Ezequiel 4 - Bible in Tzotzil de Chenalhó with Deuterocanon

Tsta yorail chich' vuq'uesel li Jerusalene

¹ Jech laj yalbun noxtoc li Muc'ul Diose: “Vo'ot xnich'on cristiano, tsaco jbejuc xamit, ac'o ta atuq'uil; pasbo sloc'obal lum Jerusalén te ta sba.

² Setubil ta epal soldadoetic xapas, xchi'uc paso tec'ubaletic sventa chmuyic ochel li soldadoetique. Ac'o epal lum noxtoc sventa tec'ubal. Setuo ta epal carpanaetic; setuo ta soldadoetic ta joyob, stsacojic svuq'uesubil coralton xapas.

³ Tsaco junuc sepsep taq'uin; tselano ta o'lol avu'un xchi'uc li lume. Ja' xq'uexol coralton chc'ot li sepsep taq'uine. Va'ano lec aba, q'uelo lec batel li lume jech chac c'u cha'al chapas xa pleito achi'uc yilel. Ja' senyail ta sventa li achi'iltac ta israelale.

Senyail chich'ic chuquel batel ta scoj smulic

⁴ “Ts'acal xamochan aba ta stuq'uil ats'etc'ob, yu'un vo'ot chacuchbe smul li achi'iltac te ta Israele. Ti jayib c'ac'al te mocholote, ja' stojol smul li achi'iltaque.

⁵ Li smul achi'iltaque ja' vo'lajunvinic xchi'uc lajuneb yo'vinic (390) c'ac'al ta tojel; ja' jun c'ac'al sventa jujun jabil.

⁶ C'alal tsts'aqui jech yepal c'ac'ale, xlic amochan aba ta bats'ic'ob. Yu'un vo'ot chacuchbe smul noxtoc li achi'iltac te ta Judae. Ja' cha'vinic (40) c'ac'al ta tojel; jun c'ac'al sventa jujun jabil noxtoc.

⁷ Ts'acal xajoyij batel ta stuq'uil li sloc'obal Jerusalén ti setubil ta yajcontrae. Ye'o ac'ob ta stojol; alo c'usi chc'ot ta pasel ta stojol.

⁸ Vu'un ta jchucot ta ch'ojon, jech mu xu' chajoyij ta jujujot, ja' to me its'aqui ti jayib c'ac'al oy avocole.

Vocol sventa vi'nal

⁹ “Ts'acal xatsac jutuc trigo, cebada, chenec', arabejo, ixim, xchi'uc avena; ac'o ta junuc jay. Ja' meltsano ta ave'el; ja' chave' ti c'alal te mocholot vo'lajunvinic xchi'uc lajuneb yo'vinic (390) c'ac'ale.

¹⁰ Ti c'u yepal tsc'an chave' ta jujun c'ac'ale ja' cuarto kilo no'ox, pero tsc'an oy lec yorail chave'.

¹¹ Jech noxtoc li vo' chavuch'e, ja' no'ox o'lol litro ta jun c'ac'al, pero tsc'an oy lec yorail chavuch' noxtoc.

¹² Ve'an junuc pan pasbil ta cebada, ta'ajesbil ta stso' cristiano xapas. Ja' te xapas ti bu xu' chil li cristianoetique”, xiyutun.

¹³ Jech laj yalbun noxtoc: “Li ve'lil jech chac le' ti mu stac' ve'ele, ja' jech chc'ot sve'ic li achi'iltac ta israelal ti bu banamil ta jpuc batele”, xiyutun.

¹⁴ Jech la jtac'be: “Ay, Cajval Muc'ul Dios, li vu'une mu'yuc baq'uin jsoquesoj jba. Ta jbic'tal ono'ox mu baq'uin jti' c'usi chamen, xchi'uc c'usi milbil ta chonbolom. Mu'yuc baq'uin jtic' ta que li c'usi mu stac' ti'ele”, xcut.

¹⁵ Jech la stac'bun: “Lec oy, xu' ta xcac' atunes tso' vacax ta xq'uexol stso' li cristianoe; ja' xata'ajes o li apane”, xiyutun.

¹⁶ Jech laj yalbun noxtoc: “A'yo ava'ay, ta xcac' taluc vi'nal te ta Jerusalén, jech bisbil xa no'ox, ta at-o'nton xa no'ox chve'ic. Jech noxtoc bisbil xa no'ox, ta xi'el xa no'ox chuch'ic li vo'e.

¹⁷ Ta xlaj li sve'elique xchi'uc li ya'alique, te xa no'ox sq'uelq'uelbe sba satic ta xi'el; te ta xlajic o ta scoj smulic”, xiyutun.