Ezequiel 27 - Bible in Tzotzil de Chenalhó with Deuterocanon

¹ La sc'opanun yan velta li Muc'ul Diose, jech laj yalbun:

² “Vo'ot xnich'on cristiano, q'uejintao q'ueoj sventa at-o'nton ta sventa li lum Tiroe,

³ ja' li lum te ta ti' muc'ta nabe, ti ep chmanulaj chchonolaj xchi'uc yantic banamile xchi'uc yantic lumetic ta ti'ti' nabe. Jech xaval: “Jech chal li Muc'ul Diose: ‘Lum Tiro, li vo'ote jech chaval: li vu'une ja' jechun jech chac c'u cha'al jun barco ti toj lec, ti toj c'upil sbae, xachi.

⁴ Amacoj batel c'alal to ta o'lol nab; li boch'o la sva'anicote la sc'ac'ubtasicot lec.

⁵ Li ate'eltac laj yac'bicote lequil c'uc'tojetic liquem tal ta Senir; li ste'el apoc'al laj yac'bicote ja' lequil ch'ut te' liquem tal ta Líbano.

⁶ Li alechubile pasbil lec ta tulan liquem tal ta Basán; li atenalte'ile pasbil ta c'uc'tojetic liquem tal ta ti'ti' nab ta Quitim, macbil lec ta ts'uts'up tsemen.

⁷ Li apoc'ale jalbil lec ta lino no, lec luchtabil, liquem tal ta Egipto; ja' itun avu'un sventa senyail bu liquemot tal. Li poc' sventa avaxibe ja' yax'elan xchi'uc tsoj, liquem tal ta lum Elisa ta ti'nab.

⁸ Li boch'otic chaxlechuicote ja' viniquetic liquemic tal ta Sidón xchi'uc ta Arvad; Li jtijbarcoetic avu'une ja' avinictac atuc ti toj bijique.

⁹ Li c'usitic tsoc avu'une, ja' chasmeltsanbot li mol viniquetic talemic ta Gebal ti toj lec x'abtejique. Scotol li yantic jtijbarcoetic ta nab xchi'uc li yan j'abteletique ja' tal smanic, ja' tal xchonic li c'usitic oy avu'une.

¹⁰ Li avajsoldadotac sventa paspleitoe liquemic tal ta Persia, ta Lud, xchi'uc ta Fut. Laj yac'bicot lec smacubbailic xchi'uc smac sjolic, jech lec xaxojoban lac'ot yu'unic.

¹¹ ‘Ja' la set sbaic ta spat xocon acoraltonal li avajsoldadotaque xchi'uc li viniquetic liquemic tal ta Arvade. Li jq'uel-osiletic avu'un te ta toyol q'uelub osiletique, ja' li viniquetic liquemic tal ta Gamade. Li macubbailetic yu'unique te la sjoc'ananic ta spat xocon li acoraltonale; solel lec la sts'acubtasicot ta jyalel.

¹² Ja' imanulajic ichonolajic avu'un li Tarsise, yu'un bats'i toj ep li ac'ulejale. Puru ta saquil taq'uin, ta tsatsal taq'uin, ta estanyo, xchi'uc ta plomo la stojbicot.

¹³ Li Javán, Tubal, xchi'uc Meseque ja' ital manulajicuc, chonolajicuc avu'un noxtoc. Amozotac xchi'uc c'usitic pasbil ta bronce taq'uin laj yac'bicot ta sventa stojol li c'usitic laj achonbee.

¹⁴ Li bet-togarmaetique puru j'abtel ca'etic, cajlebal ca'etic, xchi'uc mulaetic laj yac'bicot ta stojol li abolomale.

¹⁵ Li dedanetique ja' imanulajic, ichonolajic avu'un noxtoc. Toj ep c'usitic laj achon batel ta yantic banamil ta ti'ti' nab. Puru ta sts'uts'up tsemen xchi'uc ta ébano la stojboxuc o.

¹⁶ Li edometique ja' i'ay manulajicuc avu'un noxtoc, yu'un toj ep li c'usitic oy avu'une. Li stojol laj yac'bicote ja' perlaetic, lequil poq'uetic ti ic'ic'tic sba stsajale, xchi'uc lequil c'u'iletic lec luchtabil, lequil lino noetic, xchi'uc lequil tonetic ti tsojtsojtic sbae.

¹⁷ Jech noxtoc li Judá xchi'uc Israele imanulajic avu'un ec. Puru trigo loq'uem ta Minit, xchi'uc aroz, pom, aceite, xchi'uc muil poxiletic laj yac'bicot ta stojol li abolomale.

¹⁸ Jech noxtoc li Damascoe imanulajic avu'un ta sventa ti toj ep c'usitic oy avu'une, ta sventa ti toj ep ac'ulejale. Ta lino no liquem tal ta Helbón xchi'uc ta saquil tsots liquem tal ta Sahar la stojbicot.

¹⁹ Jech noxtoc li Dane xchi'uc li Javán ti jxanubaletic no'ox liquemic tal ta Uzale, italic ta manulajel avu'un noxtoc. Li stojol laj yac'bicote ja' tsatsal taq'uinetic lec meltsanbil, xchi'uc muil poxiletic, xchi'uc te'etic ti lec muic yiq'ue.

²⁰ Jech noxtoc li dedanetique ital manulajicuc avu'un noxtoc; puru lequil stas-pat ca'etic laj yac'bicot ta stojol.

²¹ Jech noxtoc ital manulajicuc avu'un li arabiaetique xchi'uc scotol li banquilaletic ta Cedare. Puru ch'ium chijetic, tot chijetic, xchi'uc tentsunetic laj yac'bicot ta stojol.

²² Li jmanulajeletic, li jchonolajeletic ta Sabá xchi'uc ta Raamae ja' i'ay manulajicuc avu'un noxtoc. Ta lequil muil poxiletic, ta lequil tonetic, xchi'uc ta c'anal taq'uinetic la stojbicot.

²³ Jech noxtoc laj apasic trato achi'uc li Harán, Cane, Edén, xchi'uc li jmanulajeletic, jchonolajeletic ta Sabá, ta Asiria, xchi'uc ta Quilmade.

²⁴ Le'e ja' la xchonbicot lequil poq'uetic, xchi'uc muc'tic yax'elan poc', xchi'uc c'usitic lec luchtabilic, xchi'uc yantic pimil poq'uetic sventa yut na ti ep ta chop sbone, xchi'uc tsatsal ch'ojonetic ti lec pech'bilique.

²⁵ Li barcoetic ta Tarsise xyal xmuyic no'ox sventa chayich'bicot tal li c'usitic chac'ane. ‘Ja' jech lac'ot jech chac c'u cha'al muc'ta barco ta muc'ta nab, yu'un acuchoj scotol ep ta chop c'ulejalil.

²⁶ Li boch'otic ta xlechuicote, ta stiq'uicot batel c'alal to ta bats'i yutil nab, pero ja' ta slilinot li tsatsal ic' chloc' tal ta sloq'ueb c'ac'ale.

²⁷ Li ac'ulejale, li abolomale, li jlechuej barcoetique, li jtijbarcoetique, li jmeltsanej barcoetique, xchi'uc li boch'otic sventainojic c'usitic chaman, c'usitic chachone, xchi'uc scotol li avajsoldadotaque, xchi'uc scotol li achi'iltac te oy ta atojole, te ta xcomic ta yut nab scotolic ti c'alal tsta yorail chavich' jinesele.

²⁸ C'alal ch-avanic li avinictac ch-abtejic ta nabe, ta xnic yu'unic li banamil cacajtic ta nabe.

²⁹ Scotol li jlechuej barcoetique chyalic ta sbarcoic; li j'abteletic ta barco xchi'uc li jtijbarcoetique ta xloq'uic batel ta bats'i banamil.

³⁰ Ta xlic avanicuc, ta xlic oq'uicuc ta aventa; ta xac' pucuc ta sjolic, ta sbalilan sbaic ta tantic.

³¹ Ta xjux sbejlijil sjolic ta aventa; ta slapic c'u'il ti ch'ixlajan ta lapele. Ep ta x'oq'uic, ep ta xat yo'ntonic; toj bats'i yan sba yo'nton cha'yic.

³² Ta xlic sq'uejintaic jun q'ueoj sventa at-o'nton; ta xlic oq'uicuc ta aventa, jech chalic: Lum Tiro, ¿boch'o yan jech chac c'u cha'al vo'ot ti lach'ay o batel ta nabe?

³³ Yu'un c'alal ivul ta barco scotol li abolomale, ep lumetic jun yo'ntonic avu'un. Laj apas ta jc'ulej ep ajvaliletic ta banamil ta sventa ti toj ep ac'ulejal ti toj ep c'usitic oy avu'une.

³⁴ Pero li' ta orae lalilij ta stsatsal nab; lamuctsaj yalel ta natil nab. Li c'usitic oy avu'une xchi'uc scotol li achi'iltaque co'ol la'och yalel ta yut nab achi'uc.

³⁵ Scotol li jnaclumetic ta jujun banamil cacajtic ta nabe ibat xch'ulelic ta acoj; li ajvaliletique xt'elajetic ta xi'el solel iyanij satic o ta scoj li xi'ele.

³⁶ Li jchonolajeletic ta jujun lume ch-avanic ta xi'el ti c'alal chayilicote; i'ayin ep axi'elal cha'yic, yu'un sbatel osil j'ech'el lach'ay o batel,’ uto”, xiyutun li Diose.