Filipenses 4 - Bible in Tzotzil de Chenalhó with Deuterocanon

J'ech'el me cuxetuc o avo'ntonic ta stojol li Cajvaltique

¹ Ja' yu'un quermanotac, vo'oxuc ti lec jc'anojoxuque, ti oyoxuc o ta co'ntone, vo'oxuc li xcuxeteloxuc co'ntone, vo'oxuc ti xco'laj xchi'uc jmoton c'otemoxuc chca'ye, j'ech'eluc me jun avo'ntonic o ta stojol li Cajvaltique, vo'oxuc ti lec jc'anojoxuque.

² Ta jc'anbe vocol noxtoc li chib antsetic, ja' li Evodia xchi'uc Sintiquee, co'oluc me yo'ntonic ta stojol li Cajvaltique. Co'oluc me c'usi tsnopic.

³ Ta jc'anbot vocol ec quermano, vo'ot li jchi'il jbatique ti co'ol jun co'ntontic chijtun yu'un Cajvaltique, avocoluc coltao me li antsetique, yu'un ja' co'ol la jts'iccutic vocol ta xcholel li Lequil A'yeje. Xchi'uc coltao me li Clementee xchi'uc li yantic jchi'iltac ta abtele. Le'e te xa ts'ibabil sbiic ta vun sventa cuxlejal sbatel osil.

⁴ J'ech'el me cuxetuc o avo'nton acotolic ta stojol li Cajvaltique. Chacalboxuc yan velta, cuxetuc o me avo'ntonic.

⁵ Ac'beic yil scotol cristianoetic ti oy xa slequil avo'ntonique, yu'un po'ot xa chtal li Cajvaltique.

⁶ Mu me c'usi xlo'ilaj avo'ntonic yu'un. Me oy c'usi sc'an avu'un chava'yique, c'anbeic Dios, vocoletanic ta stojol, xchi'uc tojbeic ta vocol.

⁷ Jech chaspasboxuc o ta jun avo'ntonic li Diose. Li jun o'ntonal chac' Diose ech'em to xjelov jech chac c'u cha'al ta jnop ta jc'antic li vu'utique, ja' chaxchabiboxuc avo'ntonic xchi'uc c'usitic chanopic ta sventa ti avich'ojic ta muc' li Cristo Jesuse.

Ja' tsc'an ja' no'ox xanopic jech chac li'i

⁸ Quermanotac, slajeb xa chacalboxuc tal: Ja' me xanopic scotol li c'usi melele, li c'usi oy stue, li c'usitic tuq'ue, li c'usitic leque, li c'usitic lec ilbile, xchi'uc scotol li c'usitic lec sc'oplale. Scotol li c'usitic leque, ti stac' pasele, ja' no'ox me xanopic o.

⁹ Scotol li c'usitic laj achanic, laj ataic, laj ava'yic, xchi'uc li c'usitic laj avilic ta jventae, ja' no'ox me xapasic o. Jech te chaxchi'inoxuc o li Dios ti chac' jun co'ntontique.

Xcuxet yo'nton Pablo ti icoltaat yu'un li jch'unolajeletic ta Filipose

¹⁰ Xcuxet no'ox co'nton ta stojol Cajvaltic ti laj ana'icun yan veltae. Jna'oj ti jech ono'ox avo'ntonique, ja' no'ox yu'un mu c'uxi xataicun.

¹¹ Mu yu'unuc abul jba ti jech chcale. Yu'un jchanoj xa ti xcuxet no'ox co'nton ti c'u xi'elane.

¹² Jna' c'usi ta jpas c'alal mu'yuc c'usi oy cu'un, xchi'uc c'alal oy ep c'usi oy cu'un. Jchanoj scotol c'usiuc chtal ta jtojol. Me lec noj jch'ut, me chivi'naj, me oy ep c'usi oy cu'un, o me toj abul jba, jna' c'usi chcut scotol.

¹³ Scotol xu' cu'un ta sventa Cristo, yu'un ja' chiyac'bun jtsatsal.

¹⁴ Pero lec ti laj acoltaicun ta sventa ti oy jvocole.

¹⁵ C'alal ay jliques spuquel sc'op Dios te ta avosilalic vo'oxuc li jch'unolajeloxuc te ta Filipose, lec xana'ic ti mu'yuc yan jch'unolajeletic laj yac'bicun c'usi itun cu'un c'alal liloc' batel te ta Macedonia banamile, ja' no'ox vo'oxuc atuquic laj acoltaicun.

¹⁶ Jech noxtoc c'alal te to'ox oyun ta lum Tesalonicae, laj atacbicun batel jun chib velta c'usitic itun cu'un.

¹⁷ Mu yu'unuc ta jc'an jmoton ti jech chcale. Ja' no'ox ta jc'an ac'o epajuc, ac'o jolinuc lec li ac'ulejalic bu nac'bile.

¹⁸ Li vu'une laj xa jta lec scotol, oy xa ep scomelal cu'un. Mu'yuc xa c'usi sc'an chca'ay. Laj xa quich' ti c'u yepal laj avac'beic tal li Epafroditoe; toj lec chil li Diose, ja' jun milbil matanal cha'ay ti oy lec smuile.

¹⁹ Li Dios cu'untique chayac'boxuc scotol c'usitic sc'an avu'unic ta sventa Cristo Jesús, jech chac c'u cha'al li yutsil sc'ulejal stuque.

²⁰ Jech ich'bil ta muc' ac'o c'otuc sbatel osil li Diose ja' li Jtotique. Jechuc.

Patub o'ntonal

²¹ Chabanuc xavalbe scotol li yu'untac Dios ta sventa Cristo Jesuse. Chabanuc la xayalboxuc tal li jch'unolajeletic li' jchi'inoje.

²² Chabanuc xayalboxuc tal scotol li yu'untac Dios li'i. Ja' toj tsots chayalboxuc tal chabanuc scotol li boch'otic te ch-abtejic ta sna ajvalil Cesare.

²³ Ac'o xc'uxubinoxuc o acotolic li Cajvaltic Jesucristoe.