Ezequiel 39 - Bible in Tzotzil de Chenalhó with Deuterocanon

Chlaj sc'oplal o li Goge

¹ “Ja' yu'un albo ta jamal smul li Goge: ‘Jech chal li Cajvaltic Muc'ul Diose: A'yo ava'ay Gog, vu'un chajcontrainot, vo'ot li mero banquilalot yu'un li lum Mesec xchi'uc Tubale.

² Vu'un chaquic'ot batel, chajtojobtasot batel. Chaquic'ot loq'uel te ta norte banamil, yu'un ta jc'an chabat ta yosilal Israel.

³ Ts'acal ta jc'asbot li st'ilesubil aflecha te atsacoj ta ats'etc'obe; ta jipbot yalel li flechaetic te atsacoj ta abats'ic'obe.

⁴ Te chc'ot yalan ta lum ta vitsetic yu'un Israel. Chamen chayal ta lum li vo'ote xchi'uc scotol li avajsoldadotaque xchi'uc scotol li yantic lum chachi'in batele. Ta xcac'ot ta sve'el xulemetic, xchi'uc ta sve'el chonbolometic ta te'tic.

⁵ Te mochol chacham ta osilaltic. Vu'un chcal jtuc, vu'un li Muc'ul Diosune.

⁶ Ja'o chlic jtac batel c'oc' ta stojol li Magoge xchi'uc ta stojol li boch'otic jun yo'ntonic te nacajtic ta banamil cacajtic ta nabe, yu'un jech ac'o sna'ic ti vu'un Muc'ul Diosune.

⁷ Chcac' ta ilel smuc'ul jch'ulbi te ta stojol li jteclumal israeletique. Mu'yuc xa bu chcac' o ta soquesbel sc'oplal li jch'ulbie, jech tsna'ic o scotol yantic banamil ti vu'un Muc'ul Diosune, ti vu'un Ch'ul Diosun yu'un li Israele.

⁸ A'yo ava'yic, ta xa xtal, ta xa xc'ot ta pasel li c'usi laj cale, yu'un vu'un chcal jtuc, vu'un li Muc'ul Diosune’, uto.

⁹ “Li jnaclumetic ta lumetic te ta Israele ta to xliquic ta xchiq'uel scotol li abtejebaletique, li macubbailetique, li st'ilesubil flechaetique, li flechaetique, xchi'uc li jich'il taq'uinetique, xchi'uc li lanzaetique. Vucub jabil ta xchiq'uic ta c'oc'.

¹⁰ Mu xa persauc chbat sa'ic tal si'ic ta te'tic; mu xa persauc chbat sts'etic te'etic. Ja' xa si'ic chc'ot scotol li abtejebaletique. Ta xlic yich'beic c'usitic oy yu'unic ec li boch'otic i'ich'bunuc c'usitic oy yu'unique; ta spojbeic c'usitic oy yu'unic ec li boch'otic ipojbunuc c'usitic oy yu'unique.

¹¹ “Me ic'ot li sc'ac'alil le'e, ta xcac'be smuquinal te ta Israel banamil li Goge. Ja' smuquinal chc'ot cu'un li soplejaltic yo' bu sbeic li boch'otic chliquic tal ta sloq'ueb c'ac'al yu'un nabe. Jech ta xmac sbeic o scotol li jxanubaletique, yu'un ja' te ta xich' muquel li Goge xchi'uc scotol li yepal xchi'iltaque. Li soplejaltique Hamón-gog chc'ot sbi.

¹² Scotol li israeletique vucub u puru muclumajel tspasic sventa chch'ubaic scotol li yosilalique.

¹³ Scotol jteclum ta xlic muclumajicuc. Ja' jna'ubil chc'ot ta sventaic, yu'un chilic jlequilal cutsilal, vu'un li Muc'ul Diosune.

¹⁴ C'alal me its'aqui li vucub ue, chlic sa'ic jtsob j'abteletic yu'unic sventa chanic scotol li yosilalique, yu'un tslajesbeic smuquel scotol ti butic comenic toe, yu'un jech lec ch'ubabil chcom scotol li yosilalique.

¹⁵ Me oy bu la stabeic sbaquil animaetic li boch'otic ta xanic scotol li yosilalique, chac'be comel senyail ta sts'el, ja' to me laj yo'ntonic ta muclumajel te ta soplejaltic ta Hamón-gog li yantic jmuclumajeletique.

¹⁶ Jech lec chcom o li banamile. Li lum te ta nopol smuquinalique Hamona chcom sbi”, xi li Diose.

¹⁷ Li Muc'ul Diose jech laj yalbun noxtoc: “Jech xavalbe scotol li jaychop mutetique xchi'uc scotol li chonbolometique: ‘La'ic me, tsobo abaic tal. La' tsopoltaic scotol ta buyuc no'ox li muc'ta matanal cac'ojboxuc li' ta yosilal Israele. La' ti'anic ti'bol; la' uch'anic ch'ich'.

¹⁸ La' ti'beic sbec'tal li soldadoetique; la' uch'beic xch'ich'al li banquilaletic ta banamile. Ja' jechic jech chac c'u cha'al chijetic, ch'ium chijetic, tot tentsunetic, vacaxetic, tot vacaxetic ti lec jubenic te ta Basane.

¹⁹ Chave'ic lec li xepue, lec chnoj ach'utic o. Chavuch'beic lec xch'ich'al li amotonic chacac'boxuque, jech chlic yacubanic yu'un.

²⁰ Ta jchapanboxuc lec ave'elic, ja' li sbec'tal ca'etic, li sbec'tal soldadoetic cajajtic ta ca' chanovique, xchi'uc li sbec'tal yantic soldadoetique, xchi'uc scotol li yantic jpaspleitoetique’, uto.

²¹ “Ta xcac' ta ilel jmuc'ul ta stojol li yantic banamile. Scotol jujun muc'tic lum chilic ti c'u x'elan chapanel chcaq'ue xchi'uc c'usi chc'ot ta pasel ti c'alal ta xcac' jc'ob ta stojolique.

²² Ta sc'ac'alil le'e ja' yorail chlic sna'ic o batel scotol israeletic ti vu'un Muc'ul Diosun yu'unique.

²³ Jech chlic sna'ic yantic banamil ti ta scoj smulic laj yich'ic chuquel batel ta yantic banamil li israeletique, xchi'uc ti ta scoj la stoy sbaic ta jtojole. Jech la jnac' jsat ta stojolic; laj caq'uic ta sc'ob yajcontraic, jech ilajic ta milel ta espada.

²⁴ Ja' jech la jpasbeic ti c'u x'elan sbolilique, ti c'u x'elan stoyobbailic ta jtojole, jech la jnac' jsat o ta stojolic.

²⁵ “Ja' yu'un jech chcal vu'un li Muc'ul Diosune: Li' ta orae ta xquic' sutel li jchuqueletic yu'un Jacobe; ta xlic c'uxubajuc ta co'nton scotol li smomnich'nab Israele, yu'un tsots sc'oplal chca'ay chcac' ta ich'el ta muc' li jch'ulbie.

²⁶ C'alal jun xa yo'ntonic mu'yuc xa xi'el cha'yic te nacal ta yosilalique, chlic ch'ayuc ta yo'ntonic li q'uexlale, li stoyobbailique, xchi'uc li xchopolilic la spasic ta jtojole.

²⁷ C'alal me la jloq'uesic tal ta yantic lume, c'alal me la jtsobic loq'uel tal te ta yosilal yajcontraique, chlic vinajuc ta sventaic ti vu'un Ch'ul Diosune; ep yantic banamiletic chlic yilic.

²⁸ C'alal me laj xa'ox jloq'uesic tal ta yantic banamil ti bu chucbil ibatic cu'une, me laj xa'ox quiq'uic tal ta yosilalique, me mu xa junuc la jcomtsanic ta yantic banamile, jech chlic sna'ic o ti vu'un Muc'ul Diosun yu'unique.

²⁹ Mu'yuc xa bu chlic jnac' jsat ta stojolic yan velta, yu'un ta xcac'be ta stojolic Espíritu cu'un scotol li smomnich'nab Israele”, xi li Muc'ul Diose.