Génesis 19 - Bible in Tzotzil de Chenalhó with Deuterocanon

Li Diose la slajes lum Sodoma xchi'uc Gomorra

¹ C'alal ic'otic ta Sodoma li chib yaj'almantal Diose, yu'un xa'ox ch-ic'ub osil. Li Lote te chotol ta ti'coralton yu'un li lume, ja' te yo' bu stsobobbailic li cristianoetique. C'alal laj yil li Lote, ilic; bat snup ta be ta ora. La squejan spatan sba ta banamil.

² Jech laj yal: —Tata, avocolicuc ta jc'an te chbat vayanic jvoyuc ta jna. Xu' te xapoc avacanic. Ja' to sob oc'om xu' xabatic —xi. Itac'ovic: —Mo'oj, colavalbuncutic. Xu' li' no'ox chivaycutic ta xoral jvoyuque —xiic.

³ Pero li Lote mu xlaj yo'nton ta yiq'uel batel, jech te la xch'unic; ibatic ta sna li Lote. C'alal ic'otique, li Lote lic smeltsan lec ve'lil xchi'uc pan ti mu'yuc yich'oj svolesubil xch'ute, jech ive'ic li jvu'laletique.

⁴ C'alal mu'yuc to'ox chvayique, scotol li viniquetic ta Sodomae te ic'otic ta sna li Lote. C'alal ta ch'ium queremetic c'alal ta moletic italic; te vul set sbaic ta sna li Lote.

⁵ Laj yaptaic li Lote: —¿Bu oy li viniquetic li' ivulic ta ana ta ac'ubaltic naxe? Loq'uesano tal yu'un ta jc'an ta jchi'incutic ta vayel —xiic.

⁶ Ja' yu'un li Lote iloc' sc'opan li viniquetique. Te la sva'an sba ta sti' sna; la smac lec li snae.

⁷ Jech laj yalbe: —Avocolicuc viniquetic, mu me xapasic li c'usi toj chopol ta pasele.

⁸ Oy chib jtsebetic mu'yuc to yilojic vinic; ja' ta jloq'ues tal. Pasbeic li c'usi tsc'an avo'ntonique. Pero mu me c'usi chopol xapasbeic li viniquetic li' oyic ta jnae, yu'un ja' jvu'laletic cu'un —xi.

⁹ Pero li stuquique jech la staq'uic: —¡Q'uejo aba! Mu xu' chtal spasuncutic ta mantal yanlum vinic. Vo'ot me ech'em chopol c'usi chajpasbotcutic tana; ja' me mu'yuc c'usi chopol ta jpasbecutic tana li viniquetic te oy ta anae —xutic. La snet'ic batel li Lote; inopajic tal ta ti'na yu'un tsc'an tsvoq'uic ochel li ti'nae.

¹⁰ Pero li jvu'laletic yu'un Lote la sloq'ues sc'obic ta ti'na. La snitic ochel li Lote; la smaquic lec li ti'nae.

¹¹ Scotol li viniquetic te tsobolic ta ti'nae, ja' li queremetic xchi'uc li moletique, ipasic ta ma'sat yu'un li j'almantaletique; te ilubtsajic sa'ilanel li ti'nae.

¹² Li jvu'laletique jech laj yalbeic li Lote: —¿Me oy ep avuts' avalalic li'i? Ic'o loq'uel li aqueremetic atsebetique, xchi'uc li queremetic ti smacojic xa li atsebetique, xchi'uc scotol li c'usitic oy avu'un li' ta lume. Loq'ueso batel; nom to xbat avac'.

¹³ Yu'un ta jlajescutic xa li lum li'i, yu'un toj ep xa staoj smulic ta stojol Muc'ul Dios li cristianoetic li' ta lume. Ja' yu'un la stacuncutic tal li Muc'ul Diose, yu'un ta jlajescutic o li lum li'i —xiic.

¹⁴ Ja' yu'un li Lote bat sc'opan li queremetic ti smacojic xa li stsebetique. Jech laj yalbe: —¡Licanic, loc'cutic batel li' ta lume, yu'un li Muc'ul Diose ta xa slajes li lum li'i! —xut. Pero li stuquique muc xch'unic c'usi i'albatic yu'un li Lote; la scuyic ti ja' no'ox ta xlo'laatique.

¹⁵ Ta sventa ti yu'un ta xa tsacub tal osile, li j'almantaletique jech laj yalbeic li Lote: —¡Tsotsan, ac'bo yipal! Ic'o batel ta anil li avajnile xchi'uc li chib atsebetic ti me mu xac'an li' xachamic c'alal ta xcac'becutic stoj smulic li lum li'i —xutic.

¹⁶ Pero li Lote muc xac'beic yipal smeltsanel sbaic, jech te nitbil iloq'uic batel yu'un j'almantaletic xchi'uc yajnil xchi'uc li chib stsebetique, yu'un c'uxubinbilic yu'un li Muc'ul Diose. Ta ti'lum to ay ac'aticuc, yu'un jech mu me xchamic.

¹⁷ C'alal loq'uemic xa'ox batel ta lume, li jun j'almantale jech laj yalbe li Lote: —¡Batanic ta anil yu'un jech mu xachamic! Mu me xaq'uel sutel ava'lupatic. Mu me xapajic ta stenlejaltic. Batanic c'alal to ta vitsetic ta toyolaltic me chac'an to chacuxiique —x'utatic.

¹⁸ Li Lote jech laj yal: —Cajval, avocolicuc mu to me xapasic jech.

¹⁹ Li vo'oxuque ep lacoltaicun. Toj lec avo'ntonic, yu'un cuxulun to avu'unic. Li vits bu chavalique mu xa xic'otcutic yu'un naca me stauncutic ta be li stojol mulile, jech xu' te chichamcutic o.

²⁰ Oy jun biq'uit lum le' nopol no'oxe. Avac'uc ja' no'ox te chijatovcutic batel ta anile, yu'un jech mu xichamcutic. Li lum le'e ja' biq'uit no'ox ta melel —xi.

²¹ Jech i'albat yu'un li jun j'almantale: —Laj xa ca'ay li c'usi laj avale. Xu' ta jpas li c'usi laj ac'ane. Mu'yuc ta jlajes li lum bu laj avale.

²² Pero xanovan; batanic ta ora, yu'un mu to c'usi xu' ta jpas ti me mu'yuc to chac'otic tee —xi. Ja' yu'un li lume ja' Zoar ic'ot sbi.

²³ C'alal loq'uem xa'ox c'ac'ale, li Lot xchi'uc xnich'nabe ic'ot xa'ox ta Zoar.

²⁴ Li Muc'ul Diose laj yac' tal c'oc' xchi'uc azufre te ta lum Sodoma xchi'uc ta lum Gomorra. Ja' jech iyal tal jech chac c'u cha'al chac' vo'.

²⁵ Scotol li c'usitic cuxajtique te capal ilaj scotol. Jech noxtoc li c'usitic ch'iemic ta stenlejaltique i'ul scotol.

²⁶ Li yajnil Lot te nabal batel ta spate, la sq'uel sutel sva'lupat, jech te va'al icom o ta be; ic'ataj ta stanal ats'am.

²⁷ Li Abrahame sob ta yoc'omal ibat te yo' bu la sc'opan sbaic xchi'uc li Muc'ul Diose.

²⁸ La sq'uel batel li lum Sodoma xchi'uc Gomorra xchi'uc scotol stenlejaltique. Te laj yil ti puru ch'ayil te chloq'ue; xco'laj xchi'uc xch'ayilal jun muc'ta tocalte'.

²⁹ Ac'o me la slajes Dios li lumetic te ta stenlejaltic yo' bu to'ox nacal li Lote, pero muc xch'ay ta yo'nton c'usi yalojbe li Abrahame, jech c'alal ital li tsatsal tojol mulile la sloq'ues batel li Lote.

Sc'oplal c'u x'elan ilic sts'unubal moabetic xchi'uc amonetic

³⁰ Li Lote mu sc'an ti te chcom nacluc o ta Zoare yu'un ixi'. Jech te ibatic ta jun vits ta toyolaltic; te inaqui ta nailch'en xchi'uc li chib stsebetique.

³¹ Oy jun c'ac'al li vixile jech laj yalbe li smuque: —Li jtotique mol xa. Li' bu nacalutique mu'yuc viniquetic ti xu' ta jmalintique, yu'un jech jtaleltic ti tsc'an chijmalijutique.

³² Ja' lec cac'tic yacubuc li jtotique. Ts'acal jchi'intic ta vayel, yu'un jech ta x'ayin xnich'on cu'untic —xiic.

³³ Te no'ox ta yac'ubalil laj yac'beic yuch' pasem ya'lel ts'usub li stotique. Jech li vixile la xchi'in ta vayel li stote, pero li totile muc xa'ay imochi li stsebe, xchi'uc muc xa'ay ti c'alal itots batele.

³⁴ Ta yoc'omale jech laj yalbe smuc li vixile: —Samele vu'un la jchi'in ta vayel li jtotique. Li' ta ac'ubaltic tanae ta xcac'tic yacubuc noxtoc, vo'ot xa chachi'in ta vayel ec, yu'un jech jchibaltic oy xnich'on cu'untic —xut.

³⁵ C'alal i'ic'ub osile, laj yac'beic yuch' pasem ya'lel ts'usub noxtoc li stotique. Li muquile ja' xa la xchi'in ta vayel ec li stote. Li totile muc xa'ay noxtoc c'alal tal mochluc li stsebe, xchi'uc muc xa'ay ti c'alal itots batele.

³⁶ Jech lic xchi'in yolic ta sventa stotic li chib stsebetic Lote.

³⁷ Li vixile ivoc' jun squerem; Moab laj yac'be sbi. Ja' totil ic'ot yu'unic li moabetic li' ta orae.

³⁸ Li muquile ivoc' squerem ec; Ben-amí laj yac'be sbi. Ja' totil ic'ot yu'un li amonetic li' ta orae.