol banamil sventa chbat spojbeic sna sc'uleb li yantic banamile.

⁷ Toj ven xi'bal sbaic, toj ven tsotsic, stuc xa no'ox tspasic mantal; tspas xa no'ox c'usi oy ta yo'ntonic.

⁸ Li ca'etic yu'unique xjelov to x'anilaj jech chac c'u cha'al jti'val bolometic, xchi'uc ja' xjelov simaronilic jech chac c'u cha'al oq'uiletic chanov ta ac'ubaltic. Li soldadoetic cajajtic ta ca'e ven ep ta jyalel; solel xvilic no'ox ta anil ta nom jech chac c'u cha'al xic ti xjublej no'ox yalel ta stsaquel sve'ele.

⁹ Scotolic chtalic sventa tstsac sve'elic; ba'yuc be chtal yu'unic li xi'elalique. Ta xiq'uic batel ep jchuqueletic jech chac c'u cha'al yi' ta ti'nab.

¹⁰ Ta slabanic li ajvaliletique, ta sna'leic li banquilaletique. Tse'ej no'ox sba chilic li tsatsal coraltonetique; ta xlic yac'an stec'ubic, jech ta x'ochic o batel.

¹¹ C'alal ta xjelovique, ja' jech chac c'u cha'al tsatsal ic'; ja' xa dios c'otem yu'unic li stsatsalique”, xi li Diose.

Chc'opoj ta stojol Dios yan velta li Habacuque

¹² Muc'ul Dios cu'un, Ch'ul Dios cu'un, vo'ot ti te ono'ox oyot ta sliquebale, vo'ot ti mu xana' xacham oe. Vo'ot li Muc'ul Diosote, li c'usi anopoj chapase ja' no'ox sventa chatuq'uibtasuncutic. Vo'ot ti xco'laj xchi'uc muc'ta ton c'otemot cu'une, ja' no'ox ta sventa chavac'bun jtoj li jmulcutique.

¹³ Li asate me jutuc mu sc'an xil li c'usi chopole, me jutuc mu sc'an sq'uel li j'uts'intavanejetique. ¿C'u yu'un te no'ox aq'ueloj avil li jsa'muliletique, xchi'uc te no'ox ch'anxachi ta stojol li boch'o chopolique, ti mu'yuc c'usi chaval c'alal tsmilic li boch'o mu'yuc chopol jech chac c'u cha'al chopol stuquique?

¹⁴ Li cristianoetique colem stuquic avu'un jech chac c'u cha'al choyetic ta nab, jech chac c'u cha'al quiletel chonetic ta banamil ti mu'yuc sventainelique.

¹⁵ Ja' yu'un li caldeaetique ep xa la xluchic loq'uel ta xluchubil jech chac c'u cha'al boch'o ta snit loq'uel choy ta yacuxail, jech chac c'u cha'al boch'o ta snit loq'uel ta nuti', ti toj xcuxet xa yo'nton c'alal ep xa busul yu'une.

¹⁶ Ja' yu'un li jtsacchoyetic le'e, chlic yich' ta muc' li snitubil choy yu'une xchi'uc li snuti'e; chlic smilbe smoton, xchi'uc chlic xchic'be pom, yu'un ja' ta sventa ti la sta ep sve'ele, ti ep c'usi te iloc' yu'une.

¹⁷ ¿Me ja' jech te tspasilan o batel li caldeaetique? ¿Me ja' jech tsyaquilanic o ta snuti'ic li choye? ¿Me jech te tsmililanic o batel li cristianoetic ti solel mu'yuc abul sba chilique?