Ezequiel 45 - Bible in Tzotzil de Chenalhó with Deuterocanon

Sc'oplal c'u x'elan tsvoq'uic osil yu'un Muc'ul Dios

¹ “C'alal chavoq'uic ta sventa canal tajimol li osil sventa chapucbeic li jujuchop achi'iltaquique, tsc'an chacomtsanic jsepuc sventa Muc'ul Dios, jech smuc'ul chac li'i: O'lol yoxlajunmil metro (12,500) snatil, lajunmil (10,000) metro sjamalil. Le'e ja' voc'bil chcom o ta sventa li Muc'ul Diose; ja' ch'ul banamil chcom o.

² Ja' te chavoc'beic yosilal noxtoc li ch'ulna cu'une. Ja' o'lol yoxibal cien (250) metro ta set. Xacomtsanic lec yaxaltic ta joyob; ja' vo'ob xcha'vinic (25) metro ta set.

³ Li banamil ti voc'bil o ta sventa Muc'ul Diose, pasic ta o'lol; ja' o'lol yoxlajunmil (12,500) metro snatil, vo'mil (5,000) metro sjamalil. Li jvoq'ue ja' bats'i ch'ul banamil chcom o; ja' te chich' pasel li ch'ulna cu'une,

⁴ xchi'uc ja' chtun ta sventa yav snaic li paleetic ti te chtunic o ta ch'ulna cu'une, ti chnopajic ta jtojol sventa tspas yabtelique. Ja' ch'ul banamil chcom o ta sventa li ch'ulnae xchi'uc ta sventa li sna paleetique.

⁵ Li yan jvoc' ti o'lol yoxlajunmil (12,500) metro snatil, vo'mil (5,000) metro sjamalile, ja' chtun yu'unic li levietic ti te chtunic ta ch'ulnae; ja' sventa lumetic yu'unic ti bu xu' chnaquiique.

⁶ Li yav lum avu'unique tsc'an chavoq'uic comel te ta sti' li jvoc' ch'ul banamil sventa ch'ulnae. Voq'uic o'lol yoxlajunmil (12,500) metro snatil, xchi'uc o'lol yoxmil (2,500) metro sjamalil. Le'e ja' yu'unic ta scotolic li achi'iltaquic ta israelale.

C'u x'elan chich' yosil boch'o ochemic ta banquilal

⁷ “Jech noxtoc tsc'an voq'uel comel osil ta sventa li boch'otic ch-ochic ta banquilale. Jvoc' chcom ta sloq'ueb c'ac'al; jvoc' chcom ta smaleb c'ac'al, o xu' chcaltic ti ja' jujuvoc' chcom ta jujujot sti' li ch'ul banamile. Ti c'u smuc'tiquil chcom ta jujujote ja' co'ol snatil jech chac c'u cha'al snatil yosil chich'ic li jujuchop sts'unubal israeletique.

⁸ Li banamil le'e ja' yosilic chcom li boch'otic ch-ochic ta banquilal yu'un israeletique. Jech mu xu' chlic yuts'intaic li jteclume, ja' yu'unic chcom o ec ti c'u smuc'tiquil chich'ic ta jujuchope.

Mantal ta sventa banquilaletic ta Israel

⁹ “Vu'un li Muc'ul Diosun, vu'un li Avajvalicune, jech chcal: Banquilaletic ta Israel, xu' xa o li uts'intavanej xchi'uc li elec' chapasique. Ja' xapasic li c'usitic tuc' xchi'uc li c'usitic leque. Ta'lo xa spojbel yosilic li jteclumale.

¹⁰ “Acotolic ja' xatunesic li sbisubil ti lec ts'acalique.

¹¹ Li c'usitic sts'ants'un xchi'uc li sbec' c'usitic chloc' avu'unique tsc'an co'ol sbisol chavaq'uic. Ja' xavich'ic o li sbisubil ti yich'oj buluchvinic (220) anmule. Li jun bato c'usi sts'ants'une tsc'an ti yich'oj chib xcha'vinic (22) litroe. Li jun efa trigoe tsc'an ti yich'oj chib xcha'vinic (22) anmule.

¹² “Ja' jech tsc'an chapasic noxtoc ta sventa li yalale. Li jtob (20) gerae ja' co'ol jech chac c'u cha'al jun siclo ti yich'oj buluchib (11) gramoe. Li jun minae ja' co'ol xchi'uc oxvinic (60) siclo.

¹³ “Li jmoton tsc'an chavac'bicune ja' jech chac li'i: Voq'uic ta oxvinic (60) ta voc' li trigo xchi'uc li cebada chloc' avu'unique; jvoc' chavac'bicun ta sventa jmoton.

¹⁴ Jech noxtoc ta sventa li aceite chloc' avu'unique, voq'uic ta vo'vinic (100) ta voc'; jvoc' chavac'bicun jmotonin noxtoc.

¹⁵ Jech noxtoc ta sventa li achijique, me oy lajunvinic (200) ta cot ti lec jubesbilic ta lequil ts'i'laletic ta avosilalique, jcot chavich'bicun tal jmotonin. Le'e ja' chtun ta sventa milbil matanal, chic'bil matanal, xchi'uc ta sventa co'ol co'ntontic. Vu'un jtuc chcal, vu'un li Muc'ul Diosune.

¹⁶ Ta scotol li avosilalique ja' jech jmantal ta sventa li jmoton tsc'an chavaq'uic ta stojol li banquilal avu'unic ta Israele.

¹⁷ Yu'un ja' tsventain yaq'uel li matanal ti chich' chiq'uel scotlijile, xchi'uc li milbil matanale, xchi'uc li yantic matanal sventa q'uinetique, xchi'uc ti c'alal ch-uninaj ue, xchi'uc ti c'alal ja' sc'ac'alil cuxub o'ntonale, xchi'uc ta sventa scotol li q'uinetic chich' pasel ta Israele. Ja' tsventain yaq'uel noxtoc li milbil matanal ta sventa mulile, xchi'uc li yantic matanal jech chac c'u cha'al trigoe, xchi'uc li milbil matanaletic ta sventa co'ol co'ntontique yu'un jech xu' ta jch'aybe smulic scotol li achi'iltaquique.

Sc'oplal q'uin Coltael

¹⁸ “Jech chcal noxtoc vu'un li Muc'ul Diosune: Ta sliquebal li sba ue xavac'bicun jmotonin jcot ch'ium tot vacax ti bu ven leque; ja' sventa chalecubtasic o li ch'ulna cu'une.

¹⁹ Li palee ac'o stsacbe li xch'ich'al matanal sventa xch'ayubil mulile; ac'o sbon ta yoyaltac sti' li ch'ulnae, xchi'uc ac'o sbon ta xchanibal xchiquin li scajleb jmotone, xchi'uc ta yoyaltac sti' li xcha'c'olal amac' ta yute.

²⁰ Ja' jech xapasic noxtoc ta svucubal c'ac'al yochel li sba ue; ja' sventa xch'ayubil smul scotol achi'iltac ti me oy bu muc xa'ay la sta smulique, xchi'uc ti muc ta yutsiluc yo'nton la spasique. Jech lecubtasbil chcom noxtoc li ch'ulna cu'une.

²¹ Ta xchanlajunebal (14) c'ac'al yochel li sba ue, ja'o xlic apasic li q'uin Coltaele; vucub c'ac'al xlic ave'ic batel pan ti mu'yuc yich'oj svolesubil xch'ute.

²² Ta xchanlajunebal (14) otole, ac'o yac'bun jmotonin jcot ch'ium tot vacax li banquilal avu'unique. Ja' sventa xch'ayubil smul stuc, xchi'uc sventa xch'ayubil smul sjunul li jteclume.

²³ Li vucub c'ac'al q'uin chapasic ta jventae, ac'o yac' jujucot ch'ium tot vacax ta jujun c'ac'al, xchi'uc jujucot tot chij ti bu ven lequique. Xchi'uc ac'o yac' jujucot tot tentsun ta jujun c'ac'al sventa xch'ayubil mulil.

²⁴ Li jujucot ch'ium tot vacax xchi'uc tot chij chaq'ue, ac'o yac'be xchi'ilin jtob anmul trigo, xchi'uc o'lol xchanibal litro aceite.

²⁵ “Jech noxtoc c'alal chapasic li q'uin ta svo'lajunebal (15) c'ac'al yochel li svucubal ue, ja' li q'uin sventa cha'ochic ta yaxna sucbil ta vomole, ac'o yac'bun jmoton vucub c'ac'al noxtoc li banquilal avu'unique. Ac'o yac' milbil matanal ta sventa mulil, chic'bil matanal, xchi'uc yantic matanaletic jech chac c'u cha'al trigo xchi'uc aceite.