Ezequiel 40 - Bible in Tzotzil de Chenalhó with Deuterocanon

Laj yil ta xch'ulel jbej ch'ulna li Ezequiele

¹ Ta slajunebal c'ac'al yochel li sba u ta yo'bal xcha'vinic (25) jabil jchuquelcutic batel ta yan banamile, laj yac' tal svu'el ta jtojol li Muc'ul Diose, jech ta jch'ulel laj ca'ay laj yic'un batel ta jlumalcutic. Xchanlajunebal (14) jabil xa'ox yochel ta c'abal li lum Jerusalene.

² Ta jch'ulel laj yic'un batel ta yosilal Israel. Te c'ot sva'anun ta jun toyol vits. Laj quil oy jun muc'ta lum te ta stuq'uil sur.

³ Ja' te laj yic'un batel li Diose, jech te laj quil jun vinic va'al ta ti'na xco'laj xchi'uc bronce taq'uin; stsacoj jlic xch'ojon pasbil ta lino no, xchi'uc jch'ix aj sventa oy c'usi tsbis o.

⁴ La sc'opanun li vinique, jech laj yalbun: “Vo'ot xnich'on cristiano, q'uelo lec avil ta asat; a'yo lec ava'ay ta achiquin; ac'o lec ta avo'nton scotol li c'usi chacac'bot avile, yu'un ja' sventa chacac'bot avil ti laj avich' iq'uel tal li'i. Scotol li c'usi chavile albo ya'yic scotol li smomnich'nab Israele”, xiyutun.

⁵ Li ch'ulnae setbil ta coralton. Li aj ti stsacoj laj quile ja' oxib metro snatil. Li vinique lic sbis li coraltone; ja' oxib metro spimil xchi'uc oxib metro stayal.

⁶ Ts'acal ibat ta yochebal ch'ulna ta stuq'uil sloq'ueb c'ac'al; te imuy batel ta scojolcojol tec'ubal. C'ot sbisbe smarcoal ta toyol li yochebal ch'ulnae; ja' oxib metro spimil.

⁷ Li jujun cuarto ta jujujot yochebal ch'ulnae ja' oxib metro ta set. Ti c'u snamal yiloj sba li jujun cuartoetic ta jujujot ochebale ja' o'lol yoxibal metro. Li sti' ochebale ja' oxib metro sjamalil.

⁸ La sbis noxtoc c'u sjamlej li ochebal x'och batel ta yute, ja' oxib metro.

⁹ La sbis noxtoc c'u stayal li ochebale, ja' chanib metro. Li yoyaltaque ja' jun metro syijil. Ta slajeb xa batel li ochebale oy jun muc'ta cuarto te oy noxtoc.

¹⁰ Li oxib cuartoetic ta jujujot ochebal ta sloq'ueb c'ac'ale co'ol smuc'tiquil jujun. Jech noxtoc li oyetic ta jujujote co'ol syijiquil noxtoc.

¹¹ Ts'acal la sbis noxtoc c'u smuc'ul li smac sti' ochebal ti chloc' xa batel ta yamaq'uile; ja' vo'ob metro. Li sjamalil sti'e ja' o'lol svucubal metro.

¹² Ta sti' li jujun cuartoe macbil ta coralton ja' o'lol metro sjamalil; ja' co'ol pasbil ta xcha'jotal. Li jujun cuartoe ja' oxib metro ta set.

¹³ Ts'acal lic sbis noxtoc c'u sjamalil ta scotol li naetique. La sliques ta spac'benal li cuartoetique c'alal to ta yan jot spac'benal li yantic cuartoetique ja' iloc' o'lol yoxlajunebal (12 1/2) metro ta scotol.

¹⁴ La sbis noxtoc li muc'ta cuartoe; ja' lajuneb metro snatil. Li muc'ta cuartoe lec jamal xvinaj batel c'alal ta amac'.

¹⁵ Ti c'u snatil ta scotol ti xlic ta sti' yochebal c'alal to ta yan muc'ta ti'na sventa amaq'ue, ja' vo'ob xcha'vinic (25) metro ta scotol.

¹⁶ Li jujun cuartoetique oy biq'uitic sventanail xchi'uc xchajchajtaq'uinal. Jech noxtoc li muc'ta cuartoe oy sventanail ta joyob. Ta yoyaltaque te loc'tabil yanal xanetic.

Sc'oplal yamaq'uil ch'ulna ta amac'

¹⁷ Li vinique laj yic'un batel noxtoc ta yamaq'uil li ch'ulnae. Li amaq'ue latsbil ton ta sti'ti' ta joyob, xchi'uc oy lajuneb xcha'vinic (30) cuartoetic ta joyob.

¹⁸ Li tone te liquemic slatsel ta jujujot xocon li naetic ta yochebal ch'ulnae. Ja' ta jcoj olon jutuc liquem slatsel li tone. Li sjamalile co'ol sjamalil xchi'uc li naetique.

¹⁹ Li vinique la sbis c'u snamal xil sbaic li sti' yochebal xch'ulna xchi'uc li sti' yochebal sventa yamaq'uil yute; ja' lajuneb yoxvinic (50) metro yiloj sbaic.

Sc'oplal ti'na ta stuq'uil norte

²⁰ Oy jun ochebal noxtoc te ta stuq'uil norte sventa li sbac'olal amaq'ue. Li vinique la sbis noxtoc c'u sjamlej xchi'uc c'u snatil.

²¹ Li ochebale oy oxib cuarto ta jujujot noxtoc. Li yoyaltac xchi'uc li jun muc'ta cuartoe co'ol smuc'tiquil jech chac c'u cha'al li sba ochebal ta stuq'uil sloq'ueb c'ac'ale. Ja' vo'ob xcha'vinic (25) metro li snatile; ja' o'lol yoxlajunebal (12 1/2) metro li sjamalile.

²² Li muc'ta cuarto te ta ochebal batele xchi'uc li ventanaetique xchi'uc li sloc'obal xanetique, co'ol smuc'tiquil jech chac c'u cha'al pasbil te ta sba ochebal ta sloq'ueb c'ac'ale. Oy vuccoj stec'ubalil noxtoc. Li muc'ta cuartoe te oy ta yut.

²³ Li sti' ochebal ta norte sventa sba c'olal amaq'ue lec sq'ueloj sbaic xchi'uc li sti' ochebal ta sventa xcha'c'olal amaq'ue. Ja' jech noxtoc li ochebal ta sloq'ueb c'ac'ale. La sbis c'u snamal yilojan sba li ti'naetique ja' lajuneb yoxvinic (50) metro.

Sc'oplal ti'na ta sur

²⁴ Li vinique laj yic'un batel noxtoc ta yan ochebal ta stuq'uil sur. La sbisbe noxtoc li yoyaltac xchi'uc li muc'ta cuartoe; co'ol iloc' yu'un jech chac c'u cha'al li yantique.

²⁵ Li cuartoetic xchi'uc li muc'ta cuartoe oy sventanail ta joyob jech chac c'u cha'al li yantique. Ti c'u snatil ta scotole ja' vo'ob xcha'vinic (25) metro, ja' o'lol yoxlajunebal (12 1/2) metro sjamalil.

²⁶ Oy vuccoj tec'ubal noxtoc te ta sti'. Li muc'ta cuartoe ta yut to oy. Li yoyaltaque oy jujun sloc'obal xan ta jujujot xocon.

²⁷ Li xcha'c'olal amac' ta yute oy jun sti' yochebal noxtoc te ta stuq'uil sur. Li vinique la sbis c'u snamal yiloj sbaic xchi'uc li yan ti'na sventa ochebal ta sba c'olal amaq'ue; ja' lajuneb yoxvinic (50) metro.

Sc'oplal yamaq'uil ta yut xchi'uc yochebal ta sur

²⁸ Ts'acal laj yic'un batel noxtoc ta xcha'c'olal amac' te ta ti'na ta stuq'uil sur. Lic sbis li ti'nae; ja' co'ol smuc'ul jech chac c'u cha'al li yantique.

²⁹ Li cuartoetic ta jujujot, xchi'uc li yoyaltac, xchi'uc li muc'ta cuartoe ja' co'ol smuc'ul jech chac c'u cha'al li yantique. Li cuartoetique xchi'uc li muc'ta cuartoe oy sventanail ta joyob noxtoc. Li snatile ja' vo'ob xcha'vinic (25) metro, li sjamalile ja' o'lol yoxlajunebal (12 1/2) metro.

³⁰ Li muc'ta cuartoe ja' o'lol yoxlajunebal (12 1/2) metro snatil; ja' vo'ob metro sjamalil.

³¹ Li muc'ta cuartoe xi xtal ta stuq'uil sba c'olal amac'. Ta yoyaltaque te loc'tabilic xanetic. Li sti' ochebale oy vaxaccoj stec'ubal.

Sc'oplal yamaq'uil ta yut, xchi'uc yochebal ta sloq'ueb c'ac'al

³² Ts'acal laj yic'un batel noxtoc ta yamaq'uil ta yut ta stuq'uil sloq'ueb c'ac'al. La sbis li sti' ochebale; co'ol iloc' jech chac c'u cha'al li yantique.

³³ Li cuartoetic, li yoyaltac, xchi'uc li muc'ta cuartoe co'ol smuc'tiquil jech chac c'u cha'al li yantique. Li cuartoetic xchi'uc li muc'ta cuartoe oy sventanail ta joyob. Ja' vo'ob xcha'vinic (25) metro snatil ta scotol, xchi'uc o'lol yoxlajunebal (12 1/2) metro sjamalil.

³⁴ Li smuc'ta cuartoile xi xtal ta stuq'uil sba c'olal amac' noxtoc. Ta yoyaltaque te loc'tabilic yanal xanetic ta jujujot. Li sti' yochebale oy vaxaccoj stec'ubal sventa chijmuy batel.

Sc'oplal yamaq'uil ta yut, xchi'uc sti' yochebal ta norte

³⁵ Li vinique laj yic'un batel noxtoc ta jot yamaq'uil ta yut ta stuq'uil norte. La sbisbe li sti' yochebale; co'ol iloc' yu'un jech chac c'u cha'al li yantique.

³⁶ Oy cuartoetic ta jujujot noxtoc, xchi'uc yoyaltac, xchi'uc muc'ta cuarto, xchi'uc oy sventanail ta joyob. Ti c'u snatil ta scotol noxtoque ja' vo'ob xcha'vinic (25) metro, xchi'uc o'lol yoxlajunebal (12 1/2) metro sjamalil.

³⁷ Li smuc'ta cuartoile xi xtal ta stuq'uil sba c'olal amac' noxtoc. Ta yoyaltaque te loc'tabil yanal xanetic ta jujujot xocon. Li sti' yochebale oy vaxaccoj stec'ubal sventa chijmuy batel.

Sc'oplal cuartoetic snitoj sba, xchi'uc ochebal ta norte

³⁸ Oy jun cuarto noxtoc te stsacoj sba xchi'uc li ochebale. Ja' te la spoquic li smoton Dios la xchiq'uique.

³⁹ Ta cuarto te ta ochebale oy chancot mexa te oy, chib ta jujujot. Ja' sventa te tsmilic o li smoton Dios chchiq'uique, xchi'uc li smoton Dios sventa xch'ayubil mulile, xchi'uc li smoton Dios sventa c'unil muliletique.

⁴⁰ Ta jot xocon ti bu scojolcojol tec'ubal xmuy sventa ochebal ta nortee, oy chib mexa te oy noxtoc, xchi'uc oy yan chib ta yan jot xocon li ti'na sventa ochebale.

⁴¹ Ja' yu'un oy chanib mexa ta yut, oy chanib mexa ta sti'; ja' vaxquib mexa ta scotol. Li mexaetique ja' sventa te tsmilic o li matanaletique.

⁴² Li chanib mexa sventa smilubil matanale ta puru anbil ton pasbil. Jutuc mu sta chanch'ix snatil; li sjamalile ech'em jutuc ta oxch'ix; ja' o'lol yoxch'ix li stayalile. Ja' te laj yaq'uic li yabtejebic sventa tsmilic o matanaletique.

⁴³ Ta c'alc'alna yo' bu oy mexae, ac'bil xotajtic taq'uin ta joyob; ja' jch'ix snatiquil. Ja' te tstaic tal li ti'bol laj yaq'uic ta ba mexae.

⁴⁴ Te ta xcha'c'olal amac' ta sts'el ti'na ta stuq'uil nortee ja' te oy chib cuartoetic. Li cuartoetique xi sq'uelojic batel ta stuq'uil sur. Oy jun cuarto te ta xocon li sti' ochebal ta sloq'ueb c'ac'ale; ja' sq'ueloj batel ta stuq'uil norte.

⁴⁵ Jech laj yalbun li vinique: “Li cuarto sq'uelojic batel stuq'uil sure, ja' sventa li paleetic ti chchabiic ch'ulna yu'un Diose.

⁴⁶ Yan li cuarto sq'ueloj batel stuq'uil nortee ja' sventa li paleetic ti chchabiic li scajleb smoton Diose. Ja' li xnich'nab Sadoque, ja' li smomnich'nab Leví ta vo'one ti ja' ono'ox chtunic yu'un Diose”, xiyutun.

Sc'oplal amac' ta yut, xchi'uc li ch'ulnae

⁴⁷ Li vinique la sbisbe li yamaq'uil ta yute; ja' lajuneb yoxvinic (50) metro ta set. Li scajleb smoton Diose te oy ta yeloval sti' ch'ulna.

⁴⁸ Li vinique laj yic'un batel ta stentenail li yochebal mero ch'ulnae. La sbisbe yoyaltac li ochebale; ja' o'lol yoxibal metro smuc'ul jujun. Li ti'nae vucub metro sjamalil; ja' jech ta jot sjol noxtoc.

⁴⁹ Li stentenaile lajuneb metro sjamalil; ja' vaquib metro snatil. Oy lajuncoj tec'ubal sventa chijmuy batel. Ta sts'el li jujubej yoyaltac ti tselajtic pasbile oy yan jujubej balajtic oy te ta sts'el noxtoc.