Gálatas 6 - Bible in Tzotzil de Chenalhó with Deuterocanon

Tsc'an talbat ta jcolta jbatic

¹ Quermanotac, me oy boch'o ich'ay ta bee, vo'oxuc ti ventainbil avo'ntonic yu'un Ch'ul Espiritue, bat coltaic ta smuc'ul avo'ntonic. Q'uelo me abaic jujunoxuc, yu'un xu' jech chtal preva ta atojolic ec.

² Tsc'an talbat chacolta abaic ta xcuchel li avocolique, yu'un jech chach'unbeic o smantal li Cristoe.

³ Yu'un li boch'o tsnop lec xu' yu'un, pero me mu meleluque, tslo'la sba stuc.

⁴ Ja' yu'un, jujunoxuc tsc'an chaq'uelic lec c'u x'elan avabtel atuquic. Jech xu' chanop ti lec xu' avu'unique; mu me ja'uc no'ox xaq'uelbe yabtel yan.

⁵ Yu'un jujunutic ja' cu'un jtuctic li c'usi ta jpastique.

⁶ Li boch'o ta xchanubtasat ta sc'op Diose, ac'o me yac'be scotol c'usitic chtun yu'un li jchanubtasvanej yu'une.

⁷ Mu me xalo'la abaic. Yu'un li Diose mu xu' chlabanat. Li c'usi tsts'un jujun cristianoe ja' chc'ot sc'aj.

⁸ Li boch'o ja' no'ox ta sts'un c'usi tsc'an sbec'tale, ja' chc'ot sc'ajbe sat li c'usi tsc'an sbec'tale, ja' li ch'ayele. Yan li boch'o ja' tsts'un c'usi tsc'an Ch'ul Espiritue, ja' chc'ot sc'ajbe sat li yabtel Ch'ul Espiritue, ja' li cuxlejal sbatel osile.

⁹ Ja' yu'un mu me xijlubtsajutic ta spasel li c'usitic leque. Yu'un tsta yorail chc'ot jc'ajbetic sat, me muc xchibaj co'ntontic ta spasele.

¹⁰ Ja' yu'un jpastic c'usi lec ta stojol scotol cristianoetic ti c'alal ja' yoraile. Pero ja' ech'em to tsc'an ta jpastic ta stojol li boch'o co'ol jch'unojtic Dios jchi'uctique.

Ja' tsots sc'oplal cha'ay Pablo ti icham ta cruz li Cristoe

¹¹ Q'uelavilic c'u to smuc'tiquil li jts'ib li'i, yu'un vu'un ta jc'ob jtuc la jts'ibaboxuc tal li juteb li'i.

¹² Li boch'otic tsujvanic ta yich'el circuncisione, ja' no'ox tsc'anic ti lec ch-ilatique, yu'un mu sc'an xich'ic uts'intael ta xcholel ti icham ta cruz li Cristoe.

¹³ Li boch'o tsots sc'oplal cha'yic circuncisione, mu yu'unuc ja' ch'unem xa yu'unic scotol li mantaletique. Ja' no'ox tsc'anic ti ac'o avich'ic circuncisión li vo'oxuque, yu'un jech ac'o lecuc sc'oplalic ta sventa li sbec'talique.

¹⁴ Pero li vu'une mu ja'uc tsots sc'oplal chca'ay ti ac'o ich'atcun ta muq'ue. Ja' tsots sc'oplal chca'ay ti ac'o ich'atuc ta muc' li Cajvaltic Jesucristo ti icham ta cruze. Yu'un ja' ta sventa ti chamen xa ic'ot ta jventa li c'usitic oy li' ta banamile, jech chamenun xa lic'ot ta sventa ec.

¹⁵ Yu'un ta stojol Cristoe, ma'uc tsots sc'oplal me quich'ojtic circuncisión, o me mu quich'ojticuc circuncisión. Ja' tsots sc'oplal ti ac'o ach'ubuc jtaleltique.

¹⁶ Scotol li boch'otic jech xch'unojic jech chac cha'al laj cale, ac'o junuc yo'ntonic o, xchi'uc ac'o c'uxubinaticuc o yu'un li Diose. Jech ac'o c'otuc ta stojol li boch'otic mero Israel chc'otic ta sventa Diose.

¹⁷ Slajeb xa chacalboxuc. Li' ta ora xchi'uc le' to batele mu xa me boch'o xac'bun jvocol avu'unic. Yu'un li vu'une quich'ojbe lec senyail ta jbec'tal ti vu'un yajtunelun Jesuse.

¹⁸ Quermanotac, te ac'o oyuc o ta atojolic li c'uxubinel yu'un Cajvaltic Jesucristoe. Jechuc.