Ezequiel 33 - Bible in Tzotzil de Chenalhó with Deuterocanon

Li j'alc'ope ja' jchabivanej c'otem ta stojol xchi'iltac

¹ La sc'opanun yan velta li Muc'ul Diose, jech laj yalbun:

² “Vo'ot xnich'on cristiano, jech xavalbe ya'ay scotol li ateclumale: ‘C'alal ta xcac' ta milel ta espada junuc banamile, ta st'ujic jun vinic ta stojolic; ja' chcom jech chac c'u cha'al jq'uel osil ta toyol ti tsq'uel ta nom me oy chtal jcontrainvanejetique.

³ C'alal me chil ti chtal xa jpaspleitoetique, ja' chlic sjupan yoq'ues sventa chac'be sna' scotol li xchi'iltaque.

⁴ Li boch'o laj ya'ay lec li oq'uese, me mu xich' ta muq'ue, me te ilaj ta milel ta espadae, ja' chcom ta sba stuc li xch'ich'al chmale.

⁵ Yu'un laj ya'ay li oq'uese, pero muc xich' ta muc', ja' yu'un ja' chcom ta smul stuc. Yan li boch'o chich' ta muq'ue, ja' chcol to ta milel.

⁶ Pero me ja' muc sjupan yoq'ues li boch'o luchul ta toyol tsq'uel me oy bu chtal yajcontraique, me oy boch'o chlaj ta milel ta espada ta scoj ti muc sbijubtas li xchi'iltaque, ta scoj smul chcham li boch'o chmilate. Pero li xch'ich'al chmale ja' chcac'be xcuch li boch'o tsq'uel osil ta toyole’, uto.

⁷ “Ja' yu'un, li vo'ote xnich'on cristiano, la jva'anot ta toyol q'uelub osil sventa chachabi li smomnich'nab Israele. A'yo me ava'ay li c'usi chloc' ta quee, jech me xavalbe ya'yic ta jventa li achi'iltaque.

⁸ C'alal me jech chcalbe li jpasmulile: ‘Jpasmulil, ta persa chacham’, me xcute, me vo'ot mu xavalbe ti ac'o scomtsan li be stamoje, ta ono'ox xcham ta scoj smul, pero li xch'ich'ale vo'ot chacac'bot acuch.

⁹ Yan me vo'ot chavalbe ti ac'o scomtsan li chopol be stamoj jun jpasmulile, me stuc mu sc'an scomtsane, ta scoj smul stuc ta xcham; li vo'ote colem chacom.

Tuc' scotol c'usi tspas li Diose

¹⁰ “Ja' yu'un, li vo'ote xnich'on cristiano, jech xavalbe ya'yic li smomnich'nab Israele: ‘Li vo'oxuque jech chavalic: Li vu'utique li' jcuchojtic o li jmultic xchi'uc li jtoyobbailtique, ja' ta scoj ti chijcham xa jchi'uctique. ¿Pero c'u x'elan xu' chijcuxiutic?, xachiic.

¹¹ Pero vu'un li Muc'ul Diosun ti avajvalicune, jech chcal ta jamal ta jbi: Mu jc'an ti te xcuchoj smul chcham li jpasmulile; ja' ta jc'an ti ac'o scomtsan li chopol be stamoje yu'un jech xu' chcuxi. Sutanic tal, sutanic tal ti bu chopol be atamojique. ¿C'u yu'un ti te no'ox avabinoj abaic chachamique, israeletic?’, uto.

¹² “Vo'ot xnich'on cristiano, jech xavalbe ya'yic scotol li achi'iltaque: ‘Li tuq'uil cristianoe mu xcoltaat yu'un stuq'uil c'alal me la sa' smule. Li jpasmulile mu xmacat ta be yu'un smul c'alal me la sutes yo'ntone. Li boch'o tuc' c'usi tspase mu xu' chcuxi o ta sventa tuc' yabtel c'alal me la sa' smule.

¹³ C'alal me jech chcalbe li boch'o tuc' c'usi tspase: Li vo'ote ta jbel sc'oplal chacuxi, me xcute, me chlic spat yo'nton ta sventa ti tuc' c'usi tspase, me chlic spas c'usi chopole, scotol ti c'u yepal tuc' c'usi spasoje mu'yuc ta jtsacbe ta venta; ta ono'ox xcham ta scoj li smul la sa'e.

¹⁴ C'alal me jech chcalbe ec li jpasmulile: Ta jbel sc'oplal chacham, me xcute, pero me chlic scomtsan li c'usi chopol tspase, me ja' chlic spas li c'usi lec, li c'usi tuq'ue,

¹⁵ me chlic yac'be xq'uexol li prentail yich'oje, me chlic sutes li c'usi yelc'anoje, me chlic spas batel li c'usitic sventa slequilale, me mu xa spas o li c'usi chopole, ta jbel sc'oplal ta xcuxi; mu'yuc ta xcham.

¹⁶ Mu'yuc xa bu ta jt'abbe o ta co'nton li smule, yu'un ja' xa tspas batel li c'usitic lec, li c'usitic tuq'ue, jech ta xcuxi o’, uto.

¹⁷ Li achi'iltaque xu' jech chlic yalic: ‘Mu'yuc tuc' c'usi tspas li Diose’, xu' xiic; pero ta melel ja' stuquic ti mu'yuc tuc' c'usi tspasique.

¹⁸ Me chlic scomtsan spasel c'usi tuc' li boch'o tuc' c'usi tspase, me ja' chlic spas li c'usi chopole, ta xcham ta scoj li c'usi chopol tspase.

¹⁹ Me chlic scomtsan c'usi chopol tspas li jpasmulile, me ja' chlic spas li c'usi lec, li c'usi tuq'ue, ta xcuxi, yu'un tuc' c'usi tspas.

²⁰ Pero xu' jech chalic yan velta noxtoc: ‘Mu'yuc tuc' c'usi tspas li Cajvaltic Diose’, xu' xiic. Vu'un ta xlic jchapan scotol israeletic ta sventa li c'usi tspasic jujunique”, xi li Diose.

Chich' jinesel li lum Jerusalene

²¹ C'alal yo'bal xa'ox c'ac'al yochel li slajunebal u ta xlajchabal jabil jchuquelcutic batel ta yan banamile, te ic'ot ta jtojol jun vinic ijatov loq'uel ta Jerusalén; ja' ic'ot yalbun scotol ti i'och xa ta sc'ob cajcontracutic li lum Jerusalene.

²² Ta bat c'ac'al c'alal mu'yuc to chc'ot ta jtojol li vinique, li Muc'ul Diose la scajanbun sc'ob ta jba. Ta yoc'omal c'alal ic'ot li vinique, ijam li quee; muc xa uma'ucun licom.

²³ Li Muc'ul Diose ital sc'opanun yan velta, jech laj yalbun:

²⁴ “Vo'ot xnich'on cristiano, li achi'iltac te nacajtic ta lumetic ta Israel ti jinesbilic xae, jech chalic: ‘Li Abrahame stuc to'ox, pero i'ac'bat yu'unin li banamil li'i. Li vu'utique eputic xa, jech vu'utic ono'ox cu'untic chcom o li banamil li'i’, xiic.

²⁵ Ja' yu'un jech xavalbe ya'yic: ‘Jech chal li Cajvaltique, ja' li Muc'ul Diose: Li vo'oxuque xchi'uc xch'ich'al chati'ic li ti'bole, avich'ojic ta muc' noxtoc li sloc'obaltac adiosique, xchi'uc chamilvanic noxtoc, ¿Me chanopic ti vo'oxuc yajvaloxuc banamil chacomique?

²⁶ Yu'un ja' apatoj avo'ntonic yu'un li avespadaique; ja' laj apasic li c'usi toj chopol chquile, laj avuts'intabeic yajnil li achi'ilique, ja' yu'un ¿me vo'oxuc xu' chaventainic comel li banamile?, xi li Diose’, uto.

²⁷ “Jech xavalbe ya'yic noxtoc: ‘Jech chal li Cajvaltique, ja' li Muc'ul Diose: Ta xcal ta jamal ta sventa jbi, scotol li boch'otic te to nacajtic ta lumetic ti jinesbilic xae ta xmilatic ta espada. Li boch'otic te oyic batel ta te'tique ta xlajic ta chonbolometic; li boch'otic snac'oj sbaic batel ta tsatsal nailch'entique ta xchamic ta tsatsal chamel.

²⁸ Li yosilalique ta jc'atajes o ta xocol banamil, xch'ijan chcom o cu'un. J'ech'el ta jpajesbe o li stoyobbailique. Li vitsetic ta Israele mu'yuc yajval ta jcomtsan o; me junuc mu'yuc xa boch'o te chjelov o.

²⁹ C'alal me la jyavnaijes, me la jc'atajes o ta xocol banamil li yosilalic ta scoj ti toj chopol c'usi la spasique, jech tsna'ic o ti vu'un Muc'ul Diosune, xi li Diose’, uto.

³⁰ “Vo'ot xnich'on cristiano, li achi'iltaque chliquic ta bic'talvulajetel ta aventa te ta coraltonetic xchi'uc ta ti'naetic, jech chlic yalbe sbaic jujunic: ‘Bat ca'itic li lo'il liquem tal ta stojol Muc'ul Diose’, xiic.

³¹ Jech ta xtalic ta atojol jech chac c'u cha'al jteclum cu'un yilel. Te lamal chvulic ta atojol; cha'yic li c'usi chavale, pero mu spasbeic yabtelal. Ja' no'ox chloc' ta yeic ti tsc'anicune, pero li yo'ntonique yan o c'usi tsc'an; yan o c'usi tsc'upin.

³² Ja' jech chac'ot yu'unic jech chac c'u cha'al li boch'o lec tsq'uejintabe sq'ueojal c'upinejbail sventa banamil ti toj c'upil sba ta a'yele, ti toj lec snuq'uilale. Ja' no'ox chtal ya'yic li c'usi chavale, pero mu spasic li c'usi cha'yique.

³³ Pero c'alal chc'ot ta pasel li c'usi chavale, ta melel yu'un xa chc'ot ta pasel, jech tsna'ic o ti oy jun j'alc'op te ta stojolique”, xiyutun li Diose.