Ezequiel 5 - Bible in Tzotzil de Chenalhó with Deuterocanon

Senyail c'op sventa chlajic ta milel

¹ Jech laj yalbun noxtoc: “Vo'ot xnich'on cristiano, tsaco junuc cuchilo ti oy lec yee; tuneso jech chac c'u cha'al sloc'ubil isimil; juxo o loq'uel li stsotsil ajole xchi'uc li avisime. Tsaco noxtoc junuc balanza; voq'uilano ta bisel li stsotsil ajole.

² Jvoc' xachic' ta c'oc' te ta o'lol lum c'alal tsts'aqui jayib c'ac'al setubil li lume. Li yan jvoq'ue lilino ta sebel ta espada te ta spat xocon li lume. Li yan jvoq'ue ac'o cuchatuc batel ta ic'. Yu'un vu'un ta jnutsic batel ta espada li jnaclumetic ta lume.

³ Tsobo jaylicuc xa no'ox li stsotsil ajole; jmoj xayom ta chuquel ta yoc anatil c'u'.

⁴ Ts'acal xaloq'ues jaylicuc noxtoc, tic'o ta c'oc'; te ac'o c'ac'uc o. Ja' te chlic tal li c'oc' sventa chchic' scotol israeletique.

⁵ “Vu'un li Muc'ul Diosun, ti yajvalun scotole, jech chcal: Le'e ja' sc'oplal li Jerusalene; ja' li lum ti la jnacan lec ta o'lol yu'un li yantic lumetic, li yantic banamiletic te setel ta spat xocone.

⁶ Pero la stoy sbaic ta jtojol; la sbajic li jmantaltaque. Ech'em to chopol la spasic jech chac c'u cha'al li yantic lumetic, li yantic banamiletic te ta spat xoconique. La sbajic li jmantaltaque; muc xch'unic li c'usitic laj calbeique.

⁷ “Ja' yu'un jech chcal vu'un li Muc'ul Diosune: Ta sventa ti bats'i jtoybaoxuc jech chac c'u cha'al li yantic banamil te ta apat axoconique, ti muc ja'uc xach'unic li jmantaltaque xchi'uc li tojobtaseletic cu'une, me ja'uc li mantaletic yu'un yantic banamil te ta apat axoconique,

⁸ ja' yu'un, vu'un li Muc'ul Diosune ta xic'ataj ta avajcontra ec li vo'ote, Jerusalén. Ta sat scotol yantic banamil ta xcac' atoj amul.

⁹ Ja' ta jpas ta atojol li c'usi mu'yuc ono'ox bu jech jpasoje, xchi'uc ti mu'yuc xa bu jech ta jpas o yan veltae. Ja' ta scoj ti bats'i chopol c'usi laj apasique.

¹⁰ Li totil me'iletique ta xlic sti' yol xnich'onic te ta atojol. Li nich'naletique ta xlic sti' stot sme'ic, yu'un ta xcac' tal stojol li amulique. Li boch'o cuxajtic to chcomique ta jpuquic batel ta xchanjotal xchiquin banamil.

¹¹ Vu'un li Muc'ul Diosun ti yajvalun scotole, jamal ta xcal ta jbi jtuc ti jech ta jpase. Yu'un laj asoquesbeic sc'oplal ch'ulna cu'un ta scoj li loc'ometic laj avich'ic ta muc' ti toj chopol chquile, xchi'uc ta scoj li c'usi toj chopol laj apasique, ja' yu'un chajlilinoxuc o ta j'ech'el ec; mu'yuc chajpasboxuc perdón; mu'yuc chajc'uxubinoxuc o.

¹² Li jnaclumetic avu'une jvoc' ta xchamic ta tsatsal chamel xchi'uc ta vi'nal te ta atojol. Li yan jvoq'ue ta xich'ic milel ta espada te ta apat axocon. Li yoxvoc'ale ta jpuquic batel ta xchanjotal xchiquin banamil. Ta jnutsic batel ta espada ta sva'lupatic.

¹³ Te ta xcac' c'otuc ta pasel ta stojolic scotol li sc'ac'al co'ntone. Te ta xcac'be xcuchic o scotol, jech cux xi co'nton chicom ec. C'alal me ta jloq'ues scotol li sc'ac'al co'nton ta stojolique, jech chlic sna'ic ti toj it'ix co'nton yu'un c'usi la spasique.

¹⁴ Ta jyavnaijesot o; ta xcac'ot o ta q'uexlal ta stojol li yantic banamil te ta apat axocone, xchi'uc ta sat scotol li boch'otic te chjelovique.

¹⁵ C'alal chacac'bot li tsots stojol amul ta sc'ac'al co'ntone, labal chayilicot, chasna'leicot, chaslabanicot, xchi'uc ta xi'ic avu'un scotol li yantic banamil te ta apat axocone. Vu'un chcal jtuc, vu'un li Muc'ul Diosune.

¹⁶ Vu'un ta xcac' taluc tsots vi'nal ta atojolic, jech chac c'u cha'al yipal flecha ta xtal sventa chayulesoxuc. Ta melel ta xcac' tal li tsots vocol xchi'uc tsots vi'nale; ta xcac' lajuc li ave'elique.

¹⁷ Ta jtac tal ta atojolic vi'nal xchi'uc jti'val chonbolometic, ja' chtal yulesboxuc li anich'nabique. Ta xcac' tal ta atojolic tsatsal chamel xchi'uc lajel, xchi'uc ta jtac tal ta atojolic pleito, jech chavich'ic milel ta espada. Vu'un chcal jtuc, vu'un li Muc'ul Diosune”, xiyutun li Diose.