Ezequiel 48 - Bible in Tzotzil de Chenalhó with Deuterocanon

C'u x'elan la svoc' yosilic ta jujuchop li israeletique

¹ “Ja' jech sbiic li jaychop israeletic ti laj yich'ic voc'bel yosilic ta nortee: Li sti' yosilalic ta stuq'uil nortee xlic ta Nab Mediterráneo; xjelov batel ta Hetlón, ta yochebal lum Hamat, xchi'uc ta Azar-enán. Ta sts'ac li Damasco xchi'uc Hamat xyal ta stuq'uil sure; ja' te lic yich' yosil li Dane. Li sjamalile xlic ta sloq'ueb c'ac'al c'alal to ta smaleb c'ac'al.

² Ta sts'ac li Dane ja' te lic yich' yosil ec li Asere. Li sjamalile xlic ta sloq'ueb c'ac'al c'alal ta smaleb c'ac'al.

³ Ta sts'ac li Asere ja' te lic yich' yosil ec li Neftalie. Li sjamalile xlic ta sloq'ueb c'ac'al c'alal ta smaleb c'ac'al noxtoc.

⁴ Ta sts'ac li Neftalie ja' te lic yich' yosil ec li Manasese. Li sjamalile xlic ta sloq'ueb c'ac'al c'alal ta smaleb c'ac'al noxtoc.

⁵ Ta sts'ac li Manasese ja' te lic yich' yosil ec li Efraine. Li sjamalile xlic ta sloq'ueb c'ac'al c'alal ta smaleb c'ac'al.

⁶ Ta sts'ac li Efraine ja' te lic yich' yosil ec li Rubene. Li sjamalile xlic ta sloq'ueb c'ac'al c'alal ta smaleb c'ac'al.

⁷ Ta sts'ac li Rubene ja' te lic yich' yosil ec li Judae. Li sjamalile xlic ta sloq'ueb c'ac'al c'alal ta smaleb c'ac'al noxtoc.

⁸ “Ta sts'aquil yosil li Judá xlic ta sloq'ueb c'ac'al c'alal ta smaleb c'ac'ale, ja' te ac'o tsts'aquin sba yalel xchi'uc li ch'ul banamile. Bisic yalel o'lol yoxlajunmil (12,500) metro, yan li sjamalile ja' co'ol jech chac c'u cha'al sjamalil yosilic li achi'iltaquique. Chlic ta sloq'ueb c'ac'al c'alal ta smaleb c'ac'al. Li ch'ulnae cacal ta o'lol chcom.

Sc'oplal ch'ul banamil sventa Dios

⁹ “Li jsep banamil ti chich' voq'uel o ta sventa Muc'ul Diose ja' tsc'an chich' comesel o'lol yoxlajunmil (12,500) metro snatil, lajunmil metro (10,000) sjamalil.

¹⁰ Li jvoc' chich' voq'uel ta sventa paleetique ja' o'lol yoxlajunmil (12,500) metro xlic ta norte c'alal ta sur. Li jot sti' xlic ta sloq'ueb c'ac'al c'alal ta smaleb c'ac'ale ja' vo'mil (5,000) metro ta jujujot. Li ch'ulna yu'un Muc'ul Diose cacal ta o'lol chcom.

¹¹ Li banamil le'e ja' ch'ul banamil chcom o ta sventa li paleetic smomnich'nab Sadoc ti voc'bilic o cu'un ta sventa cabtele, ti jun yo'ntonic o ta jtojole ti muc spasic jech chac c'u cha'al la spasic li israeletique xchi'uc li levietique.

¹² Ja' yu'un xu' tsventainic li ch'ul banamil te ta sti' osil sventa levietique, ja' li banamil ti ts'u'iltasbil o ta sventa Muc'ul Diose.

¹³ Li osil ta sventa levietic ti sts'aquinoj sba xchi'uc li osil sventa paleetique ja' o'lol yoxlajunmil (12,500) metro snatil, vo'mil (5,000) metro sjamalil. Li jvoc' ch'ul banamil sventa Diose ja' o'lol yoxlajunmil (12,500) metro snatil, vo'mil (5,000) metro sjamalil noxtoc.

¹⁴ Li banamil le'e mu xu' chich' chonel; mu'yuc boch'o xu' tsjel; mu xu' chich' aq'uel ta yan, yu'un ja' bats'i ch'ul banamil yu'un li Muc'ul Diose.

¹⁵ “Li yan jsep ti o'lol yoxlajunmil (12,500) metro snatil, o'lol yoxmil (2,500) metro sjamalile, ma'uc ch'ul banamil chcom. Xu' te chnaqui cristianoetic; xu' chcom ta xocol osil. Li lume cacal ta o'lol chcom.

¹⁶ Ti c'u smuc'ule ja' cha'mil xchi'uc o'lol yoxibal cien (2,250) metro ta set.

¹⁷ Li yosilal alumalic ta joyobe ja' vo'ob svucvinic (125) metro ta set.

¹⁸ Li banamil ti xocol to chcom ta jot sti' yosilal lum ti sts'aquinoj sba xchi'uc li ch'ul banamil yu'un Muc'ul Diose, ja' vo'mil (5,000) metro snatil ta sloq'ueb c'ac'al xchi'uc ta smaleb c'ac'al. Li banamil le'e ac'o yich' bojel; li c'usi chloq'ue ja' ac'o yich'ic li boch'otic te ch-abtejic o ta lume.

¹⁹ Li boch'otic te ch-abtejic o ta lume, tsc'an ac'o yich' t'ujel loq'uel ta jujuchop achi'iltac ta israelal.

²⁰ Li banamil ti voc'bil ta sventa ch'ulna xchi'uc ti voc'bil ta sventa yav lume, ja' o'lol yoxlajunmil (12,500) metro ta set chc'ot ta scotol.

Osil ta sventa boch'o ch-och ta ajvalilal

^21-22 “Li banquilale ja' yu'un chc'ot ec li cha'sep xocol chcom ta jujujot xocon sti' ch'ul banamil ti voc'bil o ta sventa Muc'ul Diose xchi'uc li yosilal lume, ja' ti cacal ta o'lol yu'unic li yosil Judá xchi'uc yosil Benjamine. Li snatil jsep osil ta sloq'ueb c'ac'ale ja' o'lol yoxlajunmil (12,500) metro. Jech noxtoc li snatil jsep ta smaleb c'ac'al ta ti'nab Mediterraneoe ja' o'lol yoxlajunmil (12,500) metro noxtoc. Ja' cacal ta o'lol yu'unic li ch'ul banamil sventa Diose xchi'uc li ch'ulnae xchi'uc li yosil levietique xchi'uc li yosilal lume.

Yosil yan vo'chop israeletic

²³ “Li yan vo'chop israeletique ja' te laj yich' yosilic ta stuq'uil sur. Li sjamalile xlic ta sloq'ueb c'ac'al c'alal ta smaleb c'ac'al noxtoc. Ja' te laj yich' yosil li Benjamine.

²⁴ Ta sts'aquil yosil li Benjamine ja' te laj yich' batel yosil li Simeone.

²⁵ Ta sts'aquil yosil li Simeone ja' te laj yich' batel yosil li Isacare.

²⁶ Ta sts'aquil yosil li Isacare ja' te laj yich' batel yosil li Zabulone.

²⁷ Ta sts'aquil yosil li Zabulone ja' te laj yich' batel yosil li Gade.

²⁸ “Li sts'aquil yosil Gad ta sure te xlic batel ta Tamar, xjelov batel ta loq'ueb vo'tic ta Meriba-Cades xchi'uc ta yuc'umal Egipto, c'alal to ta Nab Mediterráneo.

²⁹ “Scotol li banamil le'e ja' vo'oxuc chavich'ic; voc'bo abaic ti jaychop israeloxuque. Ja' avu'unic chcom o. Vu'un chcal jtuc, vu'un li Muc'ul Diosune.

Sc'oplal ti'coralton yu'un lum Jerusalén

^30-31 “Li jujun sti' scoraltonal lume ac'o yich'be sbi jujuchop li israeletique. Li jot coralton ta stuq'uil nortee ja' cha'mil xchi'uc o'lol yoxibal (2250) metro. Ac'o comuc oxch'oj sti'; ja' ac'o yich'be sbi Rubén, Judá, xchi'uc Leví.

³² Li jot coralton ta sloq'ueb c'ac'ale ja' cha'mil xchi'uc o'lol yoxibal cien (2250) metro snatil noxtoc; ac'o comuc yan oxib sti'. Ja' ac'o yich'be sbi José, Benjamín, xchi'uc Dan.

³³ Li jot xocon ta sure ja' cha'mil xchi'uc o'lol yoxibal cien (2250) metro noxtoc. Ac'o comuc yan oxib sti'. Ja' ac'o yich'be sbi Simeón, Isacar, xchi'uc Zabulón.

³⁴ Li jot ta smaleb c'ac'ale oy cha'mil xchi'uc o'lol yoxibal cien (2250) metro noxtoc. Ac'o comuc yan oxib sti'; ja' ac'o yich'be sbi Gad, Aser, xchi'uc Neftalí.

³⁵ Ti c'u snatil ta set li coraltone ja' balunmil (9,000) metro ta scotol. Li lume ‘Li' oy li Muc'ul Diose’, xi sbi chc'ot”, xi li Muc'ul Diose.