Ezequiel 29 - Bible in Tzotzil de Chenalhó with Deuterocanon

Ch-ac'bat stoj smul Egipto

¹ Ta xlajchabal (12) c'ac'al yochel slajunebal u ta slajunebal jabile la sc'opanun yan velta li Muc'ul Diose, jech laj yalbun:

² “Xnich'on cristiano, ac'o batel asat ta stuq'uil li Egiptoe; albo ta jamal li faraone xchi'uc ta scotol li egiptoetique.

³ Jech xaval: ‘Jech chal li Muc'ul Diose, ja' li Cajvaltique: Ajvalil faraón ta Egipto, a'yo ava'ay, vu'un chajcontrainot. Vo'ot li muc'ta dragonot ti te maxalot ta yut uc'um avu'une; vo'ot ti jech chavale: Vu'un cu'un li uc'um Niloe, vu'un la jpas, xachi.

⁴ Ja' yu'un ta jnitot loq'uel ta lucluc taq'uin. Li xchoyal avuc'umal bu oyote ta xcac' stsopoltaicot scotolic. Ta jloq'uesot ta uc'um scotol li xchoyal avuc'umale te nabajtic chloc' ta apat scotol.

⁵ Ta jipot batel ta taqui banamil li vo'ote xchi'uc scotol li xchoyal uc'um yo' bu oyote. Te chacham o ta osilaltic. Mu'yuc boch'o chastamot; mu'yuc boch'o chasmucot. Ta xcac'ot ta sve'el te'tical chonbolometic xchi'uc ta sve'el mutetic.

⁶ Jech tsna'ic scotol jnaclumetic ta Egipto ti vu'un Muc'ul Diosune. Yu'un ja' jech lac'ot ta stojol Israel jech chac c'u cha'al jbej aj.

⁷ C'alal la stsacoxuc ta sc'obique, toj c'asel lac'ot, laj ayayijesbe slots'opic. C'alal la xoc'an sbaic ta atojole, lac'as noxtoc, jech toj c'asel ic'ot spatic.

⁸ ‘Ja' yu'un jech chal li Muc'ul Diose, ja' li Cajvaltique: Egipto, a'yo ava'ay, ta jtacbot tal milel ta espada; ta jse'p loq'uel scotol li jnaclumetic avu'une xchi'uc li chonbolometique.

⁹ J'ech'el chac'ataj o ta xocol banamil; xach'ijan chacom o, jech chana' o ti vu'un Muc'ul Diosune. Laj aval ti vo'ot avu'un li uc'um Niloe xchi'uc ti vo'ot laj apase,

¹⁰ ja' yu'un a'yo ava'ay, vu'un jtuc ta jcontrainot, xchi'uc ta jcontrain li uc'um avu'une. Ta jyavnaijes o li avosilal Egiptoe; xch'ijan chcom o cu'un jech chac c'u cha'al xocol banamil, te chlic ta Migdol c'alal to ta Sevene xchi'uc c'alal to ta sts'aquil Etiopía banamil.

¹¹ Me cristiano, me chonbolometicuc mu'yuc xa ta xjelovic o; cha'vinic (40) jabil mu'yuc yajval ta xcom o.

¹² Li Egipto banamile ech'em to jech yavnaijem ta xcom jech chac c'u cha'al li yantic banamil yavnaijemique. Li lumetic yu'une ech'em to jech jinem ta xcom jech chac c'u cha'al li yantic lumetic ti jinesbilic oe. Cha'vinic (40) jabil jech ta xcom o. Li egiptoetique ta jpuquic batel ta yantic banamil; ta jtaniic batel ta buyuc no'ox, xi li Muc'ul Diose.

¹³ ‘Vu'un li Muc'ul Diosune jech chcal: C'alal me its'aqui li cha'vinic (40) jabile, chlic jtsob tal scotol li egiptoetic ta yantic lumetic ti butic puquemic batele.

¹⁴ Ta xquiq'uic loq'uel tal te ta banamil ti bu chucbil chbatique; te ta xc'ot caq'uic ta Patros banamil, ja' li yosilalic ono'ox bu ivoq'uique. Te ta sliquesic jun lum ti mu'yuc ich'bil ta muc' chc'ote.

¹⁵ Mu xco'laj jech chac c'u cha'al li yantic lume; li stuque toj biq'uit chcom o. Mu'yuc xa bu chlic muq'uibuc o sc'oplal ta stojol li yantic banamile, yu'un vu'un jtuc ta jbic'tajes, jech mu xa xlic sventain yantic banamil.

¹⁶ Jech mu xa xlic spat yo'ntonic ta stojol yan velta li israeletique; jech chlic sna'ic ti ja' smulic ti i'ay sa'ic coltael ta stojole, jech chlic xch'unic ti vu'un Muc'ul Diosune’, uto”, xiyutun.

¹⁷ Ta sba c'ac'al yochel li sliquebal u ta svucubal xcha'vinic jabile (27), la sc'opanun li Muc'ul Diose, jech laj yalbun:

¹⁸ “Li ajvalil Nabucodonosor ta Babiloniae laj xa yac' batel jtsob epal soldadoetic sventa bat spasic tsots pleito xchi'uc li lum Tiroe. Solel itul batel stsotsil sjolic; icho'an batel snecubic, pero me jutuc mu'yuc c'usi iloc' yu'un li ajvalile xchi'uc li yajsoldadotaque. Altic laj yac' svocolic ti tsots abtel, ti tsots pleito la spasic xchi'uc li lum Tiroe.

¹⁹ Ja' yu'un vu'un li Muc'ul Diosune jech chcal: Vu'un ta xcac'be ta sc'ob ajvalil Nabucodonosor li Egipto banamile. Ja' chich'be scotol li sc'ulejale; ja' tstsobbe scotol li c'usitic oy yu'une; ja' ch-och ta sc'ob scotol, yu'un jech oy stojol svocolic li yajsoldadotaque.

²⁰ Ta sventa ti tsots tspas yabtel ta scontrainel li lum Tiroe, jech ta xcac'be stojol li yabtele; ja' ta xcac'be ta sc'ob li Egiptoe, yu'un vu'un i'abtej cu'un. Vu'un chcal jtuc, vu'un li Muc'ul Diosune.

²¹ “Me ic'ot li sc'ac'alil le'e, ta xcac' ayinuc stsatsal yan velta li Israele, jech vo'ot ta xlic c'opojan ta jamal ta stojol scotolic. Jech tsna'ic o ti vu'un Muc'ul Diosune”, xi li Cajvaltic Diose.