Génesis 23 - Bible in Tzotzil de Chenalhó with Deuterocanon

Icham Sara xchi'uc imucat

¹ Li Sarae vucub svucvinic (127) jabil icuxi.

² Te icham ta Quiriat-arba, ja' li lum Hebrón te ta yosilal Canaane. Li Abrahame ep i'oc' ta sventa ti icham li Sarae; ep laj yat yo'nton.

³ Iloc' batel yo' bu telel sbec'tal li anima yajnile yu'un bat sc'opan li hetetic te nacalique.

⁴ Jech c'ot yalbe: —Ac'o me yanlum vinicun ti li' nacalun ta atojolique, chonbicun jutebuc osil sventa te chbat jmuc li cajnile —xut.

⁵ Li hetetique jech laj yalic:

⁶ —Avocoluc, banquilal, a'yo ava'ay li c'usi chacalbotcutique. Vo'ot ti li' oyot ta jtojolcutique, t'ujbilot yu'un li Diose. Xu' te chbat amuc avajnil ti bu toj lec li muquinaltic cu'uncutique. Mu'yuc boch'o junucal cu'uncutic xu' chasjalanbot li muquinaltique —xiic.

⁷ Li Abrahame iva'i. Te la snijan sba ta stojol li hetetique.

⁸ Jech laj yalbe: —Me ta melel chac'anic li' ta jmuc li cajnile, avocolicuc c'anbicun jutebuc yosil li Efrone, ja' li xnich'on Zohare.

⁹ Yu'un ac'o xchonbun li nailch'en ta Macpela te ta sti' avosilique. Xu' ta jtoj ti c'u yepal stojol tsc'ane, yu'un jech ja' jmuquinalcutic ta xc'ot o —xi.

¹⁰ Li Efrón liquem ta Hete te oy ec. C'alal jech laj ya'ye, tsots la sc'opan li Abrahame, yu'un ac'o ya'yic scotol li xchi'iltaque xchi'uc li boch'otic te chjelovic batel ta ti'coralton yu'un lume.

¹¹ —Banquilal, avocoluc mu c'usi xal avo'nton. Ta jq'uelanbot no'ox li cosile xchi'uc li nailch'en te oy ta cosile. Te muco li avajnile. Li' cha'ay ta xchiquinic cuts' calaltac ti ta melel chajq'uelanbote —xi.

¹² Li Abrahame la snijan sba yan velta ta stojol li jnaclumetic tee.

¹³ Te ta stojol scotolic jech laj yalbe li Efrone: —Avocoluc a'yo ava'ay li c'usi chacalbote. Avocoluc tsacbun stojol li avosile, jech jun co'nton xu' chbat jmuc li cajnile —xi.

¹⁴ Itac'ov li Efrone:

¹⁵ —A'yo ava'ay, banquil: Li stojol cosile ja' chanib ciento (400) ta sep saquil taq'uin. Ti jech yepale mu toyoluc stojol. Bat muco te li avajnile —xi.

¹⁶ Li Abrahame ichapaj yu'unic ta stoj ti c'u yepal laj yal Efrón ta stojol scotol li xchi'iltaque, ja' li hetetique. Te sq'uelojic sts'inlajet ta atael yu'unic li saquil taq'uine, yu'un jech chvinaj ti lec ts'acal la stoje.

^17-18 Ja' yu'un li yosil Efrón ta Macpela ti te xcom ta stuq'uil sloq'ueb c'ac'al yu'un Mamree, ja' yu'un ic'ot o li Abrahame. Te capal laj yich' li nailch'ene xchi'uc scotol li te'etic te oy ta yut osile. Ja' testigo icomic o li hetetique xchi'uc li boch'otic te ijelovic batel ta ti'coralton yu'un lume.

¹⁹ Li Abrahame te bat smuc ta nailch'en li Sarae. Li nailch'ene te xcom ta Macpela banamil ta stuq'uil sloq'ueb c'ac'al yu'un Mamre ti ja' Hebrón yan sbie, xchi'uc ti te oy ta yosilal Canaane.

²⁰ Ja' jech icom ta yu'un Abraham li osile xchi'uc li nailch'en ti chtun ta sventa muquinaltique, ja' ti ichonbat yu'un hetetique.