Ezequiel 8 - Bible in Tzotzil de Chenalhó with Deuterocanon

Li Ezequiele i'ac'bat yil ta xch'ulel c'usi toj chopol tspasic te ta Jerusalén

¹ C'alal yo'bal c'ac'al yochel svaquibal u ta svaquibal jabile, ja'o te chotolun ta jna jchi'uc li moletic ta Judae. Ta ora no'ox laj yac' tal sc'ob ta jtojol li Muc'ul Diose, ja' li Cajvaltique.

² Jech ta ora no'ox oy c'usi laj quil xco'laj xchi'uc vinic yilel. Xlic ta xchucbenal xch'ut, xyal batel ta yacane xco'laj xchi'uc c'oc'. Xlic ta xchucbenal xch'ut, xmuy batel ta sjole; xco'laj xchi'uc bronce lec sts'ayayet.

³ Li c'usi xco'laj xchi'uc vinic laj quile la xach' tal sc'ob; la stsacbun ta stsotsil jol. Ta stsatsal Dios laj quich' liquel muyel c'alal ta o'lol vinajel. Li Diose ta jch'ulel laj yic'un batel ta Jerusalén. Te c'ot sva'anun ta yochebal yamaq'uil ch'ulna ta stuq'uil norte yo' bu oy li sloc'obal sdiosic ti la sa'be tsots sc'ac'al yo'nton Muc'ul Diose.

⁴ Laj quil te oy xojobal li Dios yu'un Israel jech chac c'u cha'al laj quil ono'ox ta stenlejaltique.

⁵ Jech laj yalbun: “Xnich'on cristiano, toyo batel asat le' ta stuq'uil nortee”, xiyutun. Jech la jtoy batel li jsate ja' to laj quil te oy ta sts'el ti'coralton li sloc'obal sdiosic ti la sa'be tsots sc'ac'al yo'nton Diose, ja' li ti'coralton sventa scajleb smoton Diose.

⁶ Jech laj yalbun noxtoc: “¿Me chavil c'usi toj chopol tspasic li smomnich'nabtac Israele? Ja' sventa chaq'uic namajcun loq'uel ta jch'ulna ti jech la spasique. Malao avil, ta to xavil yan li c'usi toj chopol tspasique”, xiyutun.

⁷ Jech laj yic'un batel ta yochebal yamaq'uil ch'ulna noxtoc. La jq'uel batel, te laj quil ti vomol li coraltone.

⁸ Jech laj yalbun: “Vomo xa ochel li coraltone”, xiyutun. Jech la jvom batel li coraltone; te laj quil jun ti'na.

⁹ Jech laj yalbun noxtoc: “Ochan batel, te chavil li c'usi toj chopol tspasic li achi'iltaque”, xiyutun.

¹⁰ Jech li'och batel, laj quil te loc'tabil sloc'obal ta c'alna scotol li quiletel chonetique, xchi'uc li chonbolometic ti toj chopolique, xchi'uc scotol li jaychop sloc'obal diosetic sloc'taojic li israeletique.

¹¹ Ta stuq'uil li c'usi loc'tabilique te va'ajtic lajuneb xchanvinic (70) viniquetic, ja' li banquilaletic yu'un israeletique. Ja' te oy ta o'lol yu'unic li Jaazanías xnich'on Safane. Stsacanojic jujun xchic'ubil pom; te ta xchiq'uic pom ta stojol li c'usi loc'tabilique. Ic'uben no'ox xch'ayilal chmuy yu'unic li pome.

¹² Jech laj yalbun: “¿Me chavil c'usi tspasic ta mucul li moletic yu'un achi'iltaque, ta jujun scuartoic sloc'taojic sloc'obal li diosetic yu'unique? Li stuquique jech chalic: ‘Mu xijyilutic li Muc'ul Diose, yu'un scomtsanoj xa li cosilaltic li'i’, xiic.

¹³ Malao avil, ta to xavil c'usitic yan toj ech'em chopol jech chac le'e”, xi.

¹⁴ Jech laj yic'un batel ta ti'coralton ta stuq'uil norte ta xch'ulna li Muc'ul Diose. Te laj quil oy antsetic te chotajtic choc'taic li sdiosic Tamuze.

¹⁵ Jech laj yalbun li Diose: “¿Me chavil le'e?”, xiyutun. Jech laj yalbun: “Malao avil, ta to xavil yan toj ech'em chopol tspasic jech chac le'e”, xiyutun.

¹⁶ Jech laj yic'un batel ta yut yamaq'uil xch'ulna li Muc'ul Diose. Laj quil te oy vo'ob xcha'vinic (25) viniquetic ta o'lol yu'unic li scajleb smoton Dios xchi'uc li ti'ch'ulnae. Li viniquetique sva'lupatinojic comel li ch'ulna yu'un Muc'ul Diose; ja' sq'uelojic batel li sloq'ueb c'ac'ale. Squejanoj sbaic; ja' chich'ic batel ta muc' li c'ac'ale.

¹⁷ Jech laj yalbun li Diose: “¿Me chavil scotol le'e? Li judaetique muc ta'louc o cha'yic ti tspasic c'usi toj chopol li' no'oxe. Solel la snojesic ta xchopolilic noxtoc li avosilalique, yo'to ech'em la sa'bicun o sc'ac'al co'nton. Solel la sye'ilanic ta jsat li sts'unubal-te'ic c'alal chich'ic ta muc' sdiosique.

¹⁸ Lec oy ti jech tspasique. Ta jpas cabtel jchi'uc sc'ac'al co'nton ec. Mu'yuc ta jpasbeic o perdón; mu'yuc chc'uxubajic ta co'nton. Ac'o me tsots ch-avanic ta jchiquin, mu'yuc ta jtuc'ulanbeic o”, xiyutun li Diose.