Filemón 1 - Bible in Tzotzil de Chenalhó with Deuterocanon

Patub o'ntonal

¹ Filemón, vo'ot ti lec jc'anojotcutique, ti co'ol yajtunelutic Diose, ta jc'opanotcutic tal xchi'uc li quermanotic Timoteoe, vu'un li Pabloun ti li' chuculun ta sventa Jesucristoe.

² Ta jc'opanoxuc tal achi'uc li jch'unolajel ants Apiae, xchi'uc li Arquipo ti co'ol chquich'tic vocol jchi'uctique, xchi'uc li jch'unolajeletic te tstsob sbaic ta anae.

³ Ac'o yac'boxuc bendición li Jtotic Diose xchi'uc li Cajvaltic Jesucristoe; ac'o spasboxuc ta jun avo'ntonic.

Lec chc'anvan, xchi'uc oy lec xch'unojel yo'nton li Filemone

⁴ Scotol ora ta jt'abot ta co'nton ti c'alal ta jc'opan Diose, ta jtojbe ta vocol li Dios cu'une.

⁵ Yu'un ca'yoj ac'oplal ti oy lec xch'unojel avo'nton ta stojol Cajvaltic Jesucristoe, xchi'uc ti lec ac'anoj scotol li boch'otic voc'bilic xa yu'un Diose.

⁶ Ta sventa ti oy xch'unojel avo'nton eq'ue, ta jc'anbe Dios ti ac'o avotquin lec scotol li c'usitic lec jtaojtic ta sventa ti jun oyutic xchi'uc Cristoe.

⁷ Quermano, toj xcuxet co'nton, xchi'uc lec ipat co'nton avu'un ti lec chac'anvane, yu'un vo'ot ta aventa ti itsatsub xa yo'ntonic ta stojol Dios li jch'unolajeletic ti voc'bilic xa yu'un Diose.

Li Pabloe la sc'anbe vocol Filemón ti ac'o yic' yan velta li smozo Onesimoe

⁸ Ac'o me xu' ta jpasot ta mantal ta sventa Cristo li c'usi xu' chapase,

⁹ pero ta sventa ti lec jc'anoj jbatique ja' yu'un ta jc'anbot vocol. Vu'un li Pabloun ti molun xae, ti li' tiq'uilun ta chuquel ta scoj li Jesucristoe,

¹⁰ ta jc'anbot vocol ta sventa li jnich'on Onésimo ti xco'laj xchi'uc li' laj cac' voc'uc ta yut chuquinabe.

¹¹ Le' olon tale, li Onesimoe ja' to'ox amozo ti mu xtun avu'une, pero li' ta orae lec ta xtun avu'un xchi'uc ta xtun cu'un ec.

¹² Jech ta jtacbot sutel tal li jnich'on ti toj c'ux ta co'ntone.

¹³ Ta jc'an ox ti li' chcom jchi'in oe, yu'un jech ja' aq'uexol chc'ot sventa li' chtun cu'un ti c'alal li' tiq'uilun ta chuquel ta sventa li Lequil A'yeje.

¹⁴ Pero mu jc'an jpas jech ti c'alal mu xca'ay c'usi chavale, yu'un jech mu ta sujeluc chavac'bun; ja' tsc'an ta yutsil avo'nton chavac'.

¹⁵ Ac'o me la svoc' sba ta atojol jayibuc no'ox c'ac'al li Onesimoe, pero itun ta sventa yu'un ac'o achi'in abaic sbatel osil.

¹⁶ Yu'un mu ja'uc xa no'ox mozo chc'ot avu'un; x'ech' to slequil chc'ot jech chac c'u cha'al mozo. Yu'un ja' xa quermanotic ti lec jc'anojtique. Li vu'une lec jc'anoj, pero li vo'ote ech'em to xu' chac'an; mu ja'uc no'ox ta sventa ti ja' cristianoe, ja' ta sventa noxtoc ti co'ol xa jch'unojtic Cristo jchi'uctique.

¹⁷ Ja' yu'un, me cuts' calal jbatic chava'ay ta sventa li Cajvaltique, ic'o me li amozoe jech chac c'u cha'al vu'un chavic'un chc'ot.

¹⁸ Me oy c'usi chopol la spasbote, o me oy yil avu'une, vu'un xac'anbun.

¹⁹ Vu'un Pabloun, ta jts'iba tal ta jc'ob jtuc ti vu'un ta jtojbot li yile, ac'o me mu jc'an xcalbot ti oy avil cu'un ta aventa atuc eq'ue.

²⁰ Quermano Filemón, ta melel ta jc'an ti ac'o acoltaun ta sventa li Cajvaltique; ac'bun xcuxetel co'nton ta sventa li Cristoe.

²¹ Jech ta jts'ibabot tal, yu'un ta jna' ti chach'une, xchi'uc ta jna' ti ech'em chach'un jech chac c'u cha'al chacalbot tale.

²² Jech noxtoc chapanbun ana sventa ta jch'amanbot, yu'un ta jnop ti ta to xac' chtal jq'ueloxuc li Diose, yu'un chac'opanbicun Dios ta jtojol.

Patub o'ntonal

²³ Chabanuc xayalbot li Epafrase, ja' ti li' xchi'inojun ta chuquinab ta scoj li Jesucristoe.

²⁴ Chabanuc xayalbot noxtoc li Marcose, li Aristarcoe, li Demase, xchi'uc li Lucase, ja' li jchi'iltac ta abtele.

²⁵ Ac'o xc'uxubinoxuc o li Cajvaltic Jesucristoe.