Ezequiel 30 - Bible in Tzotzil de Chenalhó with Deuterocanon

Tstoj smul li Egiptoe

¹ Li Muc'ul Diose la sc'opanun yan velta, jech laj yalbun:

² “Vo'ot xnich'on cristiano, c'opojan, jech xaval ta jventa: ‘Jech chal li Muc'ul Diose: Oc'anic, avananic, yu'un inopaj xa tal sc'ac'alil.

³ Nopol xa chc'ot yorail; nopol xa chtal sc'ac'alil li Muc'ul Diose. Ta xa xtal sc'ac'alil but'ulal; ta xa xlic svocolic li jujun banamile.

⁴ Ta xa xtal espada ta stojol li Egiptoe. C'alal ta xvu' milbail te ta Egipto, c'alal ta xich' ich'bel batel scotol li sc'ulejale, xchi'uc c'alal ta xich' jinesbel scotol li snaclebtaque, ta xlic nicuc ta xi'el li Etiopiae.

⁵ Co'ol ta xlajic ta milel xchi'uc li jnaclumetic ta Etiopía, ta Fut, ta Lud, ta Arabia, ta Libia, xchi'uc ta scotol li yantic lum ti spasoj ta co'ol yo'ntonic xchi'uque.

⁶ Scotol li boch'otic tspojic li Egiptoe, co'ol chlajic ta milel xchi'uc. Xlic ta Migdol c'alal to ta Sevenee, ja' li lumetic ti stoyoj sba o xchi'uc li Egiptoe; co'ol chlajic ta milel xchi'uc, xi li Muc'ul Diose’, chian”, xiyutun.

⁷ “Li Egiptoe ja' ech'em yavnaijem chcom jech chac c'u cha'al li yantic banamil ti yavnaijemic xa ono'oxe; li lumetic yu'une ech'em to xch'ijan chcom jech chac c'u cha'al li yantic lumetic ti xch'ijan comenique.

⁸ C'alal chcac'be sc'ac'al li Egiptoe, xchi'uc c'alal chlaj scotol li lumetic tspojique, jech tsna'ic o ti vu'un Muc'ul Diosune.

⁹ “C'alal me la sta li sc'ac'alil le'e, ta jtac batel j'almantaletic ta nabetic, yu'un ac'o bat sibtasic li Etiopía ti toj jun yo'nton cha'yique. Jech chlic xi'icuc c'alal chc'ot yorail chlaj li Egiptoe, yu'un po'ot xa tsta yorail.

¹⁰ “Jech chcal vu'un li Muc'ul Diosun, vu'un li Ajvalilune: Ta xculesbe sc'ulejal li Egiptoe; ja' ta jtunes li Nabucodonosor ajvalil ta Babiloniae, yu'un ja' ac'o bat yulesbe scotol.

¹¹ Ja' ta xbat stuc, ta xchi'in batel scotol li yajsoldadotac ti ja' no'ox xi'bilic ta scotol banamile; ja' chtal soquesic scotol li yosilal Egiptoe. Ta sloq'ues yespadaic; ta snojesic comel ta anima scotol li Egipto banamile.

¹² Ta xculesbe ya'lel li uc'um Niloe; ta xcac'be ta sc'ob chopol cristianoetic li Egipto banamile. Yanlum cristianoetic chtal soquesic li banamile xchi'uc scotol li c'usitic te oye. Vu'un chcal jtuc, vu'un li Muc'ul Diosune.

¹³ “Jech chcal noxtoc, vu'un li Muc'ul Diosune: Ta xcules noxtoc li loc'ometic ti yich'ojic ta muq'ue, ta xcules scotol li diosetic yu'unic ta Menfise. Mu'yuc xa ta xlic o banquilal te ta Egipto, puru xi'el xa no'ox ta xcac' te ta yosilal.

¹⁴ Ta jyavnaijes o li Patros banamil te ta Egiptoe; ta xcac'be sc'ac'al noxtoc li Zoane; ta xcac'be stoj smul li Tebase.

¹⁵ “Ta jloq'ues sc'ac'al co'nton ta stojol li Sine, ja' li lum ti spatoj yo'nton yu'un li Egiptoe, xchi'uc ta xcules scotol li epal cristianoetic ta Tebase.

¹⁶ Ta xcac'be sc'ac'al li Egiptoe, li Sine ta xich' ep vocol, li Tebase ta xich' lilinel, li Menfise ta c'ac'altic ta xtal yich' ac'bel.

¹⁷ Li queremetic ta Avén xchi'uc ta Pibesete ta xmilatic ta espada. Li antsetique chucbil chbatic ta yan banamil.

¹⁸ C'alal ta jlajesbe o stsatsal li Egiptoe, c'alal ta xculesbe o ta j'ech'el li svu'el ti stoyoj sba xchi'uque, ta xlic macuc sat c'ac'al te ta Tafnes; ta xmac ta toc li Egiptoe. Li jnaclumetic te ta bic'tal lumetic yu'une chucbil chbatic.

¹⁹ Ta xcac'be stoj smul li Egiptoe, yu'un jech tsna'ic o ti vu'un Muc'ul Diosune”, xi li Diose.

²⁰ Ta svucubal c'ac'al yochel li sba u ta xbuluchibal (11) jabile la sc'opanun yan velta li Muc'ul Diose, jech laj yalbun:

²¹ “Vu'un jtuc la jc'asbe ste'el sc'ob li faraón ajvalil ta Egiptoe. Mu'yuc boch'o xu' chpoxta, mu'yuc boch'o xu' chpix, mu'yuc boch'o xu' tsts'ot lec yu'un ac'o sts'ac sba yan velta. Mu xa xlic tsatsubuc o yan velta; mu'yuc xa bu chlic stsac o yespada yan velta.

²² Ja' yu'un jech chcal vu'un li Muc'ul Diosun, vu'un li Ajvalilune: A'yo ava'yic, vu'un ta jcontrain jtuc li faraón ajvalil ta Egiptoe. Ta jc'asbe xchibal li sc'obe; ta jcha'c'asbe ti bu c'asem xa ono'oxe xchi'uc ti bu lec toe. Ta xcac' coluc yalel ta sc'ob li yespadae.

²³ Ta jpuquic batel ta yantic lum li egiptoetique; ta jtaniic batel ta buyuc no'ox banamilal.

²⁴ Ja' chlic jtsatsubtasbe lec sc'ob li ajvalil ta Babiloniae; ta xcac'be ta sc'ob li quespadae. Yan li faraone ta jc'asbe o xchibal li sc'obe; ta xlic ta ayetel c'alal chich' ac'bel yu'un li yajcontrae.

²⁵ Ja' ta xcac'be lec stsatsal sc'ob li ajvalil ta Babiloniae. Yan li faraone ta xcalubtasbe o xchibal li sc'obe. C'alal chlic cac'be ta sc'ob ajvalil ta Babilonia li quespadae, c'alal chlic scontrain li Egiptoe, jech tsna'ic o ti vu'un Muc'ul Diosune.

²⁶ Ta jpuquic batel ta yantic lum li egiptoetique; ta jtaniic batel ta yantic banamil, jech tsna'ic o ti vu'un Muc'ul Diosune”, xi li Muc'ul Diose.