Gálatas 5 - Bible in Tzotzil de Chenalhó with Deuterocanon

J'ech'el me ch'unic o ti colemoxuc xae

¹ Ja' yu'un j'ech'el me ch'unic o ti colemoxuc xae, yu'un laj xa scoltaoxuc li Cristoe. Mu me xatic' abaic ta mozoil yan velta yu'un li mantaletique.

² A'yo ava'yic, vu'un Pabloun ti jech chacalboxuc tale. Me chach'unic ti ja' tsots sc'oplal chavich'ic circuncisione, ja' mu'yuc stu chc'ot avu'unic c'usi la spas li Cristoe.

³ Chacalboxuc yan velta: Scotol li boch'o ja' tsots sc'oplal cha'ay chich' circuncisione, persa me ac'o xch'un scotol li mantaletique.

⁴ Ti jayiboxuc chanopic ti ta sventa mantaletic mu'yuc amul chayiloxuc Diose, ja' xa chavoc' abaic loq'uel ta stojol li Cristoe. Ja' xa chabajic o comel li coltael ta matanale.

⁵ Yu'un li vu'utique ta sventa yabtel Ch'ul Espíritu, ta sventa xch'unojel co'ntontic, jun co'nton jmalaojtic ti mu'yuc jmultic chijc'ot ta stojol Diose.

⁶ Yu'un ta stojol Cristoe, ma'uc tsots sc'oplal me quich'ojtic circuncisión, me muc quich'ojticuc circuncisión. Ja' tsots sc'oplal li xch'unojel co'ntontique, yu'un jech xu' cu'un chijc'anvanutic.

⁷ Ta sliquebe lec to'ox atamoj batel abeic. ¿Boch'o la smacoxuc ta be ti mu xa ja'uc chach'unic li c'usi melele?

⁸ Li maquel ta be laj ataique, muc ja'uc yabtel li Boch'o tsc'an chayic'oxuque.

⁹ Na'ic me ti jech chalic li cristianoetique: “Ac'o me jutuc no'ox chich' aq'uel li svolesubil xch'ut pane, tsvolesbe xch'ut scotol ti c'u yepal vots'bile”, xiic.

¹⁰ Pero li vu'une jch'unoj ta sventa Cajvaltic ti mu xc'ot ta pasel chajelic li c'usi laj ach'unique. Li boch'otic ja' no'ox tsc'an chayuts'intaoxuque ta ono'ox xbat stoj smulic, boch'ouc no'ox.

¹¹ Quermanotac, ti ja'uc to chcalbe sc'oplal circuncisión li vu'une, mu'yuc boch'o chiscontrainun ti jechuque. Jech noxtoc mu'yuc chopol cha'yic c'alal cha'ibeic sc'oplal cruz ti jechuque.

¹² Li boch'otic ja' no'ox tsc'an chasoquesboxuc avo'ntonique, toj lec ti oyuc c'uxi josbaticuc o loq'uel li c'usi yich'ojique.

¹³ Yu'un li vo'oxuque, quermanotac, la'ic'atic yu'un Dios, yu'un colem ac'o comanic o. Pero ta sventa ti colemoxuc xae, ma'uc yu'un xu' xa chapasic c'usiuc no'ox tsc'an li abec'talique. Ja' sventa ac'o acolta abaic, yu'un jech chac'anan abaic ta jujuntal.

¹⁴ Yu'un li smantaltac Diose ta jbel xa no'ox c'op xu' tstsac sba ta scotol jech chac li'i: “C'ano achi'il jech chac c'u cha'al c'ux ta avo'nton abec'tal atuc”, ti xie.

¹⁵ Pero me te no'ox ati'ti' abaic, at'ol-t'ol aba atuquique, bijanic me, yu'un atuquic no'ox chamil abaic.

Yabtel jbec'taltic xchi'uc yabtel Ch'ul Espíritu

¹⁶ Ja' yu'un chacalboxuc, ja' pasic c'usi tsc'an li Ch'ul Espiritue, yu'un jech mu ja'uc chaspasoxuc ta mantal li abec'talique.

¹⁷ Yu'un li c'usitic tsc'an jbec'taltique, scontra c'usi tsc'an li Ch'ul Espiritue. Jech ec li c'usi tsc'an Ch'ul Espiritue contra c'usi tsc'an li jbec'taltique. Jech te tscontrain sbaic o, ja' yu'un mu xu' avu'unic spasel li c'usi oy ta avo'nton chapasique.

¹⁸ Pero me ja' chastojobtasoxuc li Ch'ul Espiritue, mu'yucoxuc xa ta mozoil yu'un li mantaletique.

¹⁹ Li yabtel jbec'taltique lec stac' otquinel. Ja' jech chac li'i: mulivajel, spasel c'usitic toj chopol, spasel c'usitic c'upil cha'ay jbec'taltic,

²⁰ yich'el ta muc' c'usitic mu ja'uc Dios, ac'chamel, contrainvanej, liquesejc'op, ti'o'ntavanej, sbic'tal o'ntonal, tsalbail, voc'bail, sa'el c'usi lec ta ch'unel chca'itic,

²¹ xpich'etel o'ntonal, yacubel, spasel c'usiuc no'ox ta q'uinetic, xchi'uc scotol li c'usitic yan co'ol sba jech chac le'e. Ja' yu'un scotol li boch'otic jech tspasic chac le'e, chacalboxuc ava'yic jech chac c'u cha'al calojboxuc xa ono'oxe, le'e mu xu' chventainatic o yu'un li Diose.

²² Yan li yabtel Ch'ul Espiritue ja' jech chac li'i: ta jc'anan jbatic, xcuxet no'ox co'ntontic, jun no'ox co'nton jcotoltic, oy smuc'ul co'ntontic, lec no'ox chijc'opojutic, oy slequil co'ntontic, oy xch'unojel co'ntontic,

²³ mu jtoybauticuc, jna'tic spajesel jbatic. Li boch'o jech tspase mu'yuc smul ta sventa li mantaletique.

²⁴ Yu'un li boch'otic oyic xa ta stojol Cristo Jesuse, laj xa yaq'uic ta milel ta cruz li stalel sbec'talique, li c'usitic tsc'ane, xchi'uc li c'usitic nopen xa'ay spasele.

²⁵ Ja' yu'un me ja' xa cuxulutic ta sventa li Ch'ul Espiritue, ja' xa ta jpastic batel li c'usitic tsc'ane.

²⁶ Mu jtucuc xca'ay jbatic; mu jsa'betic slo'il yo'ntonic li yantique; mu x'it'ixaj co'ntontic yu'un yantic.