Ezequiel 31 - Bible in Tzotzil de Chenalhó with Deuterocanon

Li faraone xco'laj xchi'uc jtec' ch'ut te'

¹ Ta sba c'ac'al yochel yoxibal u ta xbuluchibal (11) jabil ital sc'opanun yan velta li Muc'ul Diose, jech laj yalbun:

² “Vo'ot xnich'on cristiano, jech xavalbe ya'ay li ajvalil faraón ta Egiptoe xchi'uc scotol li steclumale: ‘Mu'yuc boch'o yan jech chac c'u cha'al li amuc'ule.

³ Li vo'ote co'olot jech chac c'u cha'al ch'ut te' ta Líbano ti lec c'upilic sba sc'obc'obe, ti lec pim yanale, ti lec nate, ti xc'ot c'alal to ta pimil toquetic li sni'e.

⁴ Yu'un its'itesat lec yu'un li vo'e; inatubtasat lec yu'un li ya'lel uc'ume. Yu'un te xcholchun o scotol ora ti bu teq'uele; ja' laj yat'es batel scotol li te'etic te nopolique.

⁵ Ja' yu'un stuc no'ox toj nat ibat ta scotol li te'etique. Solel i'epaj li sc'obc'obe; la slim sba batel ta scoj ti oy lec ya'lele.

⁶ Jech te tal spas stasic ta sc'obc'ob scotol li jaychop mutetique; te i'alajic ta yolon scotol li jaychop chonbolometique; te inaquiic ep ta chop cristianoetic ta xyaxinal.

⁷ Toj c'upil sba ic'ot xchi'uc li sc'obc'ob ti la slim sba batele, yu'un li yibele la sts'un sba batel ti bu oy lec vo'e.

⁸ Me jtec'uc ch'ut te' te ta ts'unubaltic yu'un Dios mu'yuc bu jech xco'laj xchi'uc ti toj muq'ue; me jtec'uc c'uc'toj mu'yuc bu jech xco'laj xchi'uc ti toj pim sc'obc'obe. Me jtec'uc yantic te' mu'yuc bu jech xco'laj xchi'uc ti toj pim yanale, me jtec'uc te' te ta ts'unubaltic yu'un Dios mu xco'laj slequil yutsil xchi'uc.

⁹ Vu'un la jpas ti toj c'upil sba xchi'uc li sc'obc'obe. Scotol li te'etic te ta Edén ta ts'unubaltic yu'un Diose, xti'et yo'ntonic yu'un.

¹⁰ ‘Ja' yu'un a'yo ava'ay, jech chcal vu'un li Muc'ul Diosune, vu'un li Ajvalilune: Ta sventa ti toj nat ich'ie, ti ic'ot c'alal to ta pimil toquetic li sni'e, jech lic stoy sba ta sventa li snatile.

¹¹ Ja' yu'un laj cac' ta sc'ob jun yanlum ajvalil ti ech'em xu' yu'une. Laj yich' pasbel jech chac c'u cha'al tsc'an ta sventa li xchopolile.

¹² Laj yich' ts'etel yu'un yanlum cristianoetic ti bats'i simaronic ta scotol banamile; laj yich' lomesel o. Li sc'obc'obtaque tanpuc ibat ta vitsetic xchi'uc ta soplejaltic. C'asaltic sba ibat ta bebevo'tic te ta banamil. Scotol li yantic lum te nacalic ta xyaxinale ijatovic batel; la scomtsanic o.

¹³ Scotol li jaychop mutetique te ta xtal naquiicuc ti bu chexele; scotol li chonbolometic ta te'tique te ta xtal xmochan sbaic ta sc'obc'ob.

¹⁴ Jech mu xa xlic ch'iicuc ec li yantic te'etic te ch'iemic ta ti'uc'ume, jech mu xc'ot sni'ic c'alal to ta pimil toquetic, jech mu spat yo'ntonic ti lec nat chbatic c'alal me ch'iemic ta ti' uc'ume. Yu'un scotol chapal sc'oplal chchamic, ch-ochic batel ta yut banamil; jmoj chbatic xchi'uc li boch'otic ch-ochic ta ch'ene.

¹⁵ ‘Vu'un li Muc'ul Diosune jech chcal: C'alal tsta yorail chyal batel ta yavil animaetic li te'e, ta xtaquij ta at-o'nton li natil nabe. Ta xpaj ta xanubal li uc'umetique; mu'yuc xa ta xanov li yoque. Li vits Libanoe ep ta xat yo'nton ta scoj li jtec' te'e. Scotol li yantic te'etique chlaj stsatsal yo'ntonic o ta scoj.

¹⁶ C'alal tsta yorail chyal batel ta yavil animaetic li te'e, ti jmoj chbat stsob sba xchi'uc li yantic ti yalemic xa batel ta ch'ene, ta xnic jujun banamil yu'un yipal ti c'alal chyal batele. Scotol li te'etic te ta Edén xchi'uc ta Líbano ti toj lequic, ti oy lec ya'lelique, chmuq'uib yo'ntonic ta sventa c'usi tspas li yutil banamile.

¹⁷ Pero ja' no'ox jech ta xyalic batel ta yavil animaetic ec; ta xbat xchi'inic li boch'otic ichamic ta espadae, ja' li boch'otic liquemic tal ta yantic banamil ti inaquiic ta xyaxinal, ti la spas to'ox ta co'ol yo'ntonic xchi'uque.

¹⁸ Mu'yuc bu jech yan te' te ta Edén ti co'ol yutsil, ti co'ol snatil, ti co'ol smuc'ul xchi'uque. Pero co'ol ono'ox chyalic batel ta yut banamil xchi'uc li te'etic te ta Edene yu'un jech chbat xchi'inic ta naclej li boch'otic mu'yuc yich'ojic circuncisione xchi'uc li boch'otic imilatic ta espadae. Li jtec' te'e ja' sc'oplal li faraone xchi'uc scotol li yepal xchi'iltaque’, uto”, xiyutun li Muc'ul Diose.