Ezequiel 35 - Bible in Tzotzil de Chenalhó with DeuterocanonTstoj smul li jnaclumetic ta vits Seire 1 La sc'opanun yan velta li Muc'ul Diose, jech laj yalbun: 2 “Vo'ot xnich'on cristiano, q'uelo batel li vits Seire;, albo ta jamal ti tstoj smule. 3 Jech xaval: ‘Jech chal li Cajvaltique, ja' li Muc'ul Diose: Vits Seir, vu'un ta jcontrainot; ta xcac' jc'ob ta atojol. Ta jc'atajesot ta xocol banamil; ta jyavnaijesot o. 4 Ta jines scotol li lumetic avu'une; j'ech'el yavnaijem chacom o, jech chana' o ti vu'un Muc'ul Diosune. 5 ‘Yu'un scotol ora laj apas aba o ta yajcontra li israeletique; laj amil ta espada ti c'alal ja'o yorail oy svocolic, ti c'alal ja'o yorail talem chopol ora ta stojolique. 6 Ja' yu'un jech chcal ta jamal vu'un li Muc'ul Diosune, vu'un li Avajvalicune: Ta xacac'ot ta milel; ta xcac' ta malel ach'ich'al ec. Ta xtal stsacot tsots lajel, yu'un muc chopoluc xavil ec ti laj amal ch'ich'e, ja' yu'un ta xich' malel ach'ich'al ec. 7 Vits Seir, ta jyavnaijesot o; ta jc'atajesot o ta xocol banamil. Li boch'otic te chtal, te chbat ta atojole, ta jbul loq'uel. 8 Li vitsetic, li tseltseltic, li soplejaltic, li bevo'etic avu'une ta xnoj ta animaetic ti c'alal chtal milel ta espada ta atojole. 9 Sbatel osil ta jyavnaijesot o. Li lumetic avu'une mu'yuc xa ta xich' va'anel o yan velta, jech chana' o ti vu'un Muc'ul Diosune. 10 Yu'un jech laj aval: Li chib banamil le'e ja' cu'un. Vu'un yajvalun chc'ot xcha'voc'al li banamil le'e, ac'o me ja' te oy li Muc'ul Diose, xachi. 11 Ja' yu'un jech chcal ta jamal, vu'un li Cuxul Diosune: Ja' jech ta jpasbot jech chac c'u cha'al sc'ac'al avo'nton, yit'ixal avo'nton ta stojol li Israele. C'alal ta xcac'bot atoje, jech chlic yotquinicun o li cu'untaque. 12 Jech ec li vo'ote te chana' o ti laj ca'ay, ti la jna' scotol c'u x'elan lac'opoj ta scontra li vitsetic ta Israele. Yu'un jech laj aval: Laj xa yich' soquesel o, bat cac'betic o ya'ay, xachi. 13 Solel toj muc' laj apas aba ta jtojol; ep c'usitic laj aval ta jcontra. Laj ca'ay scotol li c'usi laj avale. 14 Ja' yu'un jech chcal vu'un li Muc'ul Diosune: Ti c'u cha'al xu' xcuxet yo'nton scotol li banamile, ta jyavnaijesot o ta j'ech'el. 15 Yu'un li vo'ote toj xcuxet avo'nton ti c'alal laj yich' jinesel, laj yich' soquesel o li banamil ti ac'bil li Israele, ja' yu'un ja' no'ox jech ta jpasbot ec. Vits Seir, solel xach'ijan chacom o; ja' jech chcom scotol li Edom banamile, jech chana'ic o ti vu'un Muc'ul Diosune’, uto, xi li Diose. |
Tzotzil Chenalhó DC Bible © Sociedad Bíblica de México, a. c., 2002.
Bible Society of Mexico