Ezequiel 34 - Bible in Tzotzil de Chenalhó with Deuterocanon

Ch-ac'bat stoj smul li jchabichijetic ta Israele, ja' li ajvaliletic yu'unique

¹ La sc'opanun yan velta li Muc'ul Diose, jech laj yalbun:

² “Xnich'on cristiano, albo ta jamal smul li jchabichijetic ta Israele, jech xavalbe: ‘Jech chal li Muc'ul Diose, ja' li Cajvaltique, ¡Ay, toj abul abaic vo'oxuc li jchabichijoxuc yu'un Israel ti ja' no'ox chachabi aba atuquique! Li jchabichijetique ¿me mu ja'uc sc'oplal chchabi, tsa'be lec sve'el li chijetique?

³ Li chijetique te chavuch'beic ya'lel xchu'; te chata ac'u'ic ta stsotsil; te chamil ati'ic ti bu lec jubenique, pero mu xamac'linic lec noxtoc.

⁴ Muc xacoltaic ti bu alubenique, muc xapoxtaic ti bu oy xchamelique, muc xapixbeic ti butic tuch'emique, muc xbat aviq'uic sutel tal li boch'o la stamic batel yan bee, muc x'ay at'unic tal li boch'o ich'ayic batele. Ja' no'ox toj tsots lavuts'intaic; toj simarón laj apas abaic ta stojolic.

⁵ Jech ich'ayic batel ta be ta scoj ti mu'yuc xchabielique; la spuc sbaic batel ta buyuc no'ox, jech te ilajic ta ti'el ta chonbolometic ta te'tic.

⁶ Li jchijtaque tanpuc ibatic ta toyol vitsetic, ta tseltseltic. La spuc sbaic batel ta sbejel banamil. Mu'yuc boch'o laj yat yo'nton ta scoj; mu'yuc boch'o x'ay st'un tal.

⁷ ‘Ja' yu'un, jchabichijetic, a'yo lec ava'yic li c'usi ta xcale.

⁸ Vu'un li Avajvalicun, li Muc'ul Diosune, jech chcal ta sventa jbi: Li jchijtaque ilajic ta elc'anel; ilajic ta ti'el yu'un chonbolometic ta te'tic ta scoj ti mu'yuc xchabielique. Yu'un li jchabichijetic cu'une mu'yuc bu tsots sc'oplal laj ya'yic li jchijtaque. Ja' no'ox la xchabi sba stuquic; muc ja'uc la xchabibicun li jchijtaque.

⁹ Ja' yu'un, jchabichijetic, a'yo lec ava'yic c'usi ta xcal, vu'un li Muc'ul Diosune:

¹⁰ Jech chcal vu'un li Muc'ul Diosune, vu'un li Avajvalicune: Li vu'une contra chaquiloxuc. Ta jc'anboxuc sutel scotol li jchijtaque; ta jloq'uesoxuc o ta jchabichij, yu'un jech mu teuc no'ox chachabi aba atuquic. Ta jpojboxuc sutel li jchijtaque, yu'un jech mu alticuc no'ox te chati'ic’, uto.

Sc'oplal lequil jchabichij

¹¹ “Jech chcal vu'un li Muc'ul Diosune: Vu'un jtuc chbat jt'un tal li jchijtaque; vu'un jtuc chlic jchabi.

¹² Jech chac c'u cha'al jun jchabichij ti tsots sc'oplal cha'ay li xchijtac ti butic tanpuc batemique, ja' jech tsots sc'oplal chca'ay ec li jchijtaque. Chbat quic' sutel tal ti bu la spuc sbaic batel ta scoj ti oy jun c'ac'al i'ic'ub osil, ti imac ta toc li banamile.

¹³ Ta xquiq'uic loq'uel tal ta yantic lumetic; ta jtsobic sutel tal ta yantic banamil ti bu spucoj sbaic batele. Ta xquiq'uic sutel tal ta yosilal stuquic, te ta xvul cac' ve'icuc ta vitsetic yu'un Israel xchi'uc ta bebevo'tic xchi'uc ta scotol yosilalic ti bu oy yajvale.

¹⁴ Te ta xcac' ve'icuc ta lequil jobeltic, ja' xcuxubil yo'ntonic chc'ot li toyol vitsetic ta Israele; toj lec yavilic chc'ot staic, ja' te chvayic o. Ja' tsve'ic li lequil jobeltic te ta vitsetic yu'un Israele.

¹⁵ Vu'un jtuc ta jchabi, ta xcac'be sve'elic li jchijtaque; vu'un jtuc ta xquiq'uic sutel ta xcuxubil yo'ntonic, vu'un li Muc'ul Diosune.

¹⁶ Li vu'une chbat jt'un tal li jchijtac ti ch'ayemique; chbat quiq'uic sutel tal ti bu stamojic batel yan bee. Ta jpixbeic li sc'asemalic li xtuch'emalique; ta jcoltaic ti bu alubenique. Yan li bu toj jubenic, toj tsots cha'ay sbaique, ta xcules. Li vu'une lec tuc' ta jchabi jech chac c'u cha'al tsc'an pasele.

Chich' chapanbel smul li chijetic xchi'uc li tentsunetique

¹⁷ “Vu'un li Muc'ul Diosune, vu'un li Avajvalicune, a'yo ava'yic c'usi chcal, vo'oxuc li jchijtacoxuque: Li vu'une ta jchapan c'usi tspasbe sbaic li chijetic xchi'uc c'usi tspasbe sbaic li tentsunetique; ta xlic jvoc'an ta jujuvoc'.

¹⁸ ¿Me muc ta'louc o chava'yic ti chave'ic li lequil jobeltique? ¿C'u yu'un ti chapech'ilanic comel ta teq'uel li scomelale? ¿Me muc ta'louc o chava'yic ti chavuch'ic li vo' ti lec yoxe? ¿C'u yu'un ti chatatubtasic comel ta teq'uel li scomelale?

¹⁹ Li yan jchijtaque ja' xa tsve'ic ti bu pech'bil ta teq'uel avu'unique; ja' xa chuch'ic li vo' ti atatubtasojic ta teq'uele.

²⁰ Ja' yu'un, jech chcal vu'un li Muc'ul Diosune, vu'un li Ajvalilune: Ta jchapan c'u x'elan chcom li chijetic ti bu jubenique xchi'uc ti baquique.

²¹ Li vo'oxuque laj anet'ic loq'uel ti bu baquic, ti mu'yuc stsatsalique; laj axul ta axulubic, jech ijatov batel avu'unic.

²² Pero vu'un ta jcolta li jchijtaque; mu xa xcac' batuc ta elec'. Jech noxtoc ta xlic jchapan stuquic li chijetic cu'une.

²³ Ta xcac' licuc jun smomnich'on cajtunel David; ja' jchabivanej ta xc'ot yu'unic. Ja' ta xac'be lec sve'elic; ja' ta xchabi.

²⁴ Vu'un li Muc'ul Diosune, vu'un Diosun yu'unic chic'ot. Li smomnich'on cajtunel Davide ja' banquilal chc'ot yu'unic. Vu'un chcal jtuc, vu'un li Muc'ul Diosune.

²⁵ Ta jchapan jchi'uquic ti ta xcac'beic o jun yo'ntonique. Ta jloq'uesbe ta yosilalic li jti'vanej chonbolometique, jech jun yo'nton chnaquiic ta te'tic; jun yo'nton chvayic ta toyolaltic.

²⁶ Ta xcac'beic lec bendición li jchijtaque xchi'uc li spat xocon vits cu'une. Ta xcac'beic lec vo' ti c'alal yoraile; ja' jun bendición chc'ot yu'unic.

²⁷ Lec chac' sat li te'etic ta yosilalique, lec chac' li c'usi tsts'unic ta banamile; jun yo'nton te chnaquiic o ta yosilal stuquic. C'alal ta jtuch'beic loq'uel li yabtejeb vacax chucbil ta snuq'uique, jech tsna'ic o ti vu'un Muc'ul Diosune, yu'un chcolic o loq'uel ta sc'ob li boch'otic mozoinbilic to'ox yu'une.

²⁸ Mu'yuc xa bu abul sbaic ta uts'intael yu'un li yantic banamile; mu'yuc xa chlajic ta ti'el ta chonbolometic. Jun yo'nton chnaquiic o; mu'yuc boch'o chtal sibtasaticuc yu'un.

²⁹ Ta xcac'beic lec yaxal osil ti toj lec ilbile. Jech mu'yuc xa bu chchamic ta vi'nal te ta yosilalic; mu'yuc xa bu abul sbaic ta labanel ta q'uexlaltasel yu'un li yantic banamile.

³⁰ Jech chlic sna'ic ti vu'un Muc'ul Diosun yu'unic; te oyun ta stojolique, xchi'uc ti ja' jteclumal scotol li smomnich'nab Israele.

³¹ Vo'oxuc li jchij c'otemoxuque; te lamaloxuc ta jobeltic cu'un, vu'un li Diosun avu'unique”, xi li Muc'ul Diose.