Génesis 14 - Bible in Tzotzil de Chenalhó with Deuterocanon

Li Abrame ay spoj tal li Lot c'alal chucbil ibat yu'un j'eleq'uetique

¹ Ta sc'ac'alil le'e, oy chanib ajvaliletic la spasic pleito xchi'uc yan vo'ob ajvaliletic. Li Quedorlaomer, ja' li banquilal ta chanib ajvalile, ja'o ochem ta ajvalilal te ta Elam. Ja'o ochem ta ajvalilal te ta Sinar li Amrafel sbie. Li Arioque ja'o ochem ta ajvalil te ta Elasar. Li Tidale ja'o ochem ta ajvalil te ta Goim.

² Li chanib ajvaliletic le'e ja' la spasic pleito xchi'uc li vo'ob ajvaliletic li'i: Berae, ajvalil ta Sodoma; Birsa, ajvalil ta Gomorra; Sinab, ajvalil ta Adma; Semeber, ajvalil ta Zeboim; xchi'uc ajvalil ta Bela, ja' li lum Zoar yan sbie.

³ Li vo'ob ajvaliletic le'e la stsob yajsoldadotaquic ta jun stenlejal ta Sidim yo' bu Nab Muerto sbie.

⁴ Oy xa'ox xlajchabal jabil pasbilic ta mantal yu'un li ajvalil Quedorlaomere. Pero ta yoxlajunebal jabile, li vo'ob ajvaliletique lic scoman tsaquic ta pleito li jun ajvalil Quedorlaomere.

⁵ Ta yan jabile, li ajvalil Quedorlaomere xchi'uc li yan ajvaliletic ti co'ol yo'ntonic xchi'uque ibatic ta yosilal Astarot Karnaim. Te la stsalic comel li refaetique. Ts'acal la stsalic noxtoc li zuzetic te ta Hame. Xchi'uc la stsalic noxtoc li emetique. Ja' te la stsalic comel ta Save-quiriataim.

⁶ Te ta vitsetic yu'un Seir la stsalic comel noxtoc li horetique. La snutsic batel c'alal to ta stenlejaltic Parán ta sts'el xocol banamil.

⁷ C'alal isut batel li Quedorlaomer xchi'uc xchi'iltaque, te ic'otic ta En-mispat, ja' li Cades yan sbie. Laj yulesic comel scotol li c'usitic la staic c'alal ijelovic batel ta yosilal amalequetique. Jech la spasbeic comel noxtoc li amorretic te nacalic ta Hazezon-tamare.

⁸ Ja' yu'un li ajvaliletic ta lum Sodoma, ta Gomorra, ta Adma, ta Zeboim, ta Belae, ibatic ta stenlejaltic Sidim.

⁹ Ja' bat stsaquic ta pleito li Quedorlaomere, li Tidale, li Amrafele, xchi'uc li Arioque, ja' li chanib ajvaliletic ta Elam, ta Goim, ta Sinar, ta Elasare. Ja' yu'un la scontrain sbaic chanib ajvaliletic xchi'uc vo'ob ajvaliletic.

¹⁰ Ta scotol li stenlejaltic Sidime oy ep vomlumetic te. Puru chapopote te oy; asfalto sbi. C'alal ijatovic batel ta anil ta pleito li ajvaliletic ta lum Sodoma xchi'uc ta Gomorrae, te ibalch'ujic ochel ta vomlumetic. Li yantic xchi'iltaquic ta ajvalilale ijatovic batel ta vitsetic.

¹¹ Li boch'otic itsalvanique laj yich'ic batel ve'liletic xchi'uc li c'usitic toyolic stojol oy yu'unic ta lum Sodoma xchi'uc ta lum Gomorrae. Jech iloq'uic batel.

¹² Li sjunich'on Abrame, ja' li Lote, te nacal ta Sodoma ec. Jech te chucbil ibat xchi'uc scotol li c'usitic oy yu'une.

¹³ Pero oy jun vinic icol to batel; ja' bat yalbe ya'ay ta ora Abram ja' li hebreo vinic te nacal ta toyolal tulantic yu'un Mamree, ja' li amorreo vinique. Li Mamree ja' xchi'iltac ta voq'uel li Escol xchi'uc li Anere. Li viniquetic le'e ja' co'ol tscolta sbaic ta pleito xchi'uc li Abrame.

¹⁴ C'alal laj ya'ay Abram ti ichucat xa batel li sjunich'one, la stsob li smozotac te voq'uemic ta snae. La xchapan lec batel. Ti c'u yepal la sta sbaique, ja' oxib ciento xchi'uc vaxaclajuneb (318). Jech iloq'uic batel; bat snutsic li ajvaliletique ic'otic c'alal to ta lum Dan.

¹⁵ Ta ac'ubaltic c'alal ja'o ch'ayem yo'ntonique, li Abram xchi'uc xchi'iltaque te lic stsaquic ta pleito li ajvaliletique. La snutsic batel c'alal to ta Hoba ta yac'ol lum Damasco ta norte.

¹⁶ La spojbeic sutel tal scotol c'usitic yelc'anojic batel li ajvaliletique. Li Abrame la scolta tal noxtoc li sjunich'on Lote, xchi'uc la stsobbeic tal scotol li c'usitic oy yu'une. Xchi'uc la scolta tal noxtoc li antsetique xchi'uc li yan viniquetique.

Li Abrame i'ac'bat bendición yu'un Melquisedec

¹⁷ C'alal isut batel ta stsalel li ajvalil Quedorlaomer xchi'uc li yan ajvaliletic ti co'ol yo'ntonic xchi'uque, li ajvalil ta lum Sodomae iloc' snup ta be te ta stenlejaltic Save li Abrame, ja' li Stenlejal yu'un Ajvalil sbie.

¹⁸ Jech noxtoc li Melquisedec, ja' li ajvalil ta lum Saleme, xchi'uc ti ja' pale yu'un Dios ta vinajele, la sloq'ues pan xchi'uc ya'lel ts'usub.

¹⁹ Laj yac'be bendición li Abrame, jech laj yalbe: “Ac'o yac'bot ep bendición li Dios te oy ta vinajele, ja' li yajval vinajel banamile.

²⁰ Ac'o ich'atuc ta muc' li Dios te oy ta vinajele; ja' ti laj yac'bot atsal li avajcontrae”, xut. Ja' yu'un li Abrame te laj yac'be Melquisedec jujun ta lajlajuneb li c'usitic la spoj sutel tale.

²¹ Li ajvalil ta lum Sodomae jech laj yalbe li Abrame: —Ja' no'ox ac'bun batel li jvinictaque. Yan li c'usitic yan laj apoj sutel tale, te ich'o comel —xut.

²² Li Abrame jech la stac': —Laj xa cal ta jamal ta stojol Muc'ul Dios ta vinajel, ja' li boch'o la spas li vinajel banamile,

²³ li c'usi ja' avu'une me jutuc mu'yuc ta xquich' comel. Me jlicuc no, me jlicuc yaq'uil xonobil, mu'yuc ta xquich' comel, yu'un jech mu xu' chlic aval ti vo'ot laj apasun ta jc'uleje.

²⁴ Me jutuc mu'yuc c'usi ta jc'an. Ja' no'ox te xa chlaj o li c'usitic la sve'ic jmozotaque. Jech noxtoc li boch'otic ay xchi'inicune, ja' li Anere, li Escole, xchi'uc li Mamree, xu' ta xich'ic comel jutuc —xut.