Ezequiel 43 - Bible in Tzotzil de Chenalhó with Deuterocanon

Inoj ta xojobal Dios li ch'ulnae

¹ Li vinique laj yic'un batel noxtoc ta ti'na ta sloq'ueb c'ac'al;

² Laj quil iloc' tal ta sloq'ueb c'ac'al xojobal li Muc'ul Dios yu'un Israele. Laj ca'ay bats'i tsots xvo'et jech chac c'u cha'al nojelal uc'um. Li banamile isacub ta xojobal.

³ Ti c'u x'elan laj quile ja' co'ol jech chac c'u cha'al laj quil ono'ox ta jch'ulel c'alal laj cal ti chich' jinesel li Jerusalene. Xchi'uc ja' co'ol jech chac c'u cha'al laj quil ta ti' uc'um Quebare. Jech la jquejan jpatan jba ta banamil.

⁴ Li xojobal Muc'ul Diose i'och batel c'alal to ta mero yut ch'ulna; te i'och ta sti' ochebal ta sloq'ueb c'ac'al.

⁵ Li stsatsal Muc'ul Diose la xchechun liquel; te c'ot yac'un ta xcha'c'olal amac' ta yut. Laj quil inoj ta xojobal Muc'ul Dios li nae.

⁶ Laj ca'ay oy boch'o la sc'opanun tal ta ch'ulna ti c'alal ja'o te va'al ta jts'el li vinique.

⁷ Jech laj yalbun li boch'o la sc'opanune: “Li vo'ote xnich'on cristiano, li'i ja' yavil jchotleb bu ta jpas mantal; ja' yavil bu ta jtec'an cacan. Ja' li' ta jchi'in o ta naclej sbatel osil li smomnich'nab Israele. Li stuquique xchi'uc li ajvaliletic yu'unique mu'yuc xa chlic soquesbicun sc'oplal jch'ulbi ta scoj li mulivajeletic tspasique, xchi'uc ta scoj sbec'tal li anima ajvaliletic yu'unique.

⁸ Yu'un la spasbeic snail te ta ch'ulna cu'un. Jmoj stsacoj sba smarcoal sti' yu'unic xchi'uc li smarcoal sti' jnae, xchi'uc jun no'ox spac'benal c'otem yu'unic ta o'lol. La soquesbicun jbi ta scoj li c'usi toj chopol la spasique, ja' yu'un laj culesic ta sc'ac'al co'nton.

⁹ Pero li' ta orae ta xlic sjip loq'uel ta yo'ntonic li muliletique, xchi'uc li sbec'tal anima ajvaliletic yu'unique; j'ech'el te chinaqui o ta stojolic.

¹⁰ Li vo'ote xnich'on cristiano, albo scotol achi'iltac ta israelal li c'usitic laj avil ta ch'ulnae, xchi'uc ti c'u x'elan pasbile, xchi'uc ti c'u smuc'ule, yu'un jech ac'o q'uexovicuc ta scoj li smulique.

¹¹ Me chq'uexovic ta scoj li c'usitic spasojique, xlic avalbe ya'yic c'u x'elan li ch'ulnae, xchi'uc li c'usitic te oy ta yute, xchi'uc li ochebal, li loq'uebale, xchi'uc ti c'u smuc'ul yosilale, xchi'uc ti c'u x'elan pasbilique, xchi'uc scotol li mantaletic yu'une. Albo ya'yic scotolic, yu'un jech ac'o lic xch'unic; ac'o lic spasic batel li mantaletic yu'une.

¹² Li mantaletic ta sventa ch'ulna cu'une ja' jech chac li'i: Scotol li jolvitse, xchi'uc ti c'u smuc'ul li banamil ti sjoyibtaoj li ch'ulnae, ts'u'iltasbil chcom o. Ja' jech li mantal ta sventa jnae”, xi.

Sc'oplal scajleb smoton Dios

¹³ Li scajleb smoton Diose laj yich' bisel noxtoc; ja' laj yich' tunesel li sbisubil ono'oxe. Ta sjoyobal li scajleb smoton Diose ch'acbil sbevo'al, o'lol metro snatil xchi'uc o'lol metro sjamalil. Jech noxtoc ta spat xocon li sbevo'ale, macbil ta joyob, jch'ix, xchi'uc chib c'ob stayalil. Li snacleb bu liquem tal spasel li scajleb smoton Diose ja' jech chac li'i:

¹⁴ Li jts'oc xlic tal ta yut banamil ti bu c'alal joc'bil sbevo'ale ja' jun metro stayalil, ja' olol metro jeloven smuc'ul ta jujujot. Li jts'oc ta o'lole ja' chib metro stayalil, o'lol metro bic'tajem ta jujujot, chbic'taj muyel ta jujucoj.

¹⁵ Li yan jts'oc xmuy batel ti bu xa chich' chiq'uel o li matanaletique ja' chib metro stayalil noxtoc. Oy chanib xulub sq'uelojic muyel ta toyol.

¹⁶ Li jts'oc ta slajeb xa ta toyole ja' co'ol sjamalil ta set; ja' vaquib metro sjamalil xchi'uc snatil.

¹⁷ Li jts'oc ta o'lole co'ol sjamalil ta set noxtoc; ja' vucub metro sjamalil ta jujujot. Li bevo' pasbil ta joyobe ja' o'lol metro sjamalil. Li ton ti setel oe jch'ix xchi'uc chib c'ob stayal. Li tec'ubal sventa chijmuy batele te xcom ta stuq'uil sloq'ueb c'ac'al.

¹⁸ Ts'acal jech laj yalbun noxtoc li Muc'ul Diose: “C'alal me ivu' spasel li scajleb jmotone, ja' jech li mantal tsc'an ch'unel ta sventae: Te ac'o yich' chiq'uel li matanale, xchi'uc te ac'o yich' malbel ta sba scajleb matanal li xch'ich'ale.

¹⁹ Li paleetique, ja' li levietic smomnich'nab Sadoque, ti ja' oy ta sventaic xu' chnopajic ta jtojol sventa chtunic cu'une, ac'beic jcotuc ch'ium tot vacax; ac'o smilic sventa xch'ayubil amulic, vu'un jtuc chcal mantal.

²⁰ Ts'acal xatsacbe li xch'ich'ale; vijbo ta xchanibal xulub li scajleb jmotone, xchi'uc ta xchanjotal xchiquin li jts'oc ta o'lole, xchi'uc ta xchanjotal xchiquin li latsbil tone.

²¹ Ts'acal xavich' loq'uel li vacax ti laj yich' milel sventa amulique; bat chic'o ti bu sc'oplal ono'ox xu' chachiq'uic ta spat ch'ulnae.

²² Ta xchibal c'ac'al ac'bun jmotonin jcot tot tentsun ti bu ven leque; ja' sventa xch'ayubil amulic noxtoc. Li paleetique ac'o svijbeic ta scajleb jmoton li xch'ich'ale, yu'un jech ts'u'iltasbil chcom jech chac c'u cha'al tspasic ta sventa li ch'ium tot vacaxe.

²³ C'alal me ilaj avo'nton ta xch'ayel li mulile, tsaco jcotuc ch'ium tot vacax noxtoc xchi'uc jcot ch'ium chij ti bu ven lequique;

²⁴ xlic avac'bun ta jtojol vu'un li Muc'ul Diosune. Li paleetique ac'o yac'beic yats'amil; ac'o xchiq'uic jmotonin vu'un li Muc'ul Diosune.

²⁵ Vucub c'ac'al tsc'an chavaq'uilanbicun jmotonin tot tentsun sventa xch'ayubil amulic; jujucot chamilic jujun c'ac'al. Jech noxtoc chavaq'uic jcot ch'ium vacax, xchi'uc jcot ch'ium chij jujun c'ac'al ti bu mu'yuc xchamelique.

²⁶ Li paleetique vucub c'ac'al ac'o slecubtasic batel li scajleb jmotone, yu'un jech voc'bil chcom o ta jtojol.

²⁷ C'alal me its'aqui li vucub c'ac'ale, te xlic batel ta xvaxquibal c'ac'ale, li paleetique ac'o xchiq'uic li jmoton chavac'bicune xchi'uc li yantic matanal sventa co'ol co'ntontique, jech lec chaquiloxuc o”, xi li Muc'ul Diose.