Ezequiel 28 - Bible in Tzotzil de Chenalhó with Deuterocanon

Ch-ac'bat stoj smul ajvalil ta Tiro

¹ La sc'opanun yan velta li Muc'ul Diose, jech laj yalbun:

² “Vo'ot xnich'on cristiano, jech xavalbe li banquilal ta Tiroe: ‘Jech chayalbot li Muc'ul Diose ja' li Cajvaltique: Li vo'ote toj muc' laj avac' aba, jech laj anop: Li vu'une ja' jechun jech chac c'u cha'al jun dios, chotolun ta jun ch'ul chotlebal li' ta o'lol nab, xachi. Pero cristianoot no'ox, muc diosucot; li vo'ote laj anop ti co'ol jech chac c'u cha'al yo'nton dios li avo'ntone.

³ ¿Me yu'un vo'ot toj ech'em bijot jech chac c'u cha'al li Daniele? ¿Me xana'be smelol li c'usi mucul smelole?

⁴ Ta sventa abijil, ta sventa lec xu' avu'un laj ata ep ac'ulejal; laj anojes ta c'anal taq'uin, ta saquil taq'uin li yavil ac'ulejale.

⁵ Ta sventa ti toj ech'em xu' avu'un chamanulaj chachonolaje, jech laj atsob ep li ac'ulejale. Ta scoj toj ep ac'ulejal, jech lic atoy aba o.

⁶ Ja' yu'un jech chacalbot vu'un li Muc'ul Diosune: Ta sventa ti laj anop ti toj bijot jech chac c'u cha'al jun diose,

⁷ ja' yu'un ta xcac' chtal scontrainicot yanlum cristianoetic; ja' chtalic li viniquetic ti toj simaronique. Ta xvul sloq'ues yespadaic sventa chayac'bicot, vo'ot ti toj c'upil aba c'otemot, vo'ot ti toj bijote, jech ta soc o li axojobale.

⁸ Chastic'oxuc yalel ta muquinaltic; toj chopol c'u x'elan chacham ta yut muc'ta nab.

⁹ Vu'un Diosun ¿me xu' to xachi ta stojol li boch'o chtal scontrainote? Ta melel muc diosocot cha'yic li boch'otic ta xtal smilicote.

¹⁰ Ja' jech chacham ta sc'ob yanlumetic, jech chac c'u cha'al chcham li boch'otic mu'yuc yich'ojic circuncisione. Vu'un chcal jtuc, vu'un li Muc'ul Diosune, xi li Diose’, uto”, xiyutun.

Sq'ueojal at-o'nton ta sventa ajvalil ta lum Tiro

¹¹ La sc'opanun yan velta li Muc'ul Diose, jech laj yalbun:

¹² “Q'uejintao junuc sq'ueojal at-o'nton ta sventa li ajvalil ta Tiroe, jech xavalbe: ‘Jech chal li Muc'ul Diose: Li vo'ote bats'i chapalot o; nojem ta jyalel li abijile, bats'i ts'acal o li at'ujumale.

¹³ Oyot xa ta Edén ta ts'unubaltic yu'un Dios chava'ay; solel c'ac'umtasbilot ta lequil tonetic ti c'upilic sbae, ja' li cornalina, topacio, jaspe, li crisólito, berilo, ónice, zafiro, carbunclo, xchi'uc li esmeralda tonetique. Li nats'iletic xchi'uc li staq'uinal chiquiniletic avu'une ta puru c'anal taq'uin pasbil; chapanbil ono'ox ta aventa ti c'alal lic ayinan ta banamile.

¹⁴ Xaco'laj to'ox achi'uc jun querubín ti xlich'anoj lec xiq'ue. Xco'laj to'ox xchi'uc te oyot ta ch'ul vits yu'un li Diose. Te to'ox chaxanov ta lequil tonetic ti xleblajet jech chac c'u cha'al c'oq'ue.

¹⁵ C'alal lic ayinan ta banamile, toj lec to'ox ibat avu'un scotol, ja' to ti c'alal ivinaj li achopolile.

¹⁶ Ta sventa ti toj ep lamanulaj, lachonolaje, jech lic apas aba ta simaron, jech laj ata o amul. Ja' yu'un ta jipot loq'uel ta jtojol, vo'ot ti xaco'laj achi'uc querubín te yo' bu oy li lequil tonetic ti xleblajet jech chac c'u cha'al c'oq'ue.

¹⁷ Yu'un lic atoy aba ta sventa ti toj jun avutsile; lic asoques scotol abijil ta scoj li axojobale. Ja' yu'un vu'un la jipot yalel ta lumtic; laj cac' ti ac'o labajuc avu'un c'alal chayilicot li ajvaliletic li' ta banamile.

¹⁸ Ta sventa ti toj ep amule, xchi'uc ti laj abolibtas aba achi'uc li c'usi laj aman, xchi'uc li c'usitic laj achone, jech laj asoques o li ch'ulnaetic avu'une. Ja' yu'un la jloq'ues c'oc' ta atojol yu'un ac'o yulesot o. Jech c'atajemoxuc xa ta tan chilic li boch'otic ta sq'uelicote.

¹⁹ Scotol li lumetic ti xayotquinicote chch'ay yo'ntonic avu'un; ep axi'elal cha'yic, yu'un sbatel osil j'ech'el lach'ay o ta banamil’, uto”, xiyutun.

Ch-ac'bat stoj smul lum Sidón

²⁰ La sc'opanun yan velta li Muc'ul Diose, jech laj yalbun:

²¹ “Vo'ot xnich'on cristiano, q'uelo batel li lum Sidone, c'opojan batel ta jventa,

²² jech xavalbe: ‘Jech chal li Muc'ul Diose, ja' li Cajvaltique: Sidón, a'yo ava'ay, vu'un chajcontrainot. Vo'ot ta aventa chlic ich'atcun ta muc'. C'alal ta jchapan c'u x'elan chacom ta sventa li amule, jech chlic sna'ic o ti vu'un Muc'ul Diosune, jech chvinaj ti vu'un Ch'ul Diosune.

²³ ‘Ta jtacbot tal tsatsal chamel ta atojol, ta xlic nojuc ta ch'ich' li xoraltic avu'une, yu'un ta xlajic ta milel li jnaclumetic avu'une, ta xmacatic ta espada ta jujujot. Jech chana'ic o ti vu'un Muc'ul Diosune.

²⁴ ‘Li israeletique mu'yuc xa cha'ibeic o xc'uxul yan velta li ch'ix ch-ac'batic yu'un li yantic lum ti na'lebilic yu'une, mu'yuc xa cha'ibeic o xc'uxul li c'usitic ts'ubajtic sni' chpajilanbatic yu'un li yantic lum te setel ta spat ta xoconique. Jech chlic sna'ic o ti vu'un Muc'ul Diosune’, uto, xiyutun li Diose.

²⁵ “Jech chcal vu'un li Muc'ul Diosun, vu'un li Avajvalicune: Ta xlic jtsob tal scotol li israeletic ti spucoj sbaic batel ta yantic banamile. Ja' ta sventaic ta xcac' ta ilel ta stojol yantic banamil ti vu'un Ch'ul Diosune. Ta xtal naquiicuc yan velta ta yosilalic ti bu laj ono'ox cac'be ta vo'one li cajtunel Jacobe.

²⁶ Jun yo'nton te chtal naquiicuc. Ta xlic sva'an lec snaic; ta sts'un lec ts'usubtic yu'unic. Mu xlo'ilaj yo'ntonic ti c'alal te nacalique. Yu'un vu'un ta jchapanbe smulic li lumetic te ta spat xoconic ti chbajvanique, jech tsna'ic o ti vu'un Muc'ul Diosun yu'unique”, xiyutun li Diose.