Ezequiel 42 - Bible in Tzotzil de Chenalhó with Deuterocanon

Yantic naetic ta nopol ch'ulna

¹ Ts'acal laj yic'un loq'uel ta sba c'olal amac' ta stuq'uil norte. Laj yic'un batel ta cuartoetic ta sts'el li yamaq'uil spat mero ch'ulna te yo' bu muc'ta na ta pat ch'ulnae.

² Ta scotol li cuartoetique ja' lajuneb yoxvinic (50) metro li snatil ta stuq'uil nortee. Ja' vo'ob xcha'vinic (25) metro sjamalil.

³ Li jot xocone ja' sq'ueloj batel stuq'uil li xcha'c'olal amac' ti lajuneb metro sjamalile. Li yan jot xocone ja' sq'ueloj batel ti bu latsbil ton ta sti'ti' li sba c'olal amaq'ue. Li cuartoetique oxcoj sjol; li jujucoje jelajtic pasanbil.

⁴ Ta sti' li jujucoj cuartoetique oy lec stentenail; ja' vo'ob metro sjamalil xchi'uc lajuneb yoxvinic (50) metro snatil. Li sti' cuartoetique ja' sq'uelojic batel ta stuq'uil norte.

⁵ Li yoxcojal cuartoetique ja' xa biq'uit c'otem yu'un jelajtic pasbil jujucoj. Ja' muc' liquem li sba cojale; ta xcha'cojale chbic'taj xa batel jutuc,

⁶ yu'un oxcoj pasbil. Li oxcoj cuartoetique mu'yuc yoyal jech chac c'u cha'al li cuartoetic ta joyob ta sba c'olal amaq'ue. Yu'un ja' biq'uit xa c'otem; ja' muc' liquem li sba cojal xchi'uc li xcha'cojale.

^7-8 Li o'lol jot c'alna ta sba cojal ta stuq'uil muc'ta amac' ta sloq'ueb c'ac'ale ja' vo'ob xcha'vinic (25) metro snatil. Le'e mu'yuc yich'oj cuartoetic. Li yan o'lole ja' vo'ob xcha'vinic (25) metro snatil noxtoc yich'oj xa cuartoetic. Li xcha'cojal xchi'uc li yoxcojale yich'ojan xa cuartoetic ta scotol li lajuneb yoxvinic (50) metro snatile.

⁹ Ta sbacojal cuartoetique oy jun ochebal ta xocon ta stuq'uil sloq'ueb c'ac'al. Le'e ja' te x'och batel ta sba c'olal amac'.

¹⁰ Li yan xocon ta stuq'uil sure jmoj stsacoj sba sti'ti' xchi'uc li coralton sventa xcha'c'olal yamaq'uil ch'ulnae. Le'e ja' li xocon ti sq'ueloj sba xchi'uc li yamaq'uil spat ch'ulnae; oy yan muc'tic yut na noxtoc.

¹¹ Li cuartoetique co'ol x'elan pasbil, co'ol smuc'tiquil, xchi'uc co'ol smuc'tiquil stentennail jech chac c'u cha'al pasbilic ta jot ta stuq'uil nortee. Jech noxtoc co'ol pasbilic li sti'e.

¹² Ta sbacojal cuartoe oy jun ti'na ta stuq'uil sur ta xocon stuq'uil sloq'ueb c'ac'al yo' bu xlic batel li stentenaile.

¹³ Li vinique jech laj yalbun: “Li cuartoetic le' ta jot ta nortee xchi'uc ta sure ja' ts'u'iltasbil cuartoetic. Yu'un li paleetic ti chtunic yu'un Muc'ul Diose ja' te tsve'ic li lequil ch'ul matanaletique, xchi'uc ja' te tstiq'uic noxtoc; ja' li matanaletic jech chac c'u cha'al trigoe, xchi'uc li matanal sventa xch'ayubil mulile, xchi'uc li matanal sventa bic'tal muliletique. Yu'un li cuartoetic le'e ja' ch'ul cuartoetic.

¹⁴ C'alal me ja' te ochemic li paleetique, mu xu' chloq'uic batel ta sbac'olal amac' ti c'alal ja' slapojic li ch'ul c'u'iletic sventa tspas yabtelique. C'alal me chloq'uic batele, tsc'an tsloq'uic comel ta cuartoetic li sc'u'ique. Tslapic batel yan sc'u'ic, jech xu' chnopajic batel yo' bu oyic li jch'unolajeletique.

Sc'oplal sjunul yosilal ch'ulna

¹⁵ C'alal ilaj yo'nton sbisel scotol c'u smuc'ul li yute, laj yic'un loq'uel noxtoc ta ti'na ta stuq'uil sloq'ueb c'ac'al; lic sbis scotol ta joyob.

¹⁶ La stsac li aj sventa tsbis oe, lic sbis batel li jot xocon ta sloq'ueb c'ac'ale; ja' o'lol yoxibal cien (250) metro iloc' ta scotol.

¹⁷ Ts'acal la sbis noxtoc li jot xocon ta nortee; ja' o'lol yoxibal cien (250) metro iloc' noxtoc.

¹⁸ Lic sbis noxtoc li yan jot ta stuq'uil sure; ja' o'lol yoxibal cien (250) metro iloc' noxtoc.

¹⁹ Slajeb bat sbis li yan jot xocon ta stuq'uil smaleb c'ac'ale; o'lol yoxibal cien (250) metro iloc' noxtoc.

²⁰ Ta xchanjotal xchiquin la sbis. Scotol le'e setbil lec ta coralton ta joyob; ja' o'lol yoxibal cien (250) metro ta set. Yu'un jech voc'ol oy li c'usi ja' sventa ch'ulnae xchi'uc li c'usi ma'uc sventae.