Ezequiel 9 - Bible in Tzotzil de Chenalhó with Deuterocanon

Li Ezequiele laj yil ta xch'ulel ti ichamic li boch'otic oy smulique

¹ Laj ca'ay oy boch'o tsots laj yaptaun ta jchiquin, jech laj yal: “Ivulic xa li boch'o tal yac'beic stoj smul li lume. Yich'anoj tal yabtejeb jujunic sventa chmilvanic”, xiyutun.

² Jech laj quil oy vaquib viniquetic ch-ochic tal ta ti'na ta cajal ta stuq'uil norte, yich'anoj tal yabtejeb jujunic. Oy jun te cacal tal ta o'lol yu'unic, slapoj tal c'u'il pasbil ta lino no. Te xch'icoj tal ta xchucbenal xch'ut jun yabtejeb sventa ts'ibajel. C'alal i'ochic tale, te vul sva'an sbaic ta stuq'uil scajleb smoton Dios ti pasbil ta broncee.

³ Li xojobal Dios yu'un Israele itoy muyel te ta yac'ol li chib sloc'obal querubine; te bat yac' sba ta ti'ch'ulna. Li Muc'ul Diose laj yic' li jun vinic ti pasbil ta lino no sc'u'e, xchi'uc ti yich'oj jun yabtejeb sventa ts'ibajele.

⁴ Jech laj yalbe: “Bat xano scotol li lum Jerusalene; ac'anbo senyail ta sti'baic scotol li boch'otic ch-oq'uic, chat yo'ntonic ta scoj li c'usi toj chopol chich' pasel li' ta Jerusalene”, xut.

⁵ Li yantique jech laj yalbe: “Nablanic batel ta spat ec li vo'oxuque, bat xanic scotol li lume. Milic scotol li boch'otic chataique; me jutuc mu me xac'uxubinic, mu me abuluc sba chavilic.

⁶ Milic li moletique, li queremetique, li tsebetique, li ololetique, xchi'uc li antsetique; me junuc mu me xacomtsanic. Te xaliquesic ta jch'ulna. Yan li boch'otic yich'ojbeic senyaile mu me xavac' ac'obic ta stojol”, xut. Jech la sliques yabtelic ta stojol li moletic te oyic ta ch'ulnae.

⁷ Ts'acal jech laj yalbe noxtoc: “Batanic, bat soquesic o ta jyalel li ch'ulna cu'une; nojesic ta animaetic li yamaq'uile”, xut. Jech iloq'uic batel, bat smilic scotol li cristianoetic te ta lume.

⁸ C'alal iloq'uic batele, jtuc no'ox te licom. Jech lic jpatan jtuts'an jba ta banamil; tsots li'avan jech laj cal: “¡Ay, Cajval, Muc'ul Dios! ¿Me yu'un chavules noxtoc li scomelal israeletique? ¿Me yu'un chaloq'ues scotol sc'ac'al avo'nton ta stojol li lum Jerusalene?”, xcut.

⁹ Jech laj yalbun: “Li smul la sa'ic ta jtojol li Israel xchi'uc Judae toj ep ta jyalel. Li avosilalique inoj ta ch'ich' yu'unic. Li alumalique inoj ta c'usitic mu'yuc tuc' tspasic. Yu'un jech laj yalic: ‘Laj xa sjip ta yo'nton cosilaltic li Muc'ul Diose. Mu xil li c'usi ta jpastique’, xiic.

¹⁰ Ja' yu'un me jutuc mu'yuc abul sba chquilic; persa ta xcac'be stojic li c'usi chopol la spasique”, xiyutun.

¹¹ Ts'acal laj quil isut tal li vinic ti pasbil ta lino no sc'u'e xchi'uc ti yich'oj jun yabtejeb sventa ts'ibajele, jech vul yal: “Laj xa jpas scotol li c'usi laj avalbune”, xi.