Filipenses 3 - Bible in Tzotzil de Chenalhó with Deuterocanon

Tsc'an chcac'tic persa xch'unel c'alal to ta slajeb

¹ Quermanotac, oy to c'usi chacalboxuc tal: Cuxetuc me avo'ntonic o ta stojol li Cajvaltique. Mu'yuc vocol chca'ay ta jts'ibaboxuc tal yan velta li c'usi calojboxuc xa ono'oxe, yu'un jech chabijubic.

² Q'uelo me abaic ta sventa li colemal ts'i'etique, ja' li chopol jcholc'opetique ti ja' no'ox tsc'an chaxtuch'boxuc abec'talique.

³ Yu'un li vu'utique quich'ojtic xa li bats'i circuncisione, yu'un ta co'ntontic xa chquich'tic ta muc' Dios ta sventa li Ch'ul Espiritue. Jech toj jun xa co'nton chca'itic ta sventa li Cristo Jesuse, yu'un mu xa ja'uc jpatoj co'ntontic yu'un li senyail ta sba jbec'taltic no'oxe.

⁴ Li vu'une ech'em to xu' ta jpat co'nton yu'un ti jechuque, yu'un jpasoj scotol li c'usi sventa no'ox sba jbec'tale. Me oy boch'o ja' spatoj yo'nton yu'un li c'usi sventa no'ox sba sbec'tale, ac'o me sna' ti vu'un ech'em xu' ta jpat co'nton yu'une.

⁵ Yu'un ta xvaxquibal c'ac'al jvoq'uel laj quich' circuncisión. Vu'un mero sts'unubalun israel. Liquemun ta jchop yu'un Benjamín. Vu'un mero hebreoun, mero xnich'onun hebreo. Vu'un fariseoun, vu'uncutic ti bats'i tsots sc'oplal chca'icutic li smantal Diose.

⁶ Ta sventa ti bats'i tsots sc'oplal laj ca'ay li smantaltac Diose, jech laj cuts'intaan li jch'unolajeletic ta jujutsobe. Mu'yuc jmul o laj ca'ay, yu'un jch'unoj ti tuc' co'nton chiyilun Dios ta sventa li mantaletique.

⁷ Pero li c'usitic toj tsots to'ox sc'oplal laj ca'ye, mu'yuc stu ic'ot o cu'un ti c'alal la jch'un li Cristoe.

⁸ Ja' jech mu'yuc xa stu chquil o scotol c'usitic yan ta sventa ti laj xa quil ti ja' toj ech'em slequil c'alal laj cotquin li Cristo Jesuse, ja' li Cajvale. Ta sventa ti ja' xa jc'anoj o li Cristoe, jech la jip o comel scotol li c'usitic jch'unoj to'oxe. Ja' xa jech chquil jech chac c'u cha'al c'a'ep, yu'un jech ja' la jta li c'usi jtunel cu'une, ja' li Cristoe.

⁹ Xchi'uc jech jun chic'ot o jchi'uc. Muc xa ja'uc ta sventa mantaletic ti mu'yuc jmule, ja' xa ta sventa xch'unojel co'nton ta stojol li Cristoe. Yu'un ti c'u x'elan mu'yuc jmul chijyilutic Diose ja' ta sventa xch'unojel co'ntontic.

¹⁰ Jech ta jc'an chcotquin o batel li Cristoe, xchi'uc ta jc'an chcotquinbe svu'el li Dios ti la xcha'cuxes li Cristoe. Xchi'uc oy ta co'nton ti xu' chquich' vocol jech chac c'u cha'al laj yich' li Cristoe, xchi'uc ti xu' co'ol chicham jchi'uque.

¹¹ Yu'un jech xu' chicha'cuxi ec.

¹² Mu yu'unuc jtaoj xa scotol, mu yu'unuc mu'yuc xa c'usi sc'an cu'un. Pero chcac' persa ta jnuts batel, yu'un oy ta co'nton ta jta jech chac c'u cha'al la staun li Cristo Jesuse.

¹³ Quermanotac, li vu'une mu xu' chcal ti jtaoj xa scotole. Pero oy jun li c'usi ta jpase: Ja' ta jch'ay ta co'nton li c'usi icom xa ta jpate, ja' xa no'ox chcac' persa snutsel batel li c'usi mu'yuc to jtaoje.

¹⁴ Ta jc'an chic'ot c'alal ta slajeb yo' bu oy li jmoton ti sc'oplal chquich' ta sventa ti laj xa yic'un Dios ta sventa li Cristo Jesuse.

¹⁵ Ja' yu'un ti c'u quepaltic oy xa stsatsal co'ntontic ta stojol Diose, jechuc me co'ntontic jcotoltic. Me yan o c'usi oy ta avo'ntonique, Dios chayac'boxuc ana'ic.

¹⁶ Ja' ac'o jtamtic o batel, ja' ac'o jpastic o batel li c'usi jtaojtic xae.

¹⁷ Quermanotac, ja' chanbicun c'u x'elan co'nton. Q'uelo avilic c'u x'elan stalelic li boch'otic ja' xa xchanojbun co'ntoncutique.

¹⁸ Yu'un oy ep boch'otic mu'yuc stu cha'yic ti icham ta cruz li Cristoe. Ep xa ta velta calojboxuc, li' ta orae ta ya'lel jsat chacalboxuc tal yan velta.

¹⁹ Yu'un ja' stamojbeic o batel sbelal ch'ayel. Li sdiosic c'oteme ja' li c'usi tsc'an stuquique. Stuc no'ox xa'ay sbaic o yu'un li c'usitic toj q'uexlal sbae. Ja' no'ox tsnopic li c'usitic oy li' ta banamile.

²⁰ Yan li vu'utique ja' jlumaltic li vinajele. Ja' xa no'ox ta jmalatic chyal tal ta vinajel li Jcoltavanej cu'untique, ja' li Cajvaltic Jesucristoe.

²¹ Ja' chvul sc'atajesbutic ta ach' li jbec'taltic li' quich'ojtic ti toj abul sbae. Jech co'ol yutsil jbec'taltic chijc'ot jchi'uctic. Ja' jech tspas ta sventa li svu'el ti sventainoj o scotol c'usitic oye.