Génesis 11 - Bible in Tzotzil de Chenalhó with Deuterocanon

Sc'oplal toyol q'uelub osil ta Babel

¹ Li cristianoetic ta vo'one jun to'ox sc'opic scotolic.

² C'alal ibatic ta stuq'uil sloq'ueb c'ac'ale, te la staic jun stenlejaltic ta yosilal Sinar, jech te inaquiic o.

³ Oy jun c'ac'al jech laj yalbe sbaic: “Jpastic ep ladrillo; jchic'tic ta c'oc'”, xut sbaic. Jech te la stunesic ladrilloetic ta xq'uexol tonetic, xchi'uc la stunesic chapopote ta xq'uexol ach'el.

⁴ Ts'acal to jech laj yalbe sbaic noxtoc: “Jliquestic spasel jun muc'ta lum xchi'uc jun toyol q'uelub osil, ac'o c'otuc cu'untic c'alal to ta vinajel. Me jech ta jpastique, chpuc lec jc'oplaltic, jech ich'bil ta muc' chijc'ot. Jech mu persauc ta jpuc jbatic batel ta scotol banamil”, xut sbaic.

⁵ Li Muc'ul Diose iyal tal, yu'un tal sq'uel li lume xchi'uc li q'uelub osil tspasic li cristianoetique.

⁶ Li Muc'ul Diose jech la snop: “Ta scoj ti jun no'ox slumalic scotol li cristianoetique xchi'uc ti jun no'ox sc'opique, ja' yu'un la sliquesic li abtel yu'unique. Jech mu c'uxi xpaj o li c'usiuc no'ox snop tspasique.

⁷ Ja' lec yalcutic; bat jc'atajesbetic li sc'opique yu'un jech mu xa xa'ibe sba sc'opic”, xut sbaic.

⁸ Ja' yu'un li Muc'ul Diose la spuc batel ta scotol banamil li cristianoetique. Jech te iquechaj o spasel li slumalique.

⁹ Li slumalic bu la sliquesic spasele ja' Babel ic'ot sbi. Yu'un li Muc'ul Diose ja' te la sc'atajesbe sc'op scotol li cristianoetic ta banamile, xchi'uc ja' te lic spuc batel ta sbejel banamil.

Sc'oplal smomnich'nab Sem

¹⁰ Li'i ja' smomnich'nabtac Sem. C'alal chib xa'ox jabil sjelovel pulel ta vo'e, yich'oj xa'ox vo'vinic (100) jabil li Seme, ja'o ivoc' li xnich'on Arfaxad sbie.

¹¹ Li Seme icuxi to batel yan vo'ob ciento (500) jabil. Jech ivoc' to yan squeremetic xchi'uc stsebetic.

¹² Li Arfaxade yich'oj xa'ox vo'lajuneb xcha'vinic (35) jabil ti c'alal ivoc' xnich'on Sala sbie.

¹³ Li Arfaxade icuxi to batel yan chanib ciento xchi'uc oxib (403) jabil. Jech ivoc' to yan squeremetic xchi'uc stsebetic.

¹⁴ Li Salae yich'oj xa'ox lajuneb xcha'vinic (30) jabil ti c'alal ivoc' xnich'on Heber sbie.

¹⁵ Li Salae icuxi to batel yan chanib ciento xchi'uc oxib (403) jabil. Jech ivoc' to yan squeremetic xchi'uc stsebetic.

¹⁶ Li Hebere yich'oj xa'ox chanlajuneb xcha'vinic (34) jabil c'alal ivoc' li xnich'on Peleg sbie.

¹⁷ Li Hebere icuxi to batel yan chanib ciento xchi'uc lajuneb xcha'vinic (430) jabil. Jech ivoc' to yan squeremetic xchi'uc stsebetic.

¹⁸ Li Pelegue yich'oj xa'ox lajuneb xcha'vinic (30) jabil ti c'alal ivoc' xnich'on, Reu sbie.

¹⁹ Li Pelegue icuxi to batel yan chib ciento xchi'uc baluneb (209) jabil. Jech ivoc' to yan squeremetic xchi'uc stsebetic.

²⁰ Li Reue yich'oj xa'ox lajchab xcha'vinic (32) jabil ti c'alal ivoc' xnich'on, Serug sbie.

²¹ Li Reue icuxi to batel yan chib ciento xchi'uc vucub (207) jabil. Jech ivoc' to yan squeremetic xchi'uc stsebetic.

²² Li Serugue yich'oj xa'ox lajuneb xcha'vinic (30) jabil ti c'alal ivoc' li xnich'on, Nacor sbie.

²³ Li Serugue icuxi to batel yan chib ciento (200) jabil. Jech ivoc' to yan squeremetic xchi'uc stsebetic.

²⁴ Li Nacore yich'oj xa'ox baluneb xcha'vinic (29) jabil ti c'alal ivoc' li xnich'on, Taré sbie.

²⁵ Li Nacore icuxi to batel yan balunlajuneb svacvinic (119) jabil. Jech ivoc' to yan squeremetic xchi'uc stsebetic.

²⁶ Li Taree yich'oj xa'ox lajuneb xchanvinic (70) jabil ti c'alal ivoc'an li xnich'nabe, ja' Abram, Nacor, Harán sbiic.

Sc'oplal smomnich'nabtac Taré

²⁷ Li'i ja' smomnich'nabtac li Taree, ja' li stotic Abram, Nacor, xchi'uc Harane. Li Harane inich'naj, Lot sbi.

²⁸ Li Harane te icham ta Ur ta yosilal Caldea ti bu ivoq'ue yu'un ja' ba'yuc icham li stuque; ja' icom to yu'un li stote.

²⁹ Li Abrame laj yic' yajnil, Sarai sbi. Yan li Nacore ja' Milca sbi li yajnile, ja' stseb Harán; ja' xchi'il ta voq'uel li Iscae.

³⁰ Pero li Saraie mu sna' x'alaj.

³¹ Li Taree iloc' batel ta Ur te ta yosilal Caldea yu'un chbat nacluc ta Canaán banamil. Laj yic' batel li xnich'one, ja' li Abrame, xchi'uc li yalibe, ja' li Saraie, xchi'uc smomnich'on, ja' li Lote. Pero c'alal ic'otic ta lum Harane, te no'ox inaquiic o.

³² Li Taree te icham ta Harán; yich'oj xa'ox chib ciento xchi'uc vo'ob (205) jabil.