Ezequiel 36 - Bible in Tzotzil de Chenalhó with DeuterocanonTa to xlecub yan velta li Israele 1 “Li vo'ote xnich'on cristiano, albo c'usi chc'ot ta pasel ta stojol li vitsetic ta Israele, jech xavalbe: Vitsetic ta Israel, a'yo ava'yic c'usi chal li Cajvaltic Muc'ul Diose: 2 Jech chal: ‘Li avajcontraique xcuxet no'ox yo'ntonic, jech laj yalic ta atojolic: ¡Toj lec, vu'utic xa chcu'unintic o li toyol vitsetic le'e!, xiic. 3 Yu'un la syavnaijesoxuc o, la sbic'oxuc ta sc'ac'al yo'ntonic, la'ochic o ta sc'ob yantic banamil; solel na'lebiloxuc, bajbiloxuc yu'un li jujun lume. 4 Ja' yu'un, vitsetic ta Israel, tseltseltic, bevo'etic, soplejaltic, yavnaetic, lumetic, vo'oxuc ti yavnaijemoxuc oe, vo'oxuc ti lalajic ta elc'anel, ta labanel yu'un li yantic lum ats'aquinojan aba achi'uquique, a'yo ava'yic c'usi chcal vu'un li Muc'ul Diosune, vu'un li Avajvalicune. 5 Jech chcal vu'un li Muc'ul Diosune: Li jc'ope tsanajtic ta sc'ac'al co'nton chbat ta stojol li yantic banamile xchi'uc ta scotol li yosilal Edome. Yu'un stse'inic no'ox, xcuxet no'ox yo'ntonic la spojic li banamil cu'une. Ta scotol xchopolil sjol yo'ntonic la sloq'uesic scotol li c'usitic te oye’, xi li Diose. 6 “Jech xavalbe ya'yic ta jventa li vitsetic ta Israele: ‘Vo'oxuc vitsetic, tseltseltic, bevo'etic, soplejaltic, jech chal li Muc'ul Diose: A'yo ava'yic, toj it'ix co'nton, tsots chi'ilin c'alal chic'opoj, yu'un toj ep chopolc'optael laj yac'boxuc li yantic banamile. 7 Ja' yu'un chacalboxuc ava'yic vu'un li Muc'ul Diosune: Ta xcal ta jamal ti ta to xyalic ta tsots q'uexlal li yantic banamil ats'aquinojan aba achi'uquique. 8 Yan li vo'oxuque vitsetic ta Israel, chapixic ta muc'tic te'etic. Lec pimic chac' sc'obc'ob, lec pim chac' sat ta sventa li jteclumal israeletique, yu'un jutuc xa sc'an sutic tal. 9 Li' oyun o ta atojolic; li' chisut tal ta atojolic noxtoc. Chlic avich'ic abtelanel; chlic avich'ic ts'unbel abelic. 10 Ta xcac' boluc li israeletic ti c'alal li' chvul naquiicuc ta atojolique. Ta xnoj ta cristianoetic li lumetique; ta xich' va'anel yan velta li lumetic ti jinesbilique. 11 Ta jboles ep jnaclumetic avu'unic, xchi'uc ta jbolesbe ep sts'unub yovolic. Ech'em to jech ta jboles jech chac c'u cha'al ta ba'yuc; ech'em to lec chbatic jech chac c'u cha'al ta sliqueb. Jech chana'ic o ti vu'un Muc'ul Diosune. 12 Vitsetic ta Israel, te ta xvul cac' xanovicuc ta atojolic li jteclum cu'une. Te chlic yich' yosilic ta atojolic, vo'oxuc yu'unoxuc chac'otic o; mu'yuc xa bu chlic ati'beic yol xnich'onic. 13 Yu'un li vo'oxuque jech to'ox la'albat ac'oplalic: Jti'vanej, ja' tsmilbe yol xnich'on li jnaclumetic yu'une, xi ac'oplalic. 14 Jechuc. Ja' yu'un jech chacalboxuc vu'un li Muc'ul Diosune: Mu'yuc xa bu chati'ic cristianoetic; mu'yuc xa bu chamilbeic yol xnich'on li jnaclumetic avu'unique. 15 Mu'yuc xa bu chava'yic chopolc'optael yu'un li yantic banamile; mu'yuc xa bu abul abaic ta na'leel yu'un li yantic lume, yu'un mu'yuc xa bu chamilbeic xnich'nab li jnaclumetic avu'unique, xi li Muc'ul Diose’, uto”, xiyutun li Diose. 16 La sc'opanun yan velta li Muc'ul Diose jech laj yalbun: 17 “Vo'ot xnich'on cristiano, c'alal li' to'ox nacalic ta yosilal stuquic li israeletique, solel la sbolibtas sbaic ta sventa li c'usi la spasique. Ja' jech laj quilic jech chac c'u cha'al li c'usi toj chopol ti toj j'i'lal sbae. 18 Ja' yu'un la jmal sc'ac'al co'nton ta stojolic, yu'un ep imilvanic te ta yosilalic, xchi'uc la sbolibtas sbaic ta scoj ti laj yich'ic ta muc' sloc'obal sdiosique. 19 Jech la jpuquic batel ta yantic lum; la jtaniic batel ta yantic banamil. Ja' jech la jpasbeic; ja' jech laj cac'be stojic jech chac c'u cha'al stojol tsc'an li yabtelique. 20 C'alal ic'otic ta yantic banamile; te c'ot yaq'uic ta chopolc'optael li jch'ulbie, jech laj yalic li cristianoetique: ‘Li'i, ja'ic li steclumal Muc'ul Dios ta alele, pero inutsatic loq'uel tal ta yosilalic’, xiic. 21 Toj c'ux laj ca'ay c'alal la xchopolc'optabicun jbi yantic banamil ta scoj li israeletic ti butic la spuc sbaic batele. 22 “Ja' yu'un jech xavalbe ya'yic li israeletique: ‘Jech chal li Muc'ul Diose: Li c'usi lec ta jpasboxuque, ma'uc ta sventa toj lecoxuc. Ja' ta scoj li jch'ulbie, yu'un laj avaq'uic ta chopolc'optael ta yantic banamil ti bu laj apuc abaic batele. 23 Ta jlecubtasbe sc'oplal yan velta li jch'ulbi ti laj asoquesbeic sc'oplal ta stojol yantic banamil ti bu apucoj abaic batele. C'alal chcac' ta ilel ta aventaic smuc'ul li jch'ulbie, jech tsna'ic o ti vu'un Muc'ul Diosune. 24 Vu'un jtuc ta xquic'oxuc loq'uel tal te ta stojolic; ta jtsoboxuc loq'uel tal ta yantic lum, ta yantic banamil. Ta xquic'oxuc sutel tal ta avosilalic. 25 Ta jvijoxuc ta lequil vo', jech lec sac chacomic. Ta jpocboxuc loq'uel scotol li avic'ubalic ti toj chopole, xchi'uc ta jipboxuc loq'uel ta avo'ntonic li sloc'obaltac adiosique. 26 Ta xcac'boxuc ach' avo'ntonic xchi'uc ach' atalelic. Ta jloq'uesboxuc li avo'ntonic ti xco'laj xchi'uc tone; ta xcac'boxuc lec c'un avo'ntonic. 27 Ta xcac'boxuc ta atojolic li espíritu cu'une; ta xcac' c'otuc ta pasel avu'unic li mantaletic, li chanubtaseletic cu'une. Ja' ta xcac' apasilanic o batel. 28 Te chanaquiic o ta banamil ti bu laj ono'ox cac'beic li atot ame'ic ta vo'onee. Vo'oxuc jteclumaloxuc chac'otic o, vu'un Diosun avu'unic chic'ot. 29 Ta jcoltaoxuc ta sventa achopolilic. Ta xcac'boxuc tal ep trigo, ta xquepajesboxuc; mu'yuc ta xcac'boxuc tal vi'nal. 30 Ta xcac' satinuc lec li te'etic avu'unique; ta xcac' yac' lec li c'usi chats'un ta avosilique, yu'un jech mu xa xavich'ic labanel yu'un yantic banamil ta scoj vi'nal. 31 C'alal cht'ab ta avo'ntonic ti c'u to'ox xa'elanique, xchi'uc li c'usitic toj chopol laj apasique, chlic q'uexovanic yu'un. 32 Israeletic, ta jc'an chana'ic lec ti muc ja'uc ta aventaic ti jech ta jpase. Li vo'oxuque q'uexovanic, na'le aba atuquic ta scoj li achopolilic, ta scoj li abolilique. 33 ‘Jech chcal vu'un li Muc'ul Diosune: C'alal tsta sc'ac'alil ta jpocboxuc loq'uel scotol li achopolilique, ta xcac' ayinuc yajval noxtoc li lumetique, xchi'uc ta xich' cha'va'anel noxtoc ti bu yavnaijemique. 34 Li banamil ti comtsanbil oe, ta xlic yich' loquel lec, ac'o me la snopic ti j'ech'el laj yich' comtsanel o li boch'otic te ijelovique. 35 Ts'acal jech chlic yalic: Li banamil li'i yavnaijem to'ox, pero tana xco'laj xa xchi'uc ts'unubaltic ta Edén yilel. Li lumetic li'i soquemic to'ox, yavnaijemic to'ox; solel jeche' xch'ijan comenic, pero tana oy xa lec yajval, setbilic xa lec ta tsatsal coralton, xiic. 36 Li yantic banamil ats'aquinojan aba achi'uquique chlic c'otuc ta yo'ntonic ti vu'un la jcha'va'an li c'usi jinesbilic to'oxe, ti vu'un la jcha'nacan lec li c'usi vuq'uemic to'oxe. Vu'un chcal jtuc, vu'un li Muc'ul Diosune; persa ta jpas. 37 ‘Vu'un li Muc'ul Diosune jech chcal: Ta xcac' jba o ta stojolic li smomnich'nab Israele; ta jpasbeic scotol li c'usitic lec jech chac c'u cha'al laj xa cale. Ta jbolesic jech chac c'u cha'al chbol epal chijetic. 38 Li lumetic ti jinemique ta xlic nojuc ta epal cristianoetic; ja' jech chc'otic jech chac c'u cha'al epal chijetic ti t'ujbilic xa ta sventa Dios c'alal yorail q'uin ta Jerusalene. Jech tsna'ic o ti vu'un Muc'ul Diosune’, uto”, xi li Diose. |
Tzotzil Chenalhó DC Bible © Sociedad Bíblica de México, a. c., 2002.
Bible Society of Mexico