Ezequiel 37 - Bible in Tzotzil de Chenalhó with Deuterocanon

Icuxiic epal taqui-baquetic

¹ Li Muc'ul Diose laj yac' sc'ob ta jba, jech ta stsatsal svu'el laj yic'un batel; te c'ot sva'anun ta jun soplejal nojem ta baquetic.

² Laj yac'bun jq'uel ta joyob; te laj quil scotol. Laj quil ti bats'i ep ta jyalel li baque smacoj scotol li soplejale, puru taqui-baquetic xa.

³ Jech laj yalbun: “Xnich'on cristiano, ¿me xu' to chcuxiic xana' li baquetic le'e?”, xiyutun. Jech la jtac'be: “Cajval, Muc'ul Dios, vo'ot no'ox atuc xana'”, xcut.

⁴ Jech laj yalbun: “Jech xavalbe ta jbi li taqui-baquetic le'e: ‘Taqui-baquetic, a'yo ava'yic, jech chal li Muc'ul Diose:

⁵ Vu'un ta xcac' avich'ic ic' yan velta, jech chacuxiic.

⁶ Ta xcac'boxuc ach'uxuvilic, ta xcac'boxuc abec'talic, ta xcac'boxuc anuculilic, ta xcac'boxuc ach'ulelic, jech chacuxiic; jech chana'ic o ti vu'un Muc'ul Diosune, xi li Diose’, uto”, xiyutun.

⁷ Jech lic calbeic jech chac c'u cha'al laj quich' albele. C'alal ja'o chic'opoje, laj ca'ay oy c'usi ibac'. Xchac'lajetic liquel li baquetique, jech lic stsacan sbaic ti bu xchi'iltac ono'ox sbaique.

⁸ Laj quil lic snitan sba ta xch'uxuvilic. Lic ayinuc sbec'talic; lic ayinuc snuculilic, pero mu'yuc chich'ic ic'.

⁹ Jech laj yalbun li Muc'ul Diose: “C'opano li iq'uetique, jech xavalbe: ‘Iq'uetic, jech chal li Muc'ul Diose: Totsanic tal ta xchanjotal xchiquin banamil; la' juch'taic li animaetic li'i, yu'un jech ac'o cuxiicuc, xi li Diose’, uto”, xiyutun.

¹⁰ Jech lic calbeic jech chac c'u cha'al laj yalbun li Diose, jech lic ochuc ic' ta stojolic; jech icuxiic, lic va'iicuc. Pero bats'i epic ta jyalel, xco'laj xchi'uc epal soldadoetic yilel.

¹¹ Jech lic yalbun li Muc'ul Diose: “Xnich'on cristiano, li taqui-baquetic le'e, ja' li jun lum Israele. Jech chalic: ‘Itaquijan xa o li jbaquiltique; ich'ay xa batel li smuc'ul co'ntontique, lajemutic o jcotoltic’, xiic.

¹² Ja' yu'un jech xavalbe ya'yic: ‘Jech chal li Cajvaltic Muc'ul Diose: Jteclumal, a'yo ava'yic, ta jamboxuc li amuquinalique; ta xcac' loc'anic tal ta amuquinalic; ta xquic'oxuc batel ta yosilal li Israele.

¹³ C'alal ta jam li amuquinalique, c'alal ta xcac' loc'anic batele, jech chana'ic o ti vu'un Muc'ul Diosune.

¹⁴ Ta xcac'boxuc avich'ic li ic' cu'une jech chacuxiic; te chbat cac' naclanic ta avosilal atuquic. Jech chana'ic o ti vu'un Muc'ul Diosune, vu'un chic'opoj jtuc, ta persa jech ta jpas, xi li Diose’, uto”, xiyutun.

La stsob sbaic ta jun no'ox slumalic li Judá xchi'uc Israele

¹⁵ La sc'opanun yan velta li Muc'ul Diose, jech laj yalbun:

¹⁶ “Vo'ot xnich'on cristiano, tsaco jch'ixuc te'; ts'ibao jech chac li'i: ‘Judá xchi'uc Israel jmoj yo'ntonic’, xi xats'iba. Tsaco ta ora yan jbejuc te' noxtoc, jech xats'iba: ‘José, xq'uexol Efraín, xchi'uc israeletic jmoj yo'ntonic’, xi xats'iba.

¹⁷ Ja'o xlic atsac ta ora ta jun ac'ob, ac'o snup sba sjol avu'un; jch'ix xa no'ox te' ac'o c'otuc avu'un yilel.

¹⁸ C'alal me jech chasjac'bot li achi'iltaque: ‘Albuncutic c'usi smelol le'e’, me xayutoxuque,

¹⁹ jech xavalbe: ‘Jech chal li Cajvaltic Muc'ul Diose: A'yo ava'yic, vu'un ta jtsacbe li ste' José ti te oy ta sc'ob Efraine xchi'uc li yantic smomnich'nab Israel ti jmoj yo'nton xchi'uque; ta jpas ta jun xchi'uc li ste' Judae, jech jch'ix xa no'ox te' oy ta jc'ob chc'ot, xi li Diose’, uto.

²⁰ Li cha'ch'ix te' chats'ibae tsaco ta ac'ob ta sat scotolic,

²¹ jech xavalbeic: ‘Jech chal li Cajvaltic Muc'ul Diose: A'yo ava'yic, vu'un ta jtsob sutel tal scotol li smomnich'nab Israel ti butic spucoj sbaic batel ta yantic banamile. Ta jtsob tal scotol; ta xquiq'uic sutel tal ta yosilal stuquic.

²² Jun no'ox slumal chc'otic cu'un te ta yosilal li Israele; jun no'ox ajvalil yu'unic ta scotolic. Muc xa cha'voc'uc ta xc'otic; mu'yuc xa voc'ol li yosilalic bu c'alal tsventainique.

²³ Mu'yuc xa chlic sbolibtas sbaic ta yich'el ta muc' li sloc'obaltac sdiosique; mu'yuc xa chlic spasic scotol li c'usitic yan chopole. Vu'un ta jcoltaic ta sventa scotol li smulique, ta jpocbeic loq'uel scotol li xchopolilique. Ja' jteclumal chc'otic o, vu'un Diosun yu'unic chic'ot ec.

²⁴ Ja' no'ox ajvalil chc'ot yu'unic o li smomnich'on cajtunel Davide, xchi'uc ja' no'ox jchabivanej chc'ot o yu'unic. Jech chlic xch'unic li mantaletic, li chanubtaseletic cu'une; ja' chlic spasilanic o batel.

²⁵ Te chlic naquiicuc o ta yosilalic ti bu laj ono'ox cac'be li cajtunel Jacob ta vo'onee, ja' ti bu inaquiic li amoltot ayame'ique. Te chlic naquiicuc o xchi'uc xnich'nabic xchi'uc smomnich'nabtaquic. Ja' banquilal chc'ot o yu'unic li smomnich'on cajtunel Davide.

²⁶ Ta jchapan jchi'uc ti jun yo'ntonic te chcac' naquiicuc oe, jech chapal chcom o. Te chcac' comicuc o; ta xcac' bolicuc. J'ech'el chcac'be o ta stojolic li ch'ulna cu'une.

²⁷ Te chinaqui o ta stojolic; vu'un Diosun yu'unic chic'ot, ja' jteclumal chc'otic o ec.

²⁸ Jech tsna'ic o yantic banamil ti vu'un jtuc Muc'ul Diosun la jts'u'iltas yan velta li israeletique, yu'un j'ech'el te chcom o ta stojolic li ch'ulna cu'une, xi li Diose’, uto”, xiyutun.