Ezequiel 41 - Bible in Tzotzil de Chenalhó with Deuterocanon

¹ Li vinique ta ora no'ox laj yic'un ochel ta yut li ch'ulnae. La sbisbe li chib yoyal sti'e; ja' oxib metro syijil jujubej.

² Li sti'e ja' vo'ob metro sjamalil. Li stsaclebtaque o'lol yoxibal metro sjamalil jujun. Ts'acal bat sbis noxtoc li sba c'olal cuartoe; ja' jtob (20) metro snatil, lajuneb metro sjamalil.

³ Ts'acal ibat noxtoc ta xcha'c'olal cuarto. La sbisbe li yoyaltac sti'e; ja' jun metro syijil jujubej. Li ti'nae ja' oxib metro sjamalil; li yoyal ta jujujot xocon ti'nae ja' o'lol xchanibal metro syijil.

⁴ Ts'acal la sbis li xcha'c'olal cuartoe; ja' lajuneb metro snatil jujujot. Jech laj yalbun: “Li'i, ja' li bats'i lequil ch'ul cuartoe”, xiyutun.

Sc'oplal cuartoetic stsacoj sba xchi'uc coralton

⁵ Li vinique la sbisbe li spac'benal mero ch'ulna ta yute; ja' oxib metro spimil. Ta sjoyobal li ch'ulnae oy cuartoetic jmoj stsacoj sbaic xchi'uc; ja' oxib metro smuc'tiquil.

⁶ Li cuartoetique oxcoj pasbil; li jujucoje yich'oj lajuneb xcha'vinic (30) cuartoetic. Li spac'benal ch'ulnae chbic'taj batel ta jujucoj li cuartoetique, yu'un quechajtic comen scajleb li sts'amte'altac cuartoetique, yu'un jech mu xjelov ta jot c'alna li ts'amte'etique.

⁷ Ta spat li cuartoetic ti sjoyibtaojic li ch'ulnae, oy tec'ubal xmuy batel c'alal ta toyol. Jech xu' chijmuy batel c'alal ta yoxcojal.

⁸ Li mero ch'ulnae lec toyol scajleb pasbil laj quil. Ta scajlebe ja' te liquemic spasel ec li cuartoetique. Li snaclebe oxib metro stayal.

^9-10 Li yan jc'ol c'alna ta spat li cuartoetique ja' o'lol yoxibal metro spimil. Ta spat xocon li ch'ulna, li cuartoetic, xchi'uc li cuartoetic sventa paleetique oy lec muc' yamaq'uil ta joyob. Ja' lajuneb metro sjamalil ta joyob.

¹¹ Li cuartoetique xi loq'uemic batel sti' ta stuq'uil li yamaq'uil ta joyobe, sq'ueloj batel ta stuq'uil norte xchi'uc ta stuq'uil sur. Ta scotol ti c'u snatil sti' li yamaq'uile yich'oj latsel ton; ja' o'lol yoxibal metro sjamlej.

¹² Ta spat li yamaq'uil pat ch'ulna ta stuq'uil smaleb c'ac'ale oy jun muc'ta na noxtoc; ja' vo'lajuneb xcha'vinic (35) metro sjamalil, xchi'uc vo'ob yoxvinic (45) metro snatil. Ja' o'lol yoxibal metro sjamalil li spac'benale.

¹³ La sbis noxtoc li mero ch'ulnae; ja' lajuneb yoxvinic (50) metro snatil. Li amac', xchi'uc li naetic, xchi'uc li spac'benale ja' lajuneb yoxvinic (50) metro ta scotol noxtoc.

¹⁴ Li yeloval sti' ch'ulna c'alal ta jujujot yamaq'uil ta xocone ja' lajuneb yoxvinic (50) metro iloc'.

¹⁵ Ts'acal lic sbis c'u snatil li muc'ta na ta spat ch'ulna te ta xocon amaq'ue xchi'uc li scoraltonal ta jujujote; ja' lajuneb yoxvinic (50) metro iloc' noxtoc. Li cha'c'ol cuartoetic ta yute xchi'uc li muc'ta cuarto ta ochebale,

¹⁶ macbilic ta lequil te'. Xlic ta yoc c'alal ta ventanaetic. Li stseltseliltac sti'ti' ventanaetic ta joyobe macbilic ta lequil te' noxtoc.

¹⁷ Ta yac'ol li ti'na ta yochebal ch'ul cuartoetic xchi'uc ta c'alc'alna ta yute te loc'tabil yanal xanetic xchi'uc querubinetic;

¹⁸ lec bisanbil c'u snamal yilojan sba. Li querubinetique cha'jot satic.

¹⁹ Li jot sat ti xco'laj xchi'uc sat cristianoe, ja' sq'ueloj batel li yanal xane; li yan jot sat ti xco'laj xchi'uc leone ja' sq'ueloj batel li yan yanal xan ta jote. Ja' jech pasbil ta scotol li c'alnaetique.

²⁰ Li sloc'obal querubinetique xchi'uc li yanal xanetique xlic ta yoc c'alal ta ventanaetic. Ja' jech pasbil ta scotol c'alc'alnaetic.

²¹ Li yoyaltac ch'ulnae co'ol sjamalil xchanjotal. Li yeloval sti' ch'ul cuartoe ja' jech chac c'u cha'al li yan yeloval sti' ochebale.

²² Li scajleb smoton Dios pasbil ta te'e ja' o'lol xchibal metro stayalil. Ja' jun metro li snatile. Li xchanjotal xchiquin, li sba yac'ol, xchi'uc li xocon-xocone pasbil ta puru te'. Jech laj yalbun: “Li'i, ja' li mexa ti te ono'ox oy o ta stojol Muc'ul Diose”, xiyutun.

Sc'oplal ti'naetic

²³ Li ch'ul cuarto xchi'uc li bats'i lequil ch'ul cuartoe oy chib sti'.

²⁴ Li chib ti'naetique chabchab smac, lec xvelte-velte chjam.

²⁵ Ta smac li sba c'olal cuartoe te loc'tabil sloc'obal querubinetic xchi'uc xanetic. Ja' co'ol jech chac c'u cha'al pasbil ta c'alc'alnaetique. Ta yac'ol li sti' cuarto sventa ochebale oy sti'sical pasbil ta te'.

²⁶ Ta jujujot xocon li stentenail ochebale oy sventanailtac macbil ta chajchajtaq'uin, xchi'uc oy sloc'obal yanal xanetic. Li cuartoetic ti stsacoj sbaic xchi'uc ch'ulnae oy sti'sical jujun noxtoc.