Génesis 22 - Bible in Tzotzil de Chenalhó with Deuterocanon

Li Abrahame ta ox smil ta smoton Dios li xnich'one

¹ C'alal i'ech' xa'ox jayibuc c'ac'ale, li Diose la sq'uelbe yo'nton me ta melel xch'unoj li Abrahame. Jech laj yalbe: —Abraham —xut. Itac'ov li Abrahame: —Li' oyune —xi.

² Li Diose jech laj yal: —Ic'o batel li Isaac ti c'ajumal jun anich'one, ti lec c'ux ta avo'ntone. Batan achi'uc ta yosilal Moria. C'alal te xa oyote, te xamilbun jmotonin ta jolvits ti bu ta xcac'bot avile —x'utat.

³ Ta yoc'omal sob ilic li Abrahame, la scajtsanbe syavarta sburo. La sa' batel si' sventa xchic'ubil li matanale. Ibat xchi'uc li Isaaque, ja' li xnich'one, xchi'uc chib smozo. Te ibat yo' bu albil yu'un Diose.

⁴ Ta yoxibal xa'ox c'ac'al xanovelic batel, li Abrahame la sq'uel batel ta nom li vitse.

⁵ Jech laj yalbe li smozotaque: —Li' xacomic xchi'uc li buroe. Yan li vu'un xchi'uc jquereme chijelovcutic batel yu'un chbat quich'cutic ta muc' li Diose. Ts'acal chisutcutic tal —xi.

⁶ Li Abrahame la stsac li si' sventa chchic'beic o smoton Diose. Laj yac'be xq'uech batel li Isaaque. Te laj yich' batel noxtoc xcuchilo xchi'uc sc'oc', jech ibatic xchibalic.

⁷ C'alal mu'yuc to'ox nat ixanovic batele, li Isaaque jech laj yalbe li stote: —Tati —xut. —¿C'usi chaval, jnich'on? —xi li Abrahame. —Q'uelavil, li' oy li jsi'tic xchi'uc jc'oc'tique, pero ¿bu oy li chij sventa ta jmilbetic smotonin Diose? —xut.

⁸ Itac'ov li Abrahame: —Dios chiyac'butic tana li chij sventa matanale, jnich'on —xut. Te to yochelic batel xanubal.

⁹ C'alal ic'otic yo' bu albil yu'un Diose, li Abrahame la spas jun scajleb smoton Dios. La slatsbe lec si'il. Ts'acal lic xchucbe yoc sc'ob li Isaaque; te la xmochan ta scajleb smoton Dios ta sba li si'e.

¹⁰ C'alal stsacoj xa'ox xcuchilo ta smil li xnich'one,

¹¹ ta ora ic'opoj tal ta vinajel yaj'almantal Muc'ul Dios. Jech i'albat: —Abraham, Abraham —x'utat. —Li' oyune —xi itac'ov li Abrahame.

¹² Jech laj yal li j'almantale: —Mu me c'usi xapasbe li quereme, yu'un jna'oj ti chavich' ta muc' li Diose, yu'un muc xajalan ti c'ajumal jun anich'on oye —x'utat.

¹³ Li Abrahame ijoyij, ja' to laj yil oy jcot chij te ts'otol xulub ta ch'ixtic. Jech te bat yic' tal; ja' la xchic' ta smoton Dios ta sventa xq'uexol li xnich'one.

¹⁴ Li Abrahame laj yac'be sbi li banamile: “Li Muc'ul Diose chac' li c'usi jtunel cu'untique”, xi sbi laj yac'be. Ja' yu'un yoquel to jech chich' albel sc'oplal: “Te ta vits chac' c'usi jtunel cu'untic li Muc'ul Diose”, xi ch-albat sc'oplal.

¹⁵ Li yaj'almantal Muc'ul Diose la sc'opan tal xchibal velta c'alal ta vinajel li Abrahame.

¹⁶ Jech laj yalbe: —Li Muc'ul Diose jech chayalbot: ‘Ta sventa ti muc xajalanbun li jun anich'on ti c'ajumal oy avu'une, jech ta jva'an jba ta testigo jtuc

¹⁷ ti ta melel ta xcac'bot ep bendicione. Ta xcac' boluc ep amomnich'nab jech chac c'u cha'al c'analetic ta vinajel, jech chac c'u cha'al yi'tic ta ti'nab. Li stuquique tsalbil ta xc'ot yu'un li yajcontraique.

¹⁸ Ja' ta sventaic chich' bendición scotol li muc'tic lumetic li' ta banamile, yu'un laj ach'un li c'usi laj calbote’, xayutot li Muc'ul Diose —xi li j'almantale.

¹⁹ Li Abrahame isut batel te yo' bu comenic li smozotaque. Jech jmoj xa isutic batel ta Beerseba; te inaqui o li Abrahame.

Sc'oplal xnich'nab Nacor

²⁰ C'alal i'ech' xa'ox jayibuc c'ac'ale, li Abrahame laj ya'ay a'yej ti oy xa yalab li Milcae, jech la sna' ti oy xa xnich'nab li yits'in Nacore.

²¹ Li sba xnich'one Uz sbi. Ts'acal ivoc' its'inal, Buz sbi. Ts'acal ivoc' Kemuel, ja' li stot Arame.

²² Ts'acal to ivoc' noxtoc Quesed, Hazo, Pildas, Jidlaf, xchi'uc Betuel.

²³ Li Betuele ja' stot li Rebecae. Li vaxquibic le'e ja' yalab li Milcae, xchi'uc ja' xnich'nab li Nacore, ja' li yits'in Abrahame.

²⁴ Jech noxtoc li Nacore oy xnich'nab ta yan ants yu'un, ja' li Reumae. Li yol xnich'onique ja' li'i: Teba, Gaham, Tahas, xchi'uc Maaca.