Génesis 17 - Bible in Tzotzil de Chenalhó with Deuterocanon

Li circuncisione ja' senyail c'usi chapanbil yu'un Dios

¹ C'alal yich'oj xa'ox balunlajuneb yo'vinic (99) jabil li Abrame, li Muc'ul Diose laj yac' sba ta ilel ta stojol yan velta. Jech laj yalbe: —Vu'un Diosun ti scotol xu' cu'une. Tuc'uc me avo'nton ta jtojol. Mu me c'usi chopol xapas.

² Oy jun c'usi li' ta jchapan ta atojol. Bats'i ep ta xcac' boluc amomnich'nab —x'utat.

³ Li Abrame la squejan spatan sba ta banamil ti c'alal chc'opanat yu'un Diose:

⁴ —Ja' jech li c'usi chapal chcom cu'un ta atojole: Vo'ot stotot ep ta chop cristianoetic chac'ot.

⁵ Jech muc xa ja'uc Abram abi. Li' ta orae ja' xa Abraham chc'ot abi, yu'un vo'ot stotot ep ta chop cristianoetic chac'ot cu'un.

⁶ Bats'i ep ta xcac' boluc amomnich'nab. Vo'ot ta aventa ta xlic ep muc'tic ajvaliletic xchi'uc muc'tic lumetic.

⁷ Li c'usi ta jchapan ta atojole te chcom o ta stojol scotol li amomnich'nabtac ti ta to xtalique, ja' ti vu'un Diosun o avu'une, xchi'uc vu'un Diosun yu'unic ec li amomnich'nabtaque.

⁸ Li vo'ot xchi'uc amomnich'nabtaque chacac'boxuc scotol li Canaán banamil te yo' bu nacalote. J'ech'el chavich'ic o comel. Jech noxtoc vu'un Diosun avu'unic o —x'utat.

⁹ Li Diose jech laj yalbe noxtoc li Abrahame: —Li vo'ote, c'otuc me ta pasel avu'un xchi'uc amomnich'nab li c'usi la jchapan ta atojole.

¹⁰ Li'i ja' li c'usi ta jchapan ta atojolic ti tsc'an ac'o xch'unic scotol ec li amomnich'nabtaque. Scotol ti jayib vinicoxuque tsots sc'oplal tsc'an chavich'ic circuncisión acotolic.

¹¹ Tsc'an chatuch'ic loq'uel snuculil sni' li ac'unilique yu'un ja' senyail chcom li c'usi la jchapantique.

¹² Li' tana xchi'uc le' to batele, scotol li bic'tal queremetic avu'unic ti vaxquib to c'ac'al svoq'uelique, ac'beic yich' circuncisión. Ja' no'ox jech ec li queremetic ti te voq'uem ta anaique, me xnich'nab amozoic ti manbil ta taq'uin avu'unique, xchi'uc boch'ouc no'ox yanlumal ti te achi'uquique, ac'o yich' circuncisión scotolic.

¹³ Jech c'u cha'al ta xich' li boch'otic te voq'uemic ta anae, ja' jech ac'o yich'ic ec li boch'otic manbilic ta taq'uin avu'une. Jech te chcom o senyail ta abec'talic jayib c'ac'al cuxuloxuc li c'usi chapanbil cu'une.

¹⁴ Yan li boch'o mu'yuc yich'oj circuncisione, ac'o yich' loq'uesel ta atojolic ta scoj ti mu xich' ta muc' li c'usi chapanbil cu'une —xut.

¹⁵ Li Diose jech laj yalbe noxtoc li Abrahame: —Li avajnile mu xa ja'uc Sarai chcom sbi. Li' ta orae ja' xa ta xlic sbiin Sara.

¹⁶ Ta xcac'be bendición, yu'un ta xlic xchi'in jun anich'on. Melel xcal ti chcac'be bendicione. Ja' me'il chc'ot yu'un ep ta chop cristianoetic. Li syal'alabtaque oy ta xlic ochicuc ta ajvalilal ta lumetic —xut.

¹⁷ Li Abrahame la squejan spatan sba ta banamil. Itse'in ti c'alal jech la snope: “¿Me xu' to ta xnich'naj jun vinic ti yich'oj xa vo'vinic (100) jabile? Xchi'uc ¿me xu' to ta x'alaj li Sara ti yich'oj xa lajuneb yo'vinic (90) jabile?”, xi la snop ta yo'nton.

¹⁸ Li Abrahame jech laj yalbe li Diose: —Toj lec ti ja'uc oy c'uxi xich' abendición li Ismaele —xi.

¹⁹ Li Diose jech la stac': —Li c'usi laj xa calbote ja' ti ta svoq'ues jun aquerem li avajnil Sarae. Ja' Isaac chavac'be sbi. Ja' ta sventa chcac' c'otuc ta pasel c'usi la jchapan ta atojol ti j'ech'el te chcom o ta stojol li smomnich'nabtaque.

²⁰ Ta sventa li Ismaele laj xa ca'ay li c'usi chac'anbee, jech ta xcac'be bendición ec. Ta xcac'be xnich'nab, xchi'uc ta xcac' boluc ep smomnich'nab. Li Ismaele ja' totil chc'ot yu'un lajchab (12) muc'tic banquilaletic, xchi'uc ja' ta sventa ta xlic jun muc'ta lum.

²¹ Pero li c'usi chapanbil cu'une ja' ta xcom ta sventa li Isaac ti jeche' c'alal jabil ta xvoc' yu'un Sara jech chac c'u cha'al li'i —xi.

²² C'alal laj yo'ntonic ta lo'il xchi'uc Abraham li Diose, isut batel.

²³ Li Abrahame ta ora no'ox lic yac'be yich' circuncisión li xnich'one, ja' li Ismaele. Jech noxtoc laj yac'be yich' circuncisión scotol li smozotac ti te voq'uemic ta snae xchi'uc li boch'otic manbilic ta taq'uin yu'une. Scotol li viniquetic ti te chtunic ta snae laj yich'ic circuncisión jech c'u cha'al i'albat yu'un Dios li Abrahame.

^24-25 Li Abrahame yich'oj xa'ox balunlajuneb yo'vinic (99) jabil ti c'alal la sliques yich'el li circuncisione. Yan li xnich'on Ismaele yich'oj xa'ox oxlajuneb (13) jabil ti c'alal laj yich' circuncisión ta sbec'tale.

²⁶ Li Abrahame ta jun no'ox sc'ac'alil laj yich'ic circuncisión ta sbec'talic xchi'uc li xnich'one, ja' li Ismaele,

²⁷ xchi'uc scotol li viniquetic te oyic ta snae, li smozotac te voq'uemic ta snae, xchi'uc ti boch'otic manbilic ti yan slumalique.