Ezequiel 7 - Bible in Tzotzil de Chenalhó with Deuterocanon

Po'ot xa slajebal

¹ Ital sc'opanun yan velta li Muc'ul Diose jech laj yalbun:

² “Vo'ot xnich'on cristiano, jech xaval chac li'i: Li Muc'ul Diose, ja' li Cajvaltique, jech chal ta sventa li yosilal Israele: Ta xa xtal slajebal; ta xa xtal slajebal ta xchanjotal xchiquin li banamile.

³ Israel, ta xa xtal li alajebe. Ta jloq'ues sc'ac'al co'nton ta atojol; ta jchapanot ta sventa li c'usitic laj apase; ta xcac'bot acuch scotol li c'usitic toj chopol laj apase.

⁴ Me jutuc mu'yuc bu ta jts'icbot; mu'yuc ta jc'uxubinot. Ta xcac'bot atoj ti c'u x'elan stojol tsc'ane. Ta xcac'bot ta asat scotol li c'usitic chopol laj apase.

⁵ “Jech chcal vu'un li Muc'ul Diosune, vu'un li yajvalun scotole: Ta xtal tsots vocol ta atojol, mu'yuc spajebal.

⁶ Ta xa xtal li slajebale; ta xa xtal li slajebale. Ijulov xa, ta xa xtal ta atojol, nopol xa xtal.

⁷ Jnaclumetic li' ta banamil, ic'ot xa ta atojolic. Ista xa yorail, nopol xa sc'ac'alil li at-o'ntone. Chlaj sc'oplal li xcuxetel o'ntonal te ta vitsetique.

⁸ Jutuc xa sc'an xajmalbot ta atojol li sc'ac'al co'ntone. Ta jloq'ues scotol li sc'ac'al co'nton ta atojole. Ta jchapanot ta sventa ti c'u x'elan laj apase; ta xcac'bot ta atojol scotol li c'usitic toj chopol laj apase.

⁹ Me jutuc mu'yuc bu ta jts'icbot, mu'yuc chac'uxubaj ta co'nton. Ta xcac'bot atoj ti c'u x'elan stojol tsc'an avabtele. Chc'ot ta atojol scotol li c'usitic toj chopolic laj apase, jech chana' o ti vu'un jtuc Muc'ul Diosun chacac'bot atoje.

¹⁰ “A'yo ava'ay, laj xa sta li sc'ac'alile; ivul xa ta atojol. Ja' xa yorail chavich' li vocole, nichinem xa lec li svarae, yich'oj xa lec yip li simaronile.

¹¹ Li j'uts'intavaneje liquem xa; i'epaj xa li xchopolile. Me junuc mu'yuc boch'o chcom avu'unic; me junuc mu'yuc boch'o chcol comel. Mu'yuc c'usi xu' avu'un ta sventa ac'ulejal, ta sventa c'usi oy avu'un.

¹² Ista xa yorail; ic'ot xa sc'ac'alil. Li boch'o chmanulaje mu'yuc xcuxet yo'nton. Li boch'o ta xchonolaje mu'yuc c'usi choc'ta, yu'un scotol oy ta sbaic li sc'ac'al yo'nton Diose.

¹³ Li boch'o oy c'usi chchone, mu'yuc xa c'usi ora tsut tal ta stojol yan velta, ac'o me cuxul to chcomic. Yu'un li vocol chtal ta stojolique mu xu' chlaj sc'oplal. Li boch'otic chopolique mu xu' tscolta sbaic o.

¹⁴ “Ta sjupanic oq'uesetic sventa pleito; ta to xchapan sbaic lec, pero mu'yuc boch'o xu' yu'un chbat ta pleito, yu'un scotolic chc'ot ta sbaic li sc'ac'al co'ntone.

¹⁵ Ta pat lume oy milel ta espada; ta yut lume oy tsatsal chamel xchi'uc vi'nal. Li boch'o ta pat lum oyic batele te chlajic ta milel. Li boch'o te oyic ta yut lume te chchamic ta vi'nal xchi'uc ta chamel.

¹⁶ Li boch'o chjatovic batel ta anil ta vitsetic ti x'oc'oletic batel jech chac c'u cha'al stsumute, ta jujuntal te chlic chamicuc ta scoj smul stuquic.

¹⁷ Ta xc'uniban li sc'obique; ta x'aluban li yacanique.

¹⁸ Ta xlic slapic c'u'il sventa vocol ti c'ux ta lapele. Ta xlic niquicuc ta tsots xi'el. Ta xchacpochtajic o ta q'uexlal, chich'ic juxbel scotol li stsotsil sjolique.

¹⁹ Ta sjipic ta xoraltic li saquil taq'uin oy yu'unique; mu'yuc stu chcom o li sc'anal taq'uinique. Mu xu' ta spoj sbaic ta saquil taq'uin, ta c'anal taq'uin ti c'alal chlic ilinuc li Muc'ul Diose, yu'un ja' ta scoj ti la sta o smul xchi'uquique. Ac'o me toj ep li saquil taq'uin li c'anal taq'uin yu'unique, mu xnoj xch'utic o yu'un; mu xpaj svi'nalic o.

²⁰ Yu'un la sc'atajes ta stoyobbailic li st'ujumalic ti pasbilic ta c'anal taq'uine xchi'uc ta saquil taq'uine. La spasic o sloc'obaltac diosetic ti toj chopolique, ja' yu'un ta jcomtsanic o jech chac c'u cha'al c'a'ep.

²¹ Ta xcaq'uic ta sc'ob yanlumetic, yu'un ac'o yelc'anic batel. Ja' stojol svocolic chc'ot li chopol cristianoetic li' ta banamile, ta soquesic o scotol.

²² Yu'un ta jq'uej loq'uel jsat ta stojolic, jech ta xich' soquesel o li c'usitic lec oy cu'une, ja' li jch'ulnae. Yu'un ta x'och yac' sc'obic li j'eleq'uetique; ta xlic sbolibtasic o scotol.

²³ “Chapano lec cadenaetic, yu'un inoj xa ta milubbail li avosilalique. Li alumalique noj ta sa'c'op, ta majbail ta jyalel.

²⁴ Ta xquic' tal li cristianoetic ta banamil ti bats'i chopolique; ja' chtal sventainbeic snaic li achi'iltaque. Ta jpajesbe stoyobbailic li jtoybaetique; ta jsoquesbe o sc'oplal li vitsetic ti toybil yu'unique.

²⁵ Ta xa xtal li tsots vocole; ta to sa'ic bu xu' tsta jun yo'ntonic, pero mu staic o.

²⁶ Me ital li tsots vocole, xloc' x'och no'ox. Ja' jech xloc' x'och tal noxtoc li lo'iletic ti toj xi'balic sbae. Ta to sa'ic j'alc'opetic sventa ch-albatic c'usi chc'ot ta pasel, pero mu staic. Yu'un mu'yuc xa paleetic ti xu' chchanubtasatic yu'une; mu'yuc xa moletic ti xu' ch-albatic lec mantal yu'une.

²⁷ Li ajvalile ta xlic ochuc ta c'op-o'nton. Li banquilaletique ta xlic yat yo'ntonic. Li jteclume ta xlic niquicuc ta xi'el, yu'un ta xcac'be stojic jech chac c'u cha'al stojol tsc'an li yabtelique. Ta jchapanic jech chac c'u cha'al spasojique, yu'un jech ac'o yotquinicun ti vu'un Muc'ul Diosune”, xi li Diose.