Ezequiel 32 - Bible in Tzotzil de Chenalhó with Deuterocanon

J'ech'el ilaj o stsatsal li Egiptoe

¹ Ta sba c'ac'al yochel xlajchabal u ta xlajchabal jabil ital sc'opanun yan velta li Muc'ul Diose, jech laj yalbun:

² “Vo'ot xnich'on cristiano, q'uejintao ta sventa ajvalil faraón ta Egipto li q'ueoj sventa at-o'nton li'i, jech xaval: ‘Faraón, co'olot jech chac c'u cha'al león ta stojol li yantic banamile; pero co'olot noxtoc jech chac c'u cha'al ayin ta muc'ta nab, ti yipal cht'axu loq'uel li vo'etique, ti tstatubtas ta yacan li vo'e, ti tsyuq'uilanbe yoc li uc'umetique.

³ ‘Jech chal li Muc'ul Diose ja' li Ajvalile: Ac'o me jmoj tsobolot achi'uc epal cristianoetic, pero ta jtic' ochel jnuti' te yo' bu oyote; ta nuti' tiq'uil chaloc' tal cu'un.

⁴ Chajochot loq'uel; te chajbananot comel ta taqui banamil. Ta xcac' stsob sbaic tal ta atojol scotol mutetic ta toyol; ta xtal yet'es yo'ntonic ta abec'tal scotol li chonbolometic ta te'tique.

⁵ Ta jnojes o soplejaltic ta abec'tal, xchi'uc ta jpuc batel ta vitsetic.

⁶ Li banamil bu oyote ta xcat'es ta ach'ich'al, chc'ot c'alal to ta vitsetic. Ta xnojan li bevo'etique.

⁷ C'alal chaculesote, ta x'ic'um li vinajele; ta xtu'p scotol li c'analetique; ta xmac ta toc li c'ac'ale; mu xa xac' xojobal li ue.,

⁸ Ta xcac' ic'ubuc ta acoj scotol li c'usitic chac' xojobal ta vinajele; ta xcac' ic'ubuc osil te ta avosilal. Vu'un chcal jtuc, vu'un li Muc'ul Diosune.

⁹ ‘C'alal chc'ot a'yej ta stojol yantic banamil ti laj avich' chuquel batele, ja' li banamiletic ti mu xavotquinane, ta xlic yat yo'ntonic epal lumetic avu'un, yu'un cha'yic ti lalaj oe.

¹⁰ Ep lumetic ta xcac' ch'ayuc yo'ntonic ta acoj ti c'alal chilic sts'aylej no'ox li quespada ta atojole. Ta x'och ep xi'el ta yo'ntonic avu'un li ajvaliletic yu'unique. Scotolic ta xniquic ta xi'el ti c'alal tsta yorail chayal ta lume.

¹¹ Yu'un jech chcal vu'un li Muc'ul Diosun, vu'un li Ajvalilune: Ta xtal ta atojol li yespada ajvalil ta Babiloniae.

¹² Li ateclumale ta xcac' lajicuc ta yespada li simarón soldadoetic ti ech'em xu' yu'unic ta scotol banamile. Ja' ta slajesbeic o sc'oplal stoyobbail li Egiptoe; ta xulesbeic o scotol li steclumal ti toj yan sba yepale.

¹³ Ta xcules scotol li chonbolometic ti te chtal yuch'ic yoxo' ta uc'umetic avu'une. Mu'yuc xa boch'o chtal statubtasic o ta teq'uel li vo'etic avu'une, me cristianouc, me chonbolomuc; mu'yuc xa chtalic o.

¹⁴ Chlic jyaxubtas lec li vo'etique; li uc'umetique chlic cac' xanovuc lec ta c'unc'un jech chac c'u cha'al aceite. Vu'un chcal jtuc, vu'un li Muc'ul Diosune.

¹⁵ C'alal chlic jyavnaijes li Egiptoe, xocol chcom o cu'un jech chac c'u cha'al xocol banamil. Ta jmilbe scotol li yajvale, jech tsna'ic o ti vu'un Muc'ul Diosune’, uto.

¹⁶ “Li'i ja' jun q'ueoj sventa oq'uel, ja' jech tsq'uejintaic li antsetic ta buyuc no'ox banamilal c'alal choc'taic li Egiptoe xchi'uc scotol li epal jnaclumetic yu'une. Vu'un chcal jtuc, vu'un li Muc'ul Diosune”, xi li Diose.

Laj yich' tsalel o li Egiptoe

¹⁷ Ta svo'lajunebal (15) c'ac'al yochel li xlajchabal u ta xlajchabal jabile ital sc'opanun yan velta li Muc'ul Diose, jech laj yalbun:

¹⁸ “Xnich'on cristiano, q'uejintao sq'ueojal at-o'nton ta sventa li epal cristianoetic ta Egiptoe; alo ti ac'o yalicuc batel ta ch'en scotolic jech chac c'u cha'al iyalic batel ta ch'en li yajvaltac yantic banamile, jech xaval: ‘Li boch'otic toj ech'em xu' yu'unique chyalic xa batel ta yut banamil; chbat xa xchi'in li boch'otic yalemic batel ta muquinaltique.

¹⁹ Vo'ot ti chanop ti atuc no'ox toj c'upil aba ta scotole, yalan batel, bat vayan achi'uc li boch'otic mu'yuc yich'ojic circuncisione’, chianic.

²⁰ “Yu'un li Egiptoe co'ol chyalic batel xchi'uc li boch'otic chchamic ta espadae. Ac'bilic xa ta sve'el espada; co'ol chich'ic xchi'uc scotol li yajsoldadotaque.

²¹ Li boch'otic tsots xu' yu'unic ti te xa oyic ta yavil animaetique, jech chalbeic li egiptoetic c'alal chc'otique: ‘La' me, yalanic tal achi'uc li boch'otic la scoltaicote; la' chi'inic li boch'otic li' xa oyic ti ilajic ta milel ta espada ti mu'yuc yich'ojic circuncisione’, xiic.

²² “Te oy ec li Asiriae; te joyibtabil smuquinal yu'un scotol li yajsoldadotaque. Le'e milbil ta espada icham scotolic.

²³ Laj yich' muquel ta mero yutil muquinal; scotol li yajsoldadotaque te sjoyibtaojbeic li smuquinale. Yu'un imilatic ta espada ta scoj ti ep laj yaq'uic xi'el ta sba banamile.

²⁴ “Te oy noxtoc li Elame; te joyibtabil smuquinal yu'un scotol li yajsoldadotaque. Scotolic le'e milbil ta espada ichamic. Mu'yuc yich'ojic circuncisión iyalic batel ta mero yutil banamil, yu'un laj to'ox yaq'uic ep xi'el li' ta sba banamil. Pero mu'yuc stu ic'ot ta stojol li boch'otic te xa oyic ta muquinale.

²⁵ Ta o'lol animaetic laj yac'beic svayab, te joyibtabil smuquinal yu'un scotol li epal soldadoetic yu'une. Mu'yuc yich'ojic circuncisión. Milbil ta espada ichamic ta scoj ti laj yaq'uic ep xi'el ta banamile. Pero tana mu'yuc stu ic'otic ta stojol li boch'otic te xa oyic ta muquinale.

²⁶ “Te oy noxtoc li Mesec xchi'uc Tubale; te joyibtabil smuquinal yu'un scotol li yajsoldadotaquique. Scotolic mu'yuc yich'ojic circuncisión, milbil ta espada ichamic ta scoj ti laj yaq'uic ep xi'el ta banamile.

²⁷ Jech noxtoc mu co'oluc bat xchi'in li boch'otic tsots xu' yu'unic, ti lec ich'bilic ta muc' ijelovique, ti yich'ojic batel lec yabtejebic ta ch'ene, ti xonjolinojic batel lec yespadaique, ti te nabal o batel ta sbaquilic li smulique, yu'un laj yaq'uic ep xi'el ta banamil.

²⁸ “Li vo'ote, Egipto, te chabat ec, chbat achi'in ec li boch'otic mu'yuc yich'ojic circuncisione; liquil t'uyul chabat, co'ol chbat achi'in li boch'otic milbil ta espada ichamique.

²⁹ “Te oyic noxtoc li Edome, xchi'uc li ajvaliletic, li banquilaletic yu'une. Ac'o me toj ech'em xu' yu'unic, pero te xa xchi'uquic li boch'o imilatic ta espadae. Co'ol bat xchi'inic li boch'o mu'yuc yich'ojic circuncisione; te xa xchi'uquic li boch'otic yalemic xa batel ta ch'ene.

³⁰ “Te oyic noxtoc scotol li banquilaletic ta nortee xchi'uc scotol li sidonetique. Toj ech'em to'ox svu'elic; ep laj yaq'uic xi'el, pero iyalic xa batel yo' bu oyic li animaetique. Mu'yuc yich'ojic circuncisión; te xa xchi'uquic li boch'otic milbil ta espada ichamique. Mu'yuc xa stuic o; laj xa staic ec jech chac c'u cha'al staojic li boch'otic te xa oyic ta muquinale.

³¹ “C'alal chc'ot yil scotol li faraone, te chpat yo'nton, yu'un icham scotol ec li yajsoldadotaque. Yu'un li faraone xchi'uc scotol li yajsoldadotaque persa ta xlajic ta milel ta espada. Vu'un chcal jtuc, vu'un li Muc'ul Diosune, vu'un li Ajvalilune.

³² Yu'un laj yac' ep xi'el li' ta banamil, ja' yu'un ta xyalic batel ta yavil animaetic xchi'uc scotol li yajsoldadotaque; chbat xchi'inic li boch'otic milbil ta espada ichamic ti mu'yuc yich'ojic circuncisione’, chian”, xiyutun li Muc'ul Diose.