Génesis 46 - Bible in Tzotzil de Chenalhó with Deuterocanon

Ic'ot ta Egipto li Jacobe

¹ Li Israele iloc' batel; laj yich' batel scotol li c'usitic oy yu'une. C'alal ic'ot ta Beersebae, te c'ot smilbe smoton li Dios yu'un stote, ja' li Isaaque.

² Te ta yac'ubalil ic'opanat ta xvayech yu'un Dios li Israele. Jech i'albat: —Jacob —x'utat. —Li' oyune —xi itac'ov li Jacobe.

³ Jech i'albat yu'un li Diose: —Vu'un Diosun, ja' li Dios yu'un atote. Mu me xaxi' ti chabat ta Egiptoe yu'un te chc'ot jboles ep amomnich'nab. Jun muc'ta lum ta xbat cu'un.

⁴ Li' ta orae vu'un ta jchi'inot batel ti c'alal chabat ta Egiptoe, xchi'uc vu'un ta xlic quic' sutel tal li amomnich'nabe. Jech noxtoc c'alal chachame, ja' te chasq'uelot li anich'on Josee —x'utat.

⁵ Jech iloc' batel ta Beerseba li Jacobe. Imuyesat ta careta yu'un li xnich'nabe. Xchi'uc la smuyesic ta careta scotol li xnich'nabique xchi'uc li yajnilique, yu'un li faraone stacoj batel careta sventa chcuchatic o batel.

⁶ Jech ibat ta Egipto xchi'uc scotol boch'otic oy yu'un li Jacobe, xchi'uc xvacaxtac, xchijtac, xchi'uc scotol li c'usitic yan oy ono'ox yu'un c'alal te oy ta Canaane.

⁷ Ibatic xchi'uc scotol li xnich'nabtaque, xchi'uc stsebetic, xchi'uc smomnich'nabtac.

⁸ Li israeletic ti ibatic ta Egiptoe, ja' li Jacob, xchi'uc xnich'nabtac, xchi'uc smomnich'nabtaque, ja' jech sbiic: Rubén, ja' li sba xnich'on Jacobe.

⁹ Li xnich'nabtac Rubene ja' Hanoc, Falú, Hezrón, xchi'uc Carmi.

¹⁰ Li xnich'nabtac Simeone ja' Jemuel, Jamín, Ohad, Jaquín, Zohar, xchi'uc Saúl, ja' li yol canaán antse.

¹¹ Li xnich'nabtac Levie ja' Gersón, Coat, xchi'uc Merari.

¹² Li xnich'nabtac Judae ja' Er, Onán, Sela, Fares, xchi'uc Zara. Li Er xchi'uc Onane te ichamic comel ta Canaán banamil. Li xnich'nabtac Farese ja' Herzón xchi'uc Hamul.

¹³ Li xnich'nabtac Isacare ja' Tola, Fúa, Job, xchi'uc Simrón.

¹⁴ Li xnich'nabtac Zabulone ja' Sered, Elón, xchi'uc Jahleel.

¹⁵ Scotol le'e ja' li xnich'nabtac Jacob ta yan yajnil, Lea sbie. Ja'o te ivoq'uic ti c'alal te oyic ta Padan-arame. Xchi'uc oy jun stseb noxtoc, Dina sbi. Ta scotolique oy oxlajuneb xcha'vinic (33) c'alal ta vinic antsetic.

¹⁶ Li xnich'nabtac Gade ja' Zifión, Hagui, Ezbón, Suni, Eri, Arodi, xchi'uc Areli.

¹⁷ Li xnich'nabtac Asere ja' Imna, Isúa, Isúi, Bería, xchi'uc jun stsebalic, Sera sbi. Li xnich'nab Beriae ja' Heber xchi'uc Malquiel.

¹⁸ Scotol le'e ja' xnich'nab Jacob noxtoc ta yan yajnil, Zilpa sbi. Li Zilpae ja' squiara ac'bil yu'un stot li Leae. Ja' oy vaclajunebic (16) ta scotolic.

¹⁹ Li yalabtac Raquele, ja' li yajnil Jacobe, ja' José xchi'uc Benjamín.

²⁰ Li xnich'nabtac José ti ivoc' te ta Egiptoe ja' Manasés xchi'uc Efraín. Ja' yol li Asenate, ja' li stseb jun pale te ta lum On, Potifera sbie.

²¹ Li xnich'nabtac Benjamine ja' Bela, Bequer, Asbel, Gera, Naamán, Ehi, Ros, Mupim, Hupim, xchi'uc Ard.

²² Scotol le'e ja' yalab xnich'nabic li Jacob xchi'uc Raquele. Ja' chanlajunebic (14) ta scotol.

²³ Li xnich'on Dane ja' Husim sbi.

²⁴ Li xnich'nabtac Neftalie ja' Jahzeel, Guni, Jezer, xchi'uc Silem.

²⁵ Le'e ja' xnich'nab Jacob ta yan yajnil, ja' li Bilha sbie. Ja' li squiara Raquel i'ac'bat yu'un stote. Ja' oy vucubic ta scotolic.

²⁶ Ti c'u yepal ibatic ta Egipto li Jacob xchi'uc yalab xnich'nab ti jun xch'ich'al xchi'uque, ja' vaquib xchanvinic (66) ta scotolic. Pero mu'yuc atabil li yajniltac xnich'nabe.

²⁷ Te oy noxtoc li chib xnich'nab José ti ivoq'uic ta Egiptoe. Jech oy lajuneb xchanvinic (70) ta scotolic c'alal ta yalab xnich'nab li Jacob ti te ic'ot naquiicuc ta Egiptoe.

²⁸ Li Jacobe la stac jelovel li Judae yu'un ac'o bat yalbe tal José ti ac'o bat snup ta Gosén li stote. Te ic'ot ta Gosén scotolic.

²⁹ Li Josee laj yac' ta chapanel scareta sventa chcaji batel, yu'un chbat snup ta Gosén li stote. C'alal ic'ot yo' bu oy li stote, c'ot xvoch' ta meyel. Jal laj yoc'ta sbaic.

³⁰ Li Israele jech lic yalbe li xnich'one, ja' li Josee: —Lec oy, laj xa quilot jtuc ti cuxulote, ja' yu'un li vu'une xu' xa chicham —xut.

³¹ Li Josee jech laj yalbe li sbanquiltaque xchi'uc li yantic boch'otic oy yu'unique: —Li' ta orae, chbat jc'opan li faraone. Chbat calbe ya'ay ti lavulic xa acotolic li' ta jtojol xchi'uc li jtotique, vo'oxuc ti laliquic tal ta Canaán banamile.

³² Chcalbe ya'ay noxtoc ti ja' avabtelic sts'unel chijetic xchi'uc vacaxetique, ja' yu'un laj aviq'uic tal scotol.

³³ C'alal chayic'oxuc li faraone, me chasjac'boxuc c'usi avabtelique,

³⁴ albeic ti ja' avabtelic o sts'unel chij xchi'uc atot ame'ic ta abic'talique. Me jech chavalbeique, xu' chayac'boxuc avich'ic li osil te ta Gosene. Yu'un li egiptoetique oy mantal yu'unic ti mu xu' co'ol chnaqui xchi'uquic li jchabichijetique —xut sbanquiltac li Josee.